Biespalčuk dla studentaŭ byŭ i zastajecca ŭvasableńniem raźmierkavalnaj mašyny. Piša eks-kiraŭnička Zadzinočańnia biełaruskich studentaŭ Kryścina Sidun.
Naprykancy tydnia srodki masavaj infarmacyi paviedamili pra toje, što ŭ minskim mieduniviersitecie pamianiajecca rektar. Ź minułym, Paŭłam Ivanavičam Biespalčukom, MZRB nie praciahnuŭ kantrakt. Zdavałasia b ničoha zvyšardynarnaha, ale pierad svaim zychodam rektar apublikavaŭ va ŭniviersiteckaj haziecie «Vieśnik BDMU» materyjał, dzie raskryŭ niekatoryja padrabiaznaści zvykłaha biezzakońnia, jakoje štohod adbyvajecca padčas raźmierkavańnia ŭ hetaj navučalnaj ustanovie.
Niahledziačy na toje, što ničoha novaha dla studentaŭ‑miedykaŭ Biespalčuk nie napisaŭ, a sama publikacyja prypaźniłasia na 7 miesiacaŭ (raźmierkavańnie było ŭ krasaviku), sam fakt vystupleńnia čynoŭnika ŭ ŚMI stvaryŭ apošniamu imidž prafiesijanała z pryncypovaj pazicyjaj».
Doktar.net sustreŭsia z čałaviekam, jaki nie źjaŭlajecca miedrabotnikam, ale mieŭ spravu z Paŭłam Ivanavičam pa raźmierkavańni studentaŭ u lepšyja dla eks‑rektara časy. I viedaje jaho ź inšaha boku.
Heta Kryścina Sidun — byłaja staršynia Respublikanskaha hramadskaha abjadnańnia «Zadzinočańnie Biełaruskich Studentaŭ». U krasaviku 2000 h. siabry hetaj arhanizacyi pravodzili kala mieduniviersitieta sankcyjanavany haradskimi ŭładami pikiet suprać prymusovaha raźmierkavańnia studentaŭ. Havoryć Kryścina:
U siaredzinie 90‑ch raźmierkavańnie nie było abaviazkovym. Pieršyja sproby prymusova adpraŭlać vypusknikoŭ u rehijony, paciarpiełyja ad avaryi na ČAES, vyklikali chvalu hramadskich pratestaŭ.
Tady ideju ŭviadzieńnia raźmierkavańnia ŭłady pasprabavali padać hramadskaści jak reakcyju na prośby moładzi dapamahčy z pošukam pieršaha pracoŭnaha miesca. Byŭ pieryjad, kali piedahahičnyja i miedyčnyja ŭniviersitety faktyčna pačali raźmiarkoŭvać vypusknikoŭ, ale zakanadaŭčaja baza pad heta jašče nie isnavała. Usialakija raśpiski, pahrozy i prymusy byli niezakonnymi. I vypuskniki masava ihnaravali raźmierkavańnie.
Mienavita ŭ hety pieryjad, u 1998—2001 hady, adbyvałasia supraćstajańnie ŭładaŭ, jakija adpraŭlali biaspłatnuju i biaspraŭnuju pracoŭnuju siłu tudy, kudy vyhodna čynoŭnikam, i studentaŭ, jakija nie žadali marnavać lepšyja hady žyćcia, talent i zdaroŭje. Suprać raźmierkavańnia vykazalisia mnohija moładzievyja hramadskija arhanizacyi (a ich tady było šmat!). Zadzinočańnie Biełaruskich Studentaŭ inicyjavała hetuju kampaniju, pryciahnuła da supracoŭnictva jurystaŭ, jakija dakazali niezakonnaść praktyki raźmierkavańnia. ZBS nakiravała adkrytyja listy va ŭsie ministerstvy, padviedamasnyja VNU jakich praktykavali raźmierkavańnie. Deputaty Viarchoŭnaha savietu atrymali prapanovy inicyjavać słuchańni ŭ parłamiencie pa spynieńni antykanstytucyjnaj praktyki raźmierkavańnia.
U vyniku deputat Navasiad u 2001 hodzie sabraŭ 35 tysiač podpisaŭ studentaŭ suprać raźmierkavańnia.
Była razhornutaja dyskusija ŭ ŚMI, jakaja jaskrava prademanstravała, što moładź kateharyčna suprać raźmierkavańnia. Studenty vychodzili na stychijnyja pratesty. Baćki ślozna prasili rektaraty, nasili chabary i šukali «błat», kab ich dziaciej nie raźmiarkoŭvali. Heta byŭ čas, kali patrebien byŭ chacia b adzin sumlenny rektar, kab raźmierkavańnie nikoli nie stałasia ŭzakonienym.
Supołki ZBS z roznych univiersitetaŭ padavali zajaŭki ŭ miascovyja orhany ŭładaŭ i pravodzili sankcyjanavanyja pikiety suprać raźmierkavańnia kala navučalnych ustanovaŭ. Adzin z takich pikietaŭ prajšoŭ uviesnu 2000 hodu kala BDMU (miesca było vyznačana haradskimi ŭładami). Budučyja miedyki skandavali:
«Hryz navuku ja štodnia, maju adukacyju,
Kab viaskovym parsiukam pryznačać kastracyju!»
Pobač stajaŭ vydzieleny harvykankamam dla kantrolu za paradkam narad milicyi, jaki baraniŭ… Kaho i ad kaho b vy dumali? Studentaŭ ad rektara BDMU Biespalčuka!
Bo jon vybieh da chłopcaŭ i dziaŭčat z pahrozami adličeńnia, abzyvaŭ ich, nie saromiejučysia, sprabavaŭ prahnać. Jon kidaŭsia da mikrafonaŭ i kamieraŭ žurnalistaŭ, kab zaśviedčyć, što jon zmahajecca ZA raźmierkavańnie, i nikomu nie dazvolić vykazvać advarotny punkt hledžańnia pablizu miedinstytuta.
Napiaredadni ja zajšła da Paŭła Ivanaviča ŭ kabiniet, kab paviedamić, što ŭ adpaviednaści z rašeńniem harvykankamu pablizu BDMU maje adbycca sankcyjanavany pikiet suprać raźmierkavańnia. Z rektaram jaho nijak nie treba było ŭzhadniać, bo dazvoł byŭ atrymany ad haradskich uładaŭ. Z majho boku taki vizit byŭ vizitam vietlivaści i dobraj voli. Čakałasia, što infarmacyja budzie pryniataja da viedama, nie bolej. Adnak rektar apynuŭsia zmaharom! Jon pažadaŭ mnie zhnić u turmie i skazaŭ jašče šmat taho, što nie maje prava kazać doktar, mužčyna i intelihient. Heta była našaja pieršaja sustreča, a na nastupny dzień adbyłasia druhaja i apošniaja, dzie ŭžo znajomy mnie zmahar sprabavaŭ adstojvać raźmierkavańnie, zryvajučy pracivahaz z udzielnika akcyi, kab zapomnić jahony tvar i adpomścić na raźmierkavańni.
Biespalčuk dla studentaŭ byŭ i zastajecca ŭvasableńniem raźmierkavalnaj mašyny. Jon udzielničaŭ štohod u pasiadžeńniach kamisijaŭ pa raźmierkavańni. Jon zrabiŭ usio, što ad jaho zaležała, kab raźmierkavańnie tryvała ŭvajšło i zamacavałasia ŭ sistemie vyšejšaj adukacyi Biełarusi. I jon za heta adkazny pierad kožnym raźmierkavanym studentam i pierad svaim sumleńniem.
Voś taki «pravdorub». Dadatkovyja padrabiaznaści tych padziejaŭ možna pačytać u publikacyi haziety «Viečiernij Minsk».
Biezumoŭna, Biespalčuk — čałaviek sistemy, jaki śviadoma ŭsio žyćcio imknuŭsia być na kirujučych administracyjnych pasadach — ad kamiteta kamsamoła da dekanata i rektarata. Zastavaŭsia pry hetym praktykujučym chirurham, kažuć, navat niakiepskim, ale z abaviazkovym nalotam funkcyjaniera.
Za dvanaccać hod rektarstva Pavał Ivanavič mieŭ nie adzin šaniec prajavić pryncypovaść, mužnaść, śmiełaść i pasprabavać źmianić sistemu. Ale ni razu nie skarystaŭsia takoj mahčymaściu.
Pryviedzieny vyšej prykład daloka nie adziny. Uzhadać chiba studentaŭ, vyklučanych z BDMU paśla padziejaŭ na «płoščy Kalinoŭskaha». A byli ž dekany i rektary, jakija svaich studentaŭ adstajali… Chočacca vieryć u lepšaje — u žadańnie zmahacca z «łożju i biezzakonijem», jakoje «dostihło svojeho apohieja v płanie raspriedielenija vypusknikov». Chočacca — i nie vierycca, bo niezrazumieła, što zaminała pavažanamu dacentu źviarnucca ŭ ŚMI jašče ŭviesnu, kali adbyvalisia «vapijuščyja padziei», a taksama napisać list ŭ prakuraturu ci milicyju, tym bolš, što ŭsio dakumientavałasia na videa i była tysiača śviedak.
Ale ŭ kułuarnych hulniach i ofisnych vojnach zaŭždy pytańniaŭ bolš čym adkazaŭ.
Ciapier čytajuć
Što Babaryka i Kaleśnikava adkazali na pytańni pra vajnu97
Kamientary