Minsk nie humovy. Ułady daŭno prapanujuć minčukam prahramu raśsialeńnia, ale ciapier prapanovy zusim užo dziŭnyja

Što tam z haradami-spadarožnikami?

Temie haradoŭ-spadarožnikaŭ dla raśsialeńnia žycharoŭ Minska ŭžo niamała hadoŭ. Pačynali sa Smalavičaŭ, i da hetaha času jon ličycca hetkim pakazalnym, etałonnym horadam-spadarožnikam, kudy minčuki mahli b vyjechać žyć, a na pracu pryjazdžać kožny dzień u Minsk.

U kancy 2019 hoda Alaksandr Łukašenka padpisaŭ ukaz №466 «Ab budaŭnictvie žyłych damoŭ u haradach-spadarožnikach Minska».

Dakumient vyznačyŭ, što zaraz žyllo dla žycharoŭ Minska buduć uzvodzić taksama ŭ Dziaržynsku, Zasłaŭi, Łahojsku, Rudziensku i Fanipali.

Hod tamu mer Minska Uładzimir Kucharaŭ adznačyŭ pośpiechi ŭ asvajeńni Smalavičaŭ i skazaŭ, što nastupnym horadam, dzie razhorniecca maštabnaje budaŭnictva, stanie Rudziensk. 

A ŭ kancy maja Łukašenka zaćvierdziŭ novyja hienpłany haradoŭ-spadarožnikaŭ. Ciapier padychody źmianilisia.

Tak, Smalavičy pavinny pryraści bolš, čym płanavałasia raniej. Ciapier tam žyvie 20,5 tysiačy čałaviek, novym płanam praduhledžana 50 tysiač čałaviek suprać 30 tysiač pa hienpłanie-2015.

Krychu pryraście i Fanipal: ciapier tam 17,5 tysiačy, a płanujecca 29 tysiač čałaviek zamiest 23 tysiač pa raniejšym płanie.

A voś Rudziensk, naadvarot, zabudoŭvać buduć značna mienš. Kali ciapier tam žyvie 13,3 tysiačy čałaviek (razam z ułasnym horadam-spadarožnikam Družny), to novy płan praduhledžvaje davieści pakazčyk da 41 tysiačy, chacia raniej płanavałasia ažno 81 tysiača čałaviek.

Što prydumali ciapier?

Upraŭleńnie žyllovaj palityki Minharvykankama abnaviła pieralik «Prapanovy pa budaŭnictvie žylla ŭ nasielenych punktach z kolkaściu nasielnictva da 20 tysiač čałaviek, u jakich prapanujecca budaŭnictva kvater dla hramadzian, jakija stajać na ŭliku i majuć patrebu ŭ palapšeńni žyllovych umoŭ u administracyjach rajonaŭ h. Minska».

Heta značyć, tym žycharam stalicy, jakija ciapier žyvuć u ścisnutych umovach i stajać u čarzie na palapšeńnie hetych umoŭ, prapanujuć pabudavacca za miežami Minska. 

Novaŭviadzieńnie hetaha hoda — minčukam prapanujuć źjechać nie tolki ŭ novy horad, ale navat i ŭ inšuju vobłaść. Nikoli jašče žycharoŭ stalicy nie adpraŭlali ŭ Bresckuju vobłaść abo na Mahiloŭščynu na miažu z Rasijaj.

Prapanova pieršaja: horad Lachavičy, Bresckaja vobłaść

Tut minčukam prapanujuć piacipaviarchovik na try padjezdy na vulicy Južakova. Dom abiacajuć dabudavać da kastryčnika, tym, chto maje patrebu, vydzialajuć 37 kvater z 60. Pavodle dahavora dolevaha budaŭnictva abjektaŭ budučyja žychary hetaha doma buduć mieć dziaržaŭnuju padtrymku (heta značyć, ilhotny kredyt).

Płošča kvater ci chacia b kolkaść pakojaŭ čamuści nie raskryvajecca, viadoma tolki, što cana kvadratnaha mietra składzie 1764 rubli (588 dalaraŭ pa aficyjnym kursie) biez azdableńnia i 1949 rubloŭ (650 dalaraŭ) z azdableńniem. 

Kali ŭziać za asnovu typovuju minskuju panelku sieryi M-464 i kvateru-adnapakajoŭku ŭ joj płoščaj 37 kvadratnych mietraŭ, to atrymajecca, što tym minčukam, što pahodziacca źjechać u Lachavičy, kvatera z azdableńniem abydziecca prykładna ŭ 24 tysiačy dalaraŭ.

A što tam z transpartam? Ad MKAD da patrebnaj vulicy ŭ Lachavičach — 148 kiłamietraŭ, i ŭžo niekalki hadoŭ nie treba jechać praz Baranavičy, tamu što pabudavali abjezd. Dziaržaŭnyja aŭtobusy ź Minska ŭ Lachavičy nie chodziać. Jość adzin štodzionny ciahnik, jašče adzin pa piatnicach i jašče adzin pa asobnych dniach — kali pašancuje, atrymajecca try ciahniki na sutki. Samy chutki — u darozie 1 hadzinu 51 chvilinu, samy tanny płackart kaštuje 9 rubloŭ 98 kapiejek.

Prapanova druhaja: Klimavičy, Mahiloŭskaja vobłaść

Tut pa vulicy 50 hadoŭ SSSR prapanujecca adnapadjezdny piacipaviarchovik z adrasnym numaram 21V. Tut jość lift, a jašče «ŭvachodnyja dźviery mietaličnyja, unutrykvaternyja dźviery draŭlanyja, vokny z PVCH-profilu, terytoryja maje elemienty dobraŭparadkavańnia i azielanieńnia». Płoščy kvater znoŭ nie paznačanyja, viadoma tolki, što heta dvuchpakajovyja kvatery. Minčukam vydzialajuć dźvie kvatery, dom abiacajuć zdać u vieraśni.

Tut taksama prapanujecca dolevaje budaŭnictva ź dziaržpadtrymkaj, cana kvadratnaha mietra biez azdableńnia składzie 1902 rubli (634 dalary), a z azdableńniem — 2098 rubloŭ (699 dalaraŭ). Ahułam dvuchpakajoŭka typovaj minskaj płoščy 49 «kvadrataŭ» z azdableńniem abydziecca ŭ 34250 dalaraŭ.

A ci daloka da Klimavič? Pa pramoj — 283 kiłamietry, ale ž pa pramoj nie prajedzieš, a pa aŭtadarohach atrymlivajecca ŭžo 337 kiłamietraŭ. 

Maršrutka daviazie za 26-27 rubloŭ, čas u darozie — kala čatyroch hadzin. Jość i ciahniki. Samy chutki daviazie za šeść hadzin, i kaštuje jon ad 16 rubloŭ, a samy tanny abydziecca ŭ 11 rubloŭ, ale ŭ darozie budzie roŭna 10 hadzin.

A kudy jašče prapanoŭvali raśsialać žycharoŭ Minska?

Minułym letam Upraŭleńnie žyllovaj palityki Minharvykankama ŭžo prapanoŭvała minčukam, jakija majuć u hetym patrebu, źjechać u hłybinku i pabudavacca tam tańniej, čym u stalicy. Usiaho było prapanavana 20 varyjantaŭ, ź ich tolki dva — u haradach, dzie pražyvaje bolš za 20 tysiač čałaviek, va ŭsich astatnich žycharoŭ mienš. 

U Viciebskaj vobłaści prapanoŭvali 11 haradoŭ i pasiołkaŭ (Barań, Biešankovičy, Hłybokaje, Haradok, Dokšycy, Dubroŭna, Miory, Orša, Pastavy, Ušačy, Čašniki), u Minskaj — piać haradoŭ (Kleck, Krupki, Łahojsk, Miadzieł, Niaśviž).

Atrymlivajecca, minčukam prapanoŭvałasia źjechać daloka ad stalicy. Ale ciapierašnija Klimavičy — heta adnaznačny rekord.

Pavialičyć

Ahulnaja kolkaść kvater, jakija vydzielili dla minčukoŭ i raniej, i ciapier, nie pieravyšaje 950 štuk. Zdajecca, niamała. Ale kali ŭličyć, što pavodle danych na 1 studzienia 2023 hoda ŭ Minsku ŭ čarzie na palapšeńnie žyllovych umoŭ staić 179343 siamji, to atrymlivajecca, što ŭsio heta žyllo na vysiełkach składaje tolki 0,53 pracenta ad patrebnaha. Samo saboj, što tych, chto abiare varyjant pabudavacca ŭ hłybincy ź ilhotnym kredytam, zdymajuć z čarhi ŭ Minsku.

• 8
• 0
• 35
• 18
• 5
• 4
• 21
• 0