U Čarnahoryi zastupiŭ na pasadu novy prezident, najmaładziejšy z kiraŭnikoŭ dziaržaŭ va ŭsim śviecie
36-hadovy Jakaŭ Miłatavič, jaki pieramoh na praviedzienych u Čarnahoryi 2 krasavika prezidenckich vybarach, siońnia byŭ pryviedzieny da prysiahi i zastupiŭ na pasadu kiraŭnika dziaržavy.
«Kali my hladzim na ciapierašni hłabalny kantekst, jaki ŭ značnaj stupieni vyznačajecca napadam Rasii na Ukrainu, nie pavinna być i nie budzie nijakaha adchileńnia ad našych stratehičnych met, jakija vyznačajuć Čarnahoryju jak častku jeŭraatłantyčnaj siamji», — zajaviŭ Miłatavič u svajoj inaŭhuracyjnaj pramovie.
Jon padkreśliŭ, što pryjarytetam usich pryjarytetaŭ jość paskareńnie šlachu Čarnahoryi da paŭnapraŭnaha siabroŭstva ŭ Jeŭrasajuzie.
«Ja pačynaju svoj piacihadovy prezidencki termin ź vialikim žadańniem unieści paŭnavartasny ŭniosak u dalejšaje demakratyčnaje raźvićcio krainy, jaje instytucyjnuju stabilizacyju i ekanamičny prahres. U ramkach paŭnamoctvaŭ, dadzienych mnie Kanstytucyjaj i zakonami, ja budu imknucca być faktaram prymireńnia i adzinstva na karyść kožnaha hramadzianina i hramadstva ŭ cełym, ale ŭ toj ža čas budu i karektujučym faktaram, što nakiroŭvaje hramadskija pracesy ŭ bok dalejšaj demakratyzacyi dziaržavy», — adznačyŭ Miłatavič.
Miłatavič pamianiaje na prezidenckaj pasadzie 61-hadovaha Miła Džukanaviča, jaki ź nievialikimi pierapynkami na roznych pasadach kiravaŭ Čarnahoryjaj bolš za 30 hadoŭ, jašče z pačatku 1990-ch hadoŭ. Padčas pieradvybarnaj kampanii Džukanavič u svajoj prapahandzie staviŭ pad pytańnie zdolnaść Miłataviča pryvieści Čarnahoryju ŭ ES i kazaŭ, što jon moža być padvierhnuty ŭpłyvu prasierbskich sił — dla maleńkaj krainy, jakaja tolki ŭ 2006 hodzie stała niezaležnaj, heta surjoznaja prablema. Ci sapraŭdy prychod da ŭłady Miłataviča budzie aznačać bolšyja ŭpłyvy ŭ Čarnahoryi Sierbii, a praź jaje i pucinskaj Rasii — pakaža čas.
Siarod inšaha Jakaŭ Miłatavič paśla svajho zastupleńnia na pasadu robicca adnym z samych maładych, kali nie samym maładym ź ciapierašnich kiraŭnikoŭ dziaržaŭ i ŭradaŭ u śviecie.
Maładziejšy za jaho tolki Ibrahim Traare z afrykanskaha Burkina-Faso, jaki zachapiŭ uładu ŭ krainie ŭ vyniku ŭzbrojenaha pieravarotu ŭ vieraśni 2022 hoda i lehitymnaść jakoha praz toje sumnieŭnaja.
Pry hetym premjer-ministr Čarnahoryi Drytan Abazavič starejšy za Miłataviča ŭsiaho na hod, tamu na hety momant kiraŭnictva Čarnahoryi niesumnienna možna ličyć najmaładziejšym u śviecie.
«Usie bačyli, što jamu padabajecca Nataša, i dumali: «Nu kali vy ŭžo?!» Były palitviazień Łukša raskazaŭ pra svaje adnosiny z Ejsmantami15
Kamientary
nu. u 94-m sioje-toj tože byu małady malčyška (S) jaki navat nie prachodziŭ uzrostavy cenz