Ministarka ŭnutranych spraŭ Ahnie Biłatajcie spadziajecca, što sioleta budzie prakładziena bolš za 100 kiłamietraŭ trasy dla patrulavańnia na miažy ź Biełaruśsiu. «Pieršy etap startavaŭ, na jaho zapłanavali 10 młn jeŭra. Spadziajomsia, što sioleta my vykanajem hetyja pracy», — zajaviła žurnalistam u paniadziełak Ahnie Biłatajcie, jak paviedamlaje LRT.
Pavodle jaje słoŭ, na druhim etapie za 40 młn jeŭra płanujecca abstalavać jašče 250 kiłamietraŭ patrulnaj trasy, a samy składany — treci — etap budzie ŭklučać bahnistyja ŭčastki miažy.
«My zrobim usio, kab maksimalna vykarystoŭvać hetuju infrastrukturu», — dadała ministarka.
Patrulnaja trasa budzie mieć šyryniu da 3,5 mietra i, nakolki heta mahčyma, budzie prystasavanaja dla piešaha patrulavańnia, dla jazdy na džypach, kvadracykłach i inšaj śpiecyjalnaj techniki.
«Situacyja takaja, što ŭ nas była hetaja patrulnaja trasa ŭ niekatorych miescach, ale pry budaŭnictvie i ŭźviadzieńni fizičnaha barjera jaje davodziłasia ramantavać i rekanstrujavać. U niekatorych miescach trasy dla patrulavańnia nie było», — dadała ministarka.
Biłatajcie padkreśliła, što ŭ niekatorych miescach užo prakłali trasu dla patrulavańnia, ale ciapier jaje nieabchodna adramantavać.
«Pracy iduć u składanych umovach. Miaža achoŭvajecca, na žal, nie ŭ haradach, a ŭ rajonach, jakija vielmi addalenyja ad asnoŭnych elemientaŭ infrastruktury. Łandšaft, vada, les, zabałočanyja miescy — takoje hieahrafičnaje stanovišča ŭskładniaje pracu padradčykaŭ», — zajaviŭ kiraŭnik Słužby achovy dziaržaŭnaj miažy Rustamas Lubajevas.
Pa słovach Lubajevasa, dahavory padradu zaklučanyja z čatyrma padradčykami.
Prakładka trasy dla pamiežnaha patrulavańnia — heta praciah prajekta pa ŭzmacnieńni achovy źniešnich miežaŭ Jeŭrapiejskaha sajuza (ES). Košt hetych prac składaje kala 10 młn jeŭra. 75% hetaj sumy Litva atrymlivaje z fondaŭ ES, inšaja častka finansujecca ź dziaržaŭnaha biudžetu.
Na pytańnie, ci skarociać takija previentyŭnyja miery patok kantrabandy i nielehalnaj mihracyi, načalnik pahransłužby zajaviŭ, što mahčymaści dla pravakacyj zastajucca, a kantrabandysty mianiajuć taktyku.
Pavodle jaho słoŭ, situacyja ź nielehalnaj mihracyjaj zastajecca napružanaj, ale bolš spryjalnaj, čym u susiednich krainach. Čakajucca mahčymyja pahrozy pravakacyj padčas samitu NATO, kali mihrantaŭ buduć skiroŭvać da miažy.
Ahulnaja praciahłaść miažy Litvy ź Biełaruśsiu składaje 679 kiłamietraŭ, ź jakich bolš za 100 kiłamietraŭ prachodziać pa bierahach rek i azior.
Na zimu zapłanavanyja masavyja zatrymańni, składzienyja «pieršy i druhi śpisy»12
Kamientary