Što zdaryłasia z Kanapackaj i kali jana pačała hulać na baku Łukašenki?
Palityk Anatol Labiedźka na kanale «Tok» patłumačyŭ mietamarfozy Hanny Kanapackaj.
Anatol Labiedźka zhadvaje situacyju z abrańniem u 2016 hodzie Hanny Kanapackaj deputatkaj Pałaty pradstaŭnikoŭ Nacyjanalnaha schodu. Jon miarkuje, što ŭ tych umovach adbyłasia damova pradstaŭnikoŭ siłavych struktur pa ŭkazańni Łukašenki. U Abjadnanaj hramadzianskaj partyi ab «vybrańni» daviedalisia ŭ noč, kali išoŭ padlik hałasoŭ.
Labiedźka dzielicca ŭspaminami:
«Mianie razbudzili nočču i skazali: «U nas deputat». — «Jaki deputat? Adkul?» — «Hanna Kanapackaja». I voś my terminova źbirajemsia i razumiejem, što heta hulnia, jakuju nam prapanujuć. I što tut treba rabić? My jaje prymajem ci admaŭlajemsia. Pa hałasavańni heta byŭ prosty vybar, ale pa dyskusii — nie».
Palityk arhumientuje stanoŭčaje rašeńnie ŭ hetym pytańni imknieńniem zrazumieć plusy i minusy vałodańnia deputackim mandatam. Akramia hetaha, u partyi była mahčymaść u luby momant, kali niešta pojdzie nie tak, vyjści z hulni.
Labiedźka padkreślivaje, što z samoj Kanapackaj była padpisanaja admysłovaja damova. U joj utrymlivaŭsia pieralik taho, čaho ad jaje, jak deputatki, čakaje partyja:
«Kali koratka skazać, tam było nastupnaje. Jana łabiruje temu svabodnych i sumlennych vybaraŭ. Druhoje — prahrama «Miljon pracoŭnych miescaŭ». Heta ekanamičnyja reformy».
U dalejšym pamiž Kanapackaj i partyjnym kiraŭnictvam uźnik kanflikt. Jaho asnoŭnaja pryčyna — nievykanańnie Hannaj pieršaha punktu damovy.
«Za ŭvieś čas u jaje nie było ni adnaho vystupu, jaki b zakranaŭ temu svabodnych i sumlennych vybaraŭ. U jaje nie było ni adnaho vystupu z krytykaj piersanalna biełaruskaha kiraŭnika i jaho atačeńnia. I my razumiejem, što heta była ŭmova z taho boku».
Labiedźka ličyć, što damova z boku ŭładaŭ była zaklučanaja piersanalna z Kanapackaj.
«Paśla historyi z hienierałam Frałovym Łukašenka ŭžo nijakija hulni, jakija b mahli pryvieści da niepradkazalnych vynikaŭ, nie hulaje».
Pa viersii Anatola Labiedźki, «adzin raz Alaksandr Łukašenka pahadziŭsia na toje, kab dać na vodkup tak zvanym «hubiernataram» farmavańnie śpisa deputataŭ».
«Viadoma, što deputaty ŭ nas zahadzia vyznačajucca i pryznačajucca. I da čaho heta pryviało? Zjaviłasia frakcyja hienierała Frałova ŭ parłamiencie — «Respublika». U jaje składzie było šeść čałaviek. I heta stała prablemaj. Jany stali haładać u deputackim domie, vyviešvać tam płakaty».
Palityk spasyłajecca na svaju razmovu z hienierałam Frałovym, padčas jakoj apošni ščyra pryznaŭsia, što jaho «pryznačyli» ŭ deputaty. Ale damova była z tahačasnym «hubiernataram» Hrodzienskaj vobłaści Alaksandram Dubko. Kali raspačałasia praca ŭ parłamiencie, Dubko pamior. Pa słovach Labiedźki, Frałoŭ padkreślivaŭ, što nios adkaznaść pierad Dubko, i nie musiŭ trymać svajho hienieralskaha słova pierad Łukašenkam. Tamu byŭ jak čałaviek i hramadzianin absalutna volny.
U suviazi z takimi asablivaściami «vybaraŭ» deputataŭ, ličyć Labiedźka, nie mahło nie być papiarednich damovaŭ z Kanapackaj. Jon jašče zhadaŭ cikavy momant: «Kali my pahadzilisia i abhavaryli ŭmovy deputactva Kanapackaj, to prapanavali joj samoj vyłučycca na pasadu staršyni Pałaty pradstaŭnikoŭ. Navošta heta treba było? Kab my mahli vykarystać 20-30 chvilin vystupu, kab ahučyć svaju prahramu i zajavić pra siabie. Buduć žurnalisty, deputaty. Vielmi dobraja nahoda. Jana padtrymała hetuju prapanovu dźviuma rukami. Hanna lubić uvahu. Paśla taho, jak my padrychtavali vystup, jana admoviłasia».
Hety vypadak admovy ad papiaredniaj damovy, na dumku Labiedźki śviedčyć ab tym, što «ŭ čałavieka jość kamunikacyja ź niekim, chto prymaje kančatkovaje rašeńnie».
Padsumoŭvajučy, Labiedźka adznačaje:
«U jaje nie było nivodnaha vystupu pa svabodnych sumlennych vybarach. Ni adnoj krytyki peŭnaha koła ludziej. Usio, što nižej, pa ekanomicy — kali łaska. «U ciabie jość takija mahčymaści». I heta pryviało da jaje vyklučeńnia z partyi».
Palityk ličyć, što Kanapackaja pačała hulać na baku Łukašenki z taho momantu, jak atrymała deputacki mandat.
Labiedźka zhadvaje, što baćka Hanny Kanapackaj adyhraŭ u Abjadnanaj hramadzianskaj partyi stanoŭčuju rolu. «Jon byŭ siarod stvaralnikaŭ partyi, tych, chto ŭ jaje resursna ŭkładvaŭsia na pieršym etapie. Anatol Ivanavič — vielmi pavažany čałaviek. I ja da jaho staŭlusia ź vialikaj simpatyjaj. Jon vielmi razumny, talenavity. Takija ludzi patrebnyja krainie».
Hladzicie całkam:
Kali Kanapackaja stała całkam padkantrolnaja Łukašenku?16
Kamientary