«Haniebnaja abyjakavaść». Zialenski asudziŭ reakcyju śvietu na razbureńnie Kachoŭskaj HES
«Ciapier, na žal, bačym, što na niekatorych uzroŭniach u śviecie jość prosta haniebnaja abyjakavaść da ekacydu i čałaviečaj trahiedyi, vyklikanaj rasijskim teraktam na Kachoŭskaj HES», — zajaviŭ prezident Ukrainy Uładzimir Zialenski ŭ svaim viačernim zvarocie da nacyi.
«Kali mižnarodnyja arhanizacyi, jakija pavinny abaraniać žyćcio ŭ hłabalnym maštabie, navat za tydzień nie paśpiavajuć sfarmavać i adpravić vyratavalnuju misiju na akupavanuju terytoryju, kali niekatoryja suśvietnyja subjekty nie navažvajucca vyjści navat z vyraznymi i mocnymi zajavami, jakija b asudžali heta čarhovaje rasijskaje złačynstva vajny, terarysty prosta padsiłkoŭvajucca hetaj słabaściu śvietu, hetaj abyjakavaściu — jano ich zaachvočvaje. I heta my pavinny pieraadoleć. I pieraadolejem», — cytuje Zialenskaha «Ukrainskaja praŭda».
«Rasijskija abstreły praciahvajucca, a taksama [abstreły] evakuacyjnych punktaŭ. Nijakaj realnaj dapamohi ludziam u zatoplenych rajonach — nie dziela prapahandy, a dziela ludziej — Rasija nie akazvaje. Za heta pavinna być asobnaja, spraviadlivaja i žorstkaja adkaznaść rasijskaj dziaržavy i rasijskaha kiraŭnictva», — skazaŭ prezident Ukrainy.
Zialenski padkreśliŭ, što Ukraina ciśnie i padachvočvaje, kab mižnarodnyja arhanizacyi, mižnarodnaja padtrymka była na akupavanaj častcy Chiersonščyny.
Jon adznačyŭ, što z padkantrolnaj Ukrainie terytoryi Chiersonskaj i Mikałajeŭskaj abłaściej evakujavali ŭžo bolš za 3 tysiačy čałaviek. A na akupavanaj terytoryi «tolki na niekatorych učastkach atrymoŭvajecca dapamahčy ludziam — rasiejcy robiać usio, kab achviar katastrofy było jak maha bolš».
«I mižnarodnyja arhanizacyi pavinny pracavać tam, dzie my jašče nie deakupavali našy terytoryi. Kožnaje žyćcio važnaje — usia Chiersonščyna, uvieś poŭdzień. Kožny horad i vioska. My budziem rabić usio mahčymaje i niemahčymaje, kab dapamoha pryjšła ŭsim našym ludziam», — padkreśliŭ Zialenski.
Raniej Zialenski zajaŭlaŭ, što ździŭleny reakcyjaj AAN i Čyrvonaha Kryža na padryŭ Kachoŭskaj HES.
U noč na 6 červienia 2023 hoda rasiejcy ŭzarvali Kachoŭskuju hidraelektrastancyju, razburyŭšy mašynnuju zału i płacinu, stancyju niemahčyma adnavić. Abmialeńnie Kachoŭskaha vadaschovišča pahražaje biaśpiecy Zaparožskaj AES.
Padryŭ Kachoŭskaj HES vyklikaŭ ekałahičnuju katastrofu. Vada z vadaschovišča pačała zataplać harady i vioski, pačałasia evakuacyja. U vyniku padryvu damby Kachoŭskaj HES pačalisia prablemy z padačaj vady ŭ Kryvym Rohu, Marhancy i Nikapali.
Łukašenka pra punkty propusku na miažy z Polščaj: Dy chaj choć apošni zakryjuć35
Kamientary