Arcybiskup Hudžeroci — da viernikaŭ u Budsłavie: Ja ŭžo niemałady, ja pryvitaju vas u Rai pa-biełarusku
30 červienia pierad Imšoj dla pilihrymaŭ da ŭdzielnikaŭ Budsłaŭskaha festu źviarnuŭsia prefiekt Dykasteryi pa spravach Uschodnich kaściołaŭ arcybiskup Kłaŭdya Hudžeroci.
Papa Francišak pryznačyŭ jaho svaim śpiecyjalnym pasłańnikam na ŭračystaściach u Budsłavie z nahody 25-hodździa z času karanacyi cudadziejnaha abraza Apiakunki Biełarusi, jak nahadvaje Catholic.by.
Pierad hetym vysoki vatykanski ijerarch pieški ŭvajšoŭ u Budsłaŭ razam z hrupaj pilihrymaŭ. Pry palavym ałtary jaho pryvitaŭ staršynia Kanfierencyi katalickich biskupaŭ u Biełarusi biskup Viciebski Aleh Butkievič i paprasiŭ źviarnucca da prysutnych sa słovam.
Arcybiskup Hudžeroci pačaŭ svaju pramovu pa-rusku, što vyklikała vialiki entuzijazm udzielnikaŭ. Ale, zaŭvažyŭšy, što katoliki razmaŭlajuć pa-biełarusku, praciahnuŭ pa-italjansku ź pierakładam na biełaruskuju movu.
«Daražeńkija, Papa zrabiŭ mnie vielmi cudoŭny padarunak. Jon pasłaŭ mianie siudy jašče raz paśla taho, jak ja ŭžo byŭ z vami čatyry hady raniej. Jon skazaŭ mnie, što ja pavinien pradstaŭlać jaho takim čynam, jak byccam jon sam prysutny tut siarod vas. Ja pavinien zazirnuć vam u vočy, pahladzieć, jak vy moliciesia, a potym viarnucca i raskazać Papu, jaki mianie čakaje i žadaje heta viedać. Tamu ja pavinien być vielmi ŭvažlivym da ŭsiaho taho, što my budziem razam z vami pieražyvać.
A vy viedajecie, čamu Papu tak cikava daviedacca pra vas? Bo vy nadzvyčaj pryhožy narod! I tamu što Papa vas vielmi-vielmi mocna lubić! Jon viedaje historyju vašaha naroda; usio, što vam daviałosia pieražyć, usie vašy ciažary; i choča skazać vam: «Ja z vami!»
I jašče jon choča, kab ja razam z vami ŭklenčyŭ pierad našaj Maci Božaj Budsłaŭskaj. Bo tut vy majecie skarb, jaki viedajuć va ŭsim śviecie, jaki lubiać va ŭsim śviecie, jaki jon chacieŭ by ŭbačyć ułasnymi vačyma, jak my jaho bačym, ale nie moža.
I jość taksama šmat tych, jakija mnie napisali: «Pamaliciesia da Maci Božaj za mianie», bo jany nie mohuć siońnia tut prysutničać. Tamu pryvitajem vopleskami ŭsich tych, jakija čakajuć ad vas, kab vy stali vyrazam toj malitvy, jakuju jany ŭznosiać zdalok.
Mianie supravadžaŭ siudy Apostalski nuncyj, Jaho Ekscelencyja monsińjor Ante Jozič.
My razmaŭlali ź im pa telefonie šmat hadzin, i mnie zdajecca, što navat telefon nie vytrymaŭ. A viedajecie, čamu my tak šmat havaryli? Kab zrabić tak, kab hetaje cudoŭnaje śviata atrymałasia jak maha pryhažejšym i kab vy byli ščaślivymi.
Ja dziakuju vam za takoje pryhožaje śviedčańnie, jakoje vy dali vašym pilihrymavańniem. Viedajecie, što takoje pilihrymka? Pilihrymka — heta naša žyćcio. Jana raspačynajecca, kali my naradžajemsia, i zaviaršajecca, kali pamirajem. Časam my padajem, ale ž padymajemsia. A ŭ kancy darohi viedajecie, chto nas čakaje? Maci Božaja, Maci Božaja Budsłaŭskaja, z raskrytymi abdymkami, jakaja vytra ślozy kožnamu z vas i zapalić na vašych tvarach uśmieški. Jana skaža vam: «Vitaju vas u Domie Ajca! Vy prychodzicie z błahasłaŭlonaj ziamli: uvajdzicie ž na błahasłaŭlonuju ziamlu Raju».
Pakolki ja ŭžo niemałady, ja budu čakać vas razam z Maci Božaj i pryvitaju vas pa-biełarusku ŭ Rai razam z Maci Božaj.
Ciapier nastaŭ momant viery. Nastaŭ momant, kali treba ŭvajści ŭsiaredzinu, kab pačało pramaŭlać serca. Ciapier nastaŭ momant, kali Pan daje nam svajo Cieła i svaju Kroŭ. Možacie ŭjavić sabie štości nastolki vialikaje?.. Jezus tut, z vami. Ad adnoj dumki pra heta možna ad chvalavańnia pavalicca na ziamlu.
Tamu ciapier moj čas skončyŭsia i raspačynajecca čas Boha. Staršynia vašaj Kanfierencyi Katalickich Biskupaŭ u Biełarusi ŭznačalić razam sa svaimi sabratami hetuju ŭračystuju liturhičnuju celebracyju i ŭdzielić vam błahasłaŭleńnie hetaha błahasłaŭlonaha Kaścioła, jaki žyvie na hetaj ziamli i jakim jość vy.
Vy — Kaścioł. Vy — Cieła Chrysta. Kožny z vas — čaścinka Cieła Chrysta. I, jak kaža śviaty Aŭhustyn, nieŭzabavie atrymajecie toje, čym vy jość.
Pamaliciesia taksama za Papu, jaki ŭžo nie zusim małady, ale jaki siabie adčuvaje vielmi maładym.
I časam nam davodzicca jaho strymlivać, bo inakš jon zanadta ruchavy. Jon nikoli nie choča adpačyvać, jak i vy, choć stamilisia, kali išli siudy. Ubačymsia zaŭtra na Imšy a 11-j hadzinie. Dobraha viečara, dobraj nočy malitvy, i ja daručaju vas u poŭnyja lubovi ruki našaj niabiesnaj Matuli. Chvała Chrystu!» — skazaŭ arcybiskup Kłaŭdya Hudžeroci.
***
Kłaŭdya Hudžeroci prybyŭ u Biełaruś 28 červienia. Jaho Papa delehavaŭ na ŭračystaści ŭ Budsłaŭ z nahody 25-hodździa karanacyi cudadziejnaha abraza Maci Božaj Budsłaŭskaj, jakija adznačajucca 30 červienia i 1 lipienia.
67-hadovy vatykanski ijerarch dobra viadomy biełaruskim viernikam, bo z 2011 pa 2015 hod byŭ apostalskim nuncyjem u našaj krainie. U toj čas jon nieadnarazova braŭ udzieł u Budsłaŭskim feście. Taksama Kłaŭdya Hudžeroci spryčyniŭsia da viartańnia ŭ krainu Tadevuša Kandrusieviča, jakoha ŭłady ŭ 2020 hodzie nie puskali nazad.
Nuncyj Hudžeroci nieadnarazova maliŭsia na Dziady ŭ Kurapatach, a kali byŭ nuncyjem u Vialikabrytanii, pieryjadyčna naviedvaŭ Biełaruskuju biblijateku imia Skaryny ŭ Łondanie.
Izrail zabiŭ kiraŭnika «Chiezbały» Chasana Nasrału3
Kamientary