Aktyvist Ilja Mironaŭ raskazaŭ, navošta pisaŭ skarhi na Azaronka i jak stavicca da padazreńniaŭ u svoj bok
Dniami vałancior z Homiela, jaki viadomy tym, što napisaŭ bolš za 2000 listoŭ palitviaźniam, źjechaŭ u Litvu. Ilju Mironava niekalki razoŭ kidali za kraty. «Maja maci skazała mnie być sumlennym, vielmi za mianie pieražyvała, ja i źjechaŭ». Jon raskazaŭ «Našaj Nivie» pra abstaviny adjezdu i płany ŭ emihracyi.
Ilju Mironava raniej sudzili pa kryminalnaj spravie — za kamientary ŭ internecie paśla hibieli supracoŭnika KDB Dźmitryja Fiedasiuka i ajcišnika Andreja Zielcera. Jaho abvinavacili pa artykule 369-1 KK (dyskredytacyja Respubliki Biełaruś) i dali paŭtara hoda pazbaŭleńnia voli, a taksama 200 bazavych vieličyń štrafu.
Paśla vyzvaleńnia aktyvista nieadnojčy adpraŭlali na sutki.
Źjechaŭ Ilja ź Biełarusi z pryčyn niebiaśpieki.
«Niekatoryja ludzi kazali, što ŭ niejki momant mnie prosta padkinuć narkotyki ci najeduć miascovyja hopniki. Nie adčuvaju siabie doma ŭ biaśpiecy ŭ suviazi z rostam majoj viadomaści. Z nabyćciom statusu «ekstremista» (9 lutaha 2023-ha) ja nie mahu zajmacca kulturnaj dziejnaściu, adna sprava — manitorynh sudoŭ, napisańnie zajaŭ, zvarotaŭ, inšaja — praca ŭ śfiery kultury.
Nijakich pytańniaŭ na miažy nie ŭźnikała, pašpartny kantrol na ŭvieś aŭtobus zaniaŭ prykładna 25 chvilin. Viza ŭ mianie była zroblena jašče ŭ lutym. Tady zrabiŭ, kab była mahčymaść u vypadku niebiaśpieki chutka źjechać», — raskazvaje jon.
U Homieli 41-hadovy Ilja Mironaŭ viadomy jak arhanizatar rok-kancertaŭ. Hetaj spravaj mužčyna zajmaŭsia bolš za 20 hadoŭ.
«Vielmi lublu jašče rabić strymy z kancertaŭ», — kaža jon.
Z 2017-ha pa 2019-y Ilja pracavaŭ kantraloram na składzie ŭ Maskvie, paźniej — niekalki miesiacaŭ u Polščy na aŭtazavodzie.
«Da hetaha ŭ Biełarusi byŭ prosta ipešnikam. Paśla padumaŭ, navošta tracić svaje siły i rozum na heta ŭsio. Pastajanna sa skryniami, tak možna i atupieć. Vyrašyŭ usio ž znoŭ pačać zajmacca tym, što mnie cikava», — raskazvaje jon pra svaju dziejnaść.
Svajoj siamji ŭ Ilji niama. U Biełarusi ŭ aktyvista zastałasia 73-hadovaja maci.
«Jana pieršaja skazała, što mnie treba źjazdžać, vielmi pieražyvaje za mianie. Hanarusia svajoj maci. Jana i jašče niekalki siabrovak blizka da serca ŭsprymajuć usio, što sa mnoj adbyvajecca. Prosta skazała mnie: «Ilja, maj sumleńnie». I ja vyrašyŭ jechać», — kaža jon.
Ilja Mironaŭ viadomy tym, što pisaŭ skarhi na prapahandystaŭ Andreja Mukavozčyka i Ryhora Azaronka, łukašyscki telehram-kanał «Žoŭtyja źlivy». Ale Ministerstva infarmacyi nijakich parušeńniaŭ u dziejnaści hetych prapahandystaŭ nie pabačyła.
Aktyvist nie pahadžajecca z tym, što jaho skarhi byli biessensoŭnymi.
«Efiekt na maje zajavy jość. Jany adreahavali. Rana ci pozna kožnamu, chto parušaje zakon, daviadziecca adkazvać. Usie ich adkazy, dakumienty zachoŭvajucca ŭ nadziejnych archivach. Jany spatrebiacca, kali hetych ludziej buduć sudzić. Zvyčajna, kali mianiałasia ŭłada, zaŭsiody spalvali archivy. Tamu treba rabić kopii.
U nas, u Homieli, navat byli vypadki, kali ŭ milicyi admaŭlalisia vydavać pratakoł, kab nie byli viadomy proźviščy supracoŭnikaŭ, tamu treba abaviazkova damahacca taho, kab viedać, chto čynić hetyja represii, źbirać dakumienty», — tłumačyć jon.
Ilja apisvaje ŭmovy ŭtrymańnia ŭ homielskim IČU:
«Dvuchjarusnyja nary ŭ nievialikim pakoi. U dvuchmiesnaj kamiery było piać čałaviek. Niechta spaŭ na padłozie, na vuzkaj łaŭcy.
Milicyja, achoŭniki prosta vykonvajuć svaju pracu. Nijakaj ahresii ad ich nie było».
U Vilni mužčynu prytuliła arhanizacyja «Dapamoha». Ciapier u Ilji jość časovaje miesca žycharstva.
«Bajsoł» dapamoh, kali ja vyjšaŭ na svabodu, jany raźmiaścili zbor. Sabrali dla mianie peŭnuju sumu. Taksama adhuknułasia Rada kultury, prapanavaŭ im svaje pasłuhi pa arhanizacyi kancertaŭ», — kaža jon.
Jak Ilja stavicca da krytyki ŭ svaj adras? Niekatoryja ličać, što aktyvist zavierbavany śpiecsłužbami.
«Čym bolš času ja zastavaŭsia na voli paśla vychadu ź SIZA, tym bolš stała raspaŭsiudžvacca takich plotak. Nie źviartaju ŭvahi na heta.
Dla bolšaści prosta čytatać naviny — heta ŭžo podźvih. Jany, mabyć, dumajuć, što voś ja chadžu na sudy, pišu skarhi, siadžu na sutkach dy jašče niejak viesialusia, na kancerty chadžu — štości ź im nie tak, ahient. Hetyja ludzi prosta troški zianonaŭcy», — kaža jon.
U Vilni Illa chacieŭ by stvaryć bujny muzyčny sajt na biełaruskaj movie.
«Kab u kožnaha muzyki tam byŭ svoj akaŭnt i jon moh samastojna mianiać infarmacyju, naprykład, afišy. Patrebna budzie mnie znajści ajcišnika, ale dumaju, tut ich vielmi šmat.
Jašče ja napisaŭ knihu «Historyja muzyki Homielskaj vobłaści». Pracavaŭ nad joj z 2011-ha, atrymałasia 600 staronak. Jana, praŭda, na ruskaj movie. Chaču pierakłaści na biełaruskuju, ciapier šmat vydaviectvaŭ u vyhnańni, dumaju, što heta taksama prablemaj nie budzie. Taksama chaču stvaryć nievialikuju hazietu navin z afišami dla biełarusaŭ. Naprykład, čałaviek zasialajecca ŭ chosteł, a tam na pieršym paviersie taki minihajd pa biełaruskich kulturnych mierapryjemstvach u emihracyi. Budzie niejak lahčej ulicca ŭ biełaruskuju tusoŭku.
Dumaju, što tut zarehistrujusia ipešnikam. Chacieŭ by raźvivacca ŭ błohierstvie, raskazvać pra muzyku i kulturu, ale ŭ niejkaj bujnoj arhanizacyi», — dzielicca jon płanami.
Čytajcie taksama:
Illa Mironaŭ paskardziŭsia na varvarski razhrom kvatery
Illa Mironaŭ: Mianie zatrymali za toje, što ja pišu skarhi
Śpiavačka Meryjem Hierasimienka i vałancior Ilja Mironaŭ trapili ŭ śpis ekstremistaŭ
Žyvahłod pryznała rassyłku praz čat-bot «Sumlennych ludziej» karystalnikam u Biełarusi: Ale nie ŭ pracoŭny čas, paśla 18 hadzin14
Kamientary
da śviety abracisia - žonki samaha bujnaha błohiera
Mabyć nazvaŭsia karespandentam Illa.