«U mianie ŭ hałavie nie ŭkładvajecca». Što vypuskniki i ich baćki źbirajucca rabić z vynikami centralizavanaha ekzamienu?
Vyniki ispytu pa biełaruskaj i ruskaj movach, apublikavanyja 29 maja, vyklikali škvał emocyj u abituryjentaŭ i ich baćkoŭ. Jany śćviardžajuć, što padliki niapravilnyja. Stvaryli navat pietycyju. Ale asprečvać hatovy nie ŭsie. «Ściaŭšy zuby treba pryniać toje, što jość».
Centralizavany ekzamien u Biełarusi sioleta pravodzili pieršy hod. Kožny vypusknik zdavaŭ adzin abaviazkovy ispyt: pa ruskaj ci biełaruskaj movie. Druhi pradmiet — pa vybary. Zadańni adaptavali da bazavaha ŭzroŭniu školnaj prahramy.
Vyniki abaviazkovaha ekzamienu vyklikali masavuju niezadavolenaść vypusknikoŭ i baćkoŭ.
«Mianie vielmi chvaluje, što niama nijakaha tłumačeńnia hetaj situacyi. Ja da hetaha času nie mahu pavieryć, što za hod raspracavali sistemu, jakaja pakidaje stolki pytańniaŭ i nieparazumieńniaŭ», — aburajecca adna z surazmoŭnicaŭ «Našaj Nivy».
Reakcyjaj na pamyłki z padlikami centralizavanaha ekzamienu stali pietycyi vypusknikoŭ. Jany patrabujuć pieraliku bałaŭ i zaklikajuć Respublikanski instytut kantrolu viedaŭ da adkaznaha staŭleńnia da sistemy aceńvańnia vynikaŭ.
«Heta nie adpaviadaje łohicy i našym sapraŭdnym bałam, — havorycca ŭ pietycyi. — Nas pieršapačatkova nie aznajomili ź sistemaj aceńvańnia i tym, jak pravilna vyličyć bał».
Vypuskniki aburanyja, što dziaržaŭnaja struktura praihnaravała ich niezadavolenaść i nie pryznała pamyłki.
«Kali vy nie spraŭlajeciesia sa svajoj pracaj, to albo pryznajcie heta, albo sychodźcie z pasadaŭ», — adznačajecca ŭ pietycyi.
Pietycyju, dzie patrabujuć pieraliku bałaŭ pa ispycie pa ruskaj movie, padpisała 11 tysiač čałaviek. Takuju ž pietycyju, ale pa ispycie pa biełaruskaja movie, amal 700 čałaviek.
Vypuskniki kažuć, što formuła, pavodle jakoj kamisija padličvała vyniki, im dakładna nie viadomaja.
«U mianie ŭ hałavie nie ŭkładvajecca, jak padličvali vyniki i jak vyrašali, kolki bałaŭ zdymać za pamyłku. Pakul heta padobna da sistemy, u jakoj ty nie maješ prava na pamyłku. Ty musiš być robatam», — vykazvajecca adna z vypusknic, u jakoj «zabrali 20 bałaŭ» i jana nie moža razabracca, jak tak vyjšła.
Pavodle dziaŭčyny, vypuskniki i ich baćki zmohuć dabicca praŭdy, kali buduć dziejničać ciapier, pakul nie stali drukavać siertyfikaty ab zdačy centralizavanaha ekzamienu.
«Chočacca vieryć u spraviadlivaść i ludziej, tamu ja vielmi spadziajusia na pryznańnie pamyłak i pieraraźlik bałaŭ», — kaža jašče adna vypusknica.
Adzin z baćkoŭ adznačaje: usio, što mahli zrabić niezadavolenyja situacyjaj ludzi, zroblena ŭčora «masavym pratestam». Jaho čynoŭniki Minadukacyi staralisia spačatku nie zvažać, a potym zajavili, što parušeńniaŭ nie było.
«Na vulicu nie vyjdzieš z abureńniem, bo sabie daražej. Usio budzie zaležać nie ad kamisii ci Ministerstva adukacyi. Budziem čakać. Ale realna paŭpłyvać na situacyju my nie možam. Nie toj čas. Ściaŭšy zuby treba pryniać toje, što jość», — ličyć mužčyna.
Skandał z ekzamienam nie abyšoŭsia biez umiašalnictva Łukašenki.
«Cełuju buču padniali paśla adzinaha centralizavanaha ekzamienu. Rozumu nie chapiła zrabić prosta i zrazumieła, kab padličyć hetyja bały. Jany pačali niejkija statystyčnyja ličby vyvodzić na kampjutary», — adreahavaŭ jon siońnia.
Ihar Sierhiejenka, kiraŭnik jaho administracyi, zajaviŭ, što pastaŭlena zadača pravieryć arhanizacyju centralizavanych ekzamienaŭ. Pravierać i Minadukacyi.
Napiaredadni ministr adukacyi Andrej Ivaniec nie bačyŭ prablemaŭ z centralizavanym ekzamienam. Čynoŭnik nazvaŭ «poŭnym fejkam» abvinavačvańni ŭ pamyłkovym padliku vynikaŭ.
«Ministerstvam adukacyi budzie adsočvacca kožny vypadak raspaŭsiudžvańnia niedakładnaj infarmacyi, materyjały buduć nakiravanyja dla dačy acenki dziejańniam raspaŭsiudžvalnikaŭ fejkaŭ», — strašyŭ Ivaniec.
Da masavaj niezadavolenaści vynikami centralizavanaha ekzamienu Ministerstva adukacyi davodziła, što novaja forma atestacyi vypusknikoŭ apraŭdała siabie.
Pieršy centralizavany ispyt pa ruskaj i biełaruskaj movach byŭ 14 maja. U im pryniali ŭdzieł bolš za 53 tysiačy 11-kłaśnikaŭ. Pavodle ahučanych vynikaŭ, pa ruskaj movie 100 bałaŭ atrymali 482 vypuskniki, pa biełaruskaj — 413 navučencaŭ.
U viedamstvie adznačali, što pavieličeńnie kolkaści 100-balnych vynikaŭ u paraŭnańni z CT u minułyja hady tłumačycca poŭnaj karelacyjaj testavaha materyjału z vučebnaj prahramaj, a taksama vyklučeńniem zadańniaŭ piataha ŭzroŭniu składanaści.
«Naša Niva» — bastyjon biełaruščyny
PADTRYMAĆHladzicie taksama:
Siertyfikaty CE i atestaty vypuskniki 11-ch kłasaŭ atrymajuć 10 červienia
Minadukacyi: adznaka za repietycyju CE ni na što nie paŭpłyvaje
Hałoŭnaja IT-VNU krainy raspaviała, kolki studentaŭ płanuje nabrać sioleta
Chto taja žančyna, jakuju Marzaluk u efiry BT abazvaŭ «švallu z Hrodna», i što jana piša ŭ čatach? Raskazvajem pra doktarku Stefanovič7
Kamientary