Rajonny šyk. Jak vyhladajuć i kolki kaštujuć samyja darahija kvatery ŭ rajonnych centrach
Pahladzieli, pa jakich cenach pradajuć samyja darahija kvatery ŭ piaci najbujniejšych rajonnych centrach Biełarusi.
Babrujsk. «Kvadrat» pa $2240
Pa apošnich źviestkach, u Babrujsku pražyvaje bolš za 208 tysiač čałaviek, što robić jaho samym bujnym pa nasielnictvie rajonnym centram Biełarusi i adzinym z nasielnictvam bolš za 200 tysiač.
Samuju darahuju z kvater, vystaŭlenych na prodaž u Babrujsku, acanili ŭ 130 tysiač dalaraŭ, heta kala 2240 dalaraŭ za «kvadrat».
Stolki prosiać za dvuchpakajovuju kvateru sa śviežym sučasnym ramontam. Jana całkam meblavanaja, u spalnym pakoi jość kandycyjanier. Kvatera znachodzicca pa adrasie vuł. Horkaha na 15-m paviersie 19-paviarchovika 2020 hoda pabudovy.
Ahulnaja płošča kvatery składaje 58 m², žyłaja — 33.
Kvatera z saŭnaj
Dźvie kvatery ŭ Babrujsku acanili ŭ 89 000 dalaraŭ.
Adna ź ich — piacipakajoŭka z saŭnaj. Ahulnaja płošča kvatery — 126 m². Z ulikam vialikaj płoščy atrymlivajecca pa $706 za mietr. Hetaja kvatera znachodzicca na 8-m paviersie 9-paviarchovaha doma 1984 hoda pabudovy.
U kvatery dva sanvuzły, u adnym ź jakich mieścicca saŭna. U vialikaj haścioŭni jość kamin.
Pradaviec apisvaje kvateru jak unikalnaje miesca, jakoje moža stać idealnym domam dla tych, chto šukaje niešta asablivaje.
«Unikalnaja kvatera z ubudavanaj saŭnaj i raskošnym interjeram — heta miesca, dzie raskoša i kamfort źlivajucca razam. Kvatera maje nie tolki adno z samych prastornych žyłych pamiaškańniaŭ u horadzie, ale i ŭłasnuju saŭnu, dziakujučy jakoj vy zmožacie atrymlivać asałodu ad pryjemnych pracedur u lubuju paru hoda», — havorycca ŭ apisańni.
Baranavičy. No photo
U Baranavičach pražyvaje 172 150 čałaviek. Samaja darahaja kvatera ŭ hetym rajcentry pradajecca za 90 tysiač dalaraŭ. Stolki prosiać za trochpakajoŭku na 89 «kvadrataŭ». Heta krychu bolš za 1000 dalaraŭ za mietr. U kvatery try pakoi płoščaj kala 17 m² i kuchnia na 15,9 m².
Nastupnuju pa canie kvateru z vystaŭlenych na prodaž u Baranavičach acanili ŭ 87 tysiač ($809 za m²). Heta ŭžo čatyrochpakajoŭka z ahulnaj płoščaj 107,6 m². Samy vialiki pakoj maje płošču 34 m².
Jak vyhladajuć samyja darahija kvatery Baranavič znutry — nieviadoma. U abjavach možna ŭbačyć tolki zdymki z płanam pamiaškańniaŭ.
Barysaŭ. Dva pavierchi i 240 «kvadrataŭ»
Treciaje miesca pa kolkaści nasielnictva siarod rajcentraŭ zajmaje Barysaŭ, tam, zhodna z apošnimi danymi, pražyvaje 136 409 čałaviek.
Samaja darahaja kvatera ŭ Barysavie pradajecca za 95 tysiač dalaraŭ. Dvuchuzroŭnievaja trochpakajoŭka maje ahulnuju płošču ŭ 240 m², žyłuju — 145,9 m². Kali pieraličyć košt na kvadratny mietr, atrymlivajecca ŭsiaho kala $396 za m². Taksama ŭ kvatery vielizarnaja kuchnia pamieram bolš za 30 «kvadrataŭ».
Žytło zajmaje dva pavierchi z troch doma 2007 hoda pabudovy. Kali mierkavać pa fota, ramont u domie apošni raz rabili adrazu paśla zdačy doma ŭ ekspłuatacyju.
«Dva sanvuzły, dźvie zašklonyja łodžyi, padłoha z padahrevam. Kvatera znachodzicca ŭ cichim rajonie z raźvitoj infrastrukturaj. Vydatnaje transpartnaje złučeńnie», — havorycca ŭ apisańni da abjekta.
«Šykoŭna i prastorna»
Nastupnaja pa darahoŭli kvatera ŭ samym bujnym rajcentry Minskaj vobłaści vystaŭlenaja za 79 tysiač dalaraŭ.
Ahulnaja płošča hetaj trochpakajoŭki składaje 90 m², žyłaja — 52 m². Kuchnia — 12,7 m². Dom dzieviacipaviarchovy, pabudavany z cehły. Sama kvatera znachodzicca na 5-m paviersie. Pradaviec čamuści vyrašyŭ padkreślić, što kvatera znachodzicca niepasredna na siarednim paviersie. Samo žytło apisvajecca jak šykoŭnaje i prastornaje.
Praŭda, ramont u kvatery daloka nie samy sučasny. Naprykład, na stoli ŭ vannym pakoi možna ŭbačyć kasietony.
Pinsk. 150 tysiač dalaraŭ za kvateru ŭ centry
U stalicy biełaruskaha Paleśsia, pa apošnich źviestkach, pražyvaje krychu bolš za 124 tysiačy čałaviek.
Samaja darahaja kvatera ŭ hetym horadzie pradajecca za 150 tysiač dalaraŭ. Stolki prosiać za dvuchuzroŭnievuju čatyrochpakajoŭku ahulnaj płoščaj pad 140 «kvadrataŭ».
Druhi pavierch u hetaj kvatery mansardavaha typu. Sam dom 2001 hoda pabudovy znachodzicca ŭ centry horada pa adrasie vuł. Mickieviča, 3. U kvatery zrobleny sučasny ramont, u pamiaškańniach majucca kandycyjaniery.
Kvatera dla hłybokaha snu
Nastupnaja pa darahoŭli kvatera ŭ Pinsku kaštuje ŭ dva razy mieniej. Za 77 tysiač dalaraŭ u hetym horadzie pradajecca trochpakajoŭka z ahulnaj płoščaj 76,4 m².
Siarod inšaha ŭ apisańni da abjekta paznačyli, što ŭ spalnym pakoi jość rułonnyja štory błekaŭt dla hłybokaha snu.
Mazyr. Trochpakajoŭka z čyrvonaj kuchniaj
Zamykaje piaciorku lidaraŭ pa kolkaści nasielnictva siarod rajonnych centraŭ horad Mazyr. U im, pa apošnich danych, pražyvaje 105,3 tysiačy čałaviek.
Samaja darahaja kvatera tam pradajecca za 72 tysiačy dalaraŭ. Stolki prosiać za trochpakajovuju kvateru płoščaj 78 m². Kvatera — na druhim paviersie 11-paviarchovaha doma 2015 hoda pabudovy.
«U kvatery vykanany sučasny i jakasny ramont. Zastajecca ŭbudavanaja kuchnia, varačnaja panel, pasudamyječnaja mašyna, chaładzilnik», — havorycca ŭ apisańni.
Ale acanić pa abjavie interjery samaj darahoj z vystaŭlenych na prodaž kvater u Mazyry davoli składana. Pradaviec vykłaŭ tolki zdymki kuchni, vannaha pakoja i kalidora.
Mahčymy vyvad u niežyły fond
Nastupnaja pa darahoŭli kvatera ŭ Mazyry pradajecca ŭsiaho na 2 tysiačy dalaraŭ tańniej. Roŭna ŭ 70 tysiač «viečna zialonych» acanili čatyrochpakajoŭku płoščaj 74 m².
Acanić, jak vyhladaje hetaje žytło, pa abjavie zusim niemahčyma, bo siarod zdymkaŭ jość tolki vyjava z płanam pamiaškańniaŭ.
U apisańni da abjekta paznačana tolki toje, što kvatera maje zručnaje miescaznachodžańnie. Aproč hetaha, adznačajecca mahčymaść vyvadu pamiaškańnia ŭ niežyły fond. Sama kvatera znachodzicca na pieršym paviersie.
Jaŭhien Dudkin patłumačyŭ, čamu staŭ sakretnym ahientam KDB12
Kamientary
tichanouskajetieniestajł
biarycia nie hladia, mužyki)