Ambasadar Chuterer: Niemcy i biełarusy siońnia blizkija adno adnamu jak, mahčyma, nikoli za ŭsiu historyju
Pasoł Hiermanii ŭ Biełarusi Manfred Chuterer u svaim raźvitalnym intervju, raźmieščanym u jutub-kanale pasolstva, padzialiŭsia ŭražańniami ad krainy i jaje žycharoŭ, a taksama raskazaŭ pra pierśpiektyvy niamieckaha dyppradstaŭnictva ŭ Biełarusi.
Pra vyniki čatyrochhadovaj pracy
Manfred Chuterer adznačyŭ, što, jak dypłamat, jon pieražyŭ usie ŭźloty i padzieńni hiermana-biełaruskich adnosin.
«Kali letam 2019 hoda ja prybyŭ u Biełaruś u jakaści pasła, naša adnosiny znachodzilisia na vidavočnym uzdymie. Mižčałaviečyja, ekanamičnyja, a taksama ažyvajučyja palityčnyja kantakty pamiž Hiermanijaj i Biełaruśsiu stanavilisia ŭsio bolš ciesnymi. Pradstaŭniki hramadzianskaj supolnaści i dziełavych kołaŭ raźvivali ŭzajemavyhadnaje transpamiežnaje supracoŭnictva.
Na žal, hety rastučy trend z 2020 hoda pieratvaryŭsia ŭ svaju supraćlehłaść u vyniku masavych represij biełaruskich uładaŭ suprać ułasnych hramadzian i hłybokaha ŭciahvańnia biełaruskaha kiraŭnictva ŭ zachopnickuju vajnu Rasii suprać Ukrainy. Siońnia my znachodzimsia ŭ najnižejšym punkcie hiermana-biełaruskich adnosin», — zaŭvažaje pasoł Hiermanii.
Marcin Chuterer adznačyŭ, što ŭ takija vyklučna ciažkija časy dla jaho jak pasła važna było zachavać u hiermana-biełaruskich adnosinach toje, što jašče možna było zachavać. Dla jaho byŭ vielmi balučym fakt vymušanaha spynieńnia dziejnaści ŭ Biełarusi Instytuta imia Hiote i Hiermanskaj słužby akademičnych abmienaŭ, a taksama likvidacyja šmatlikich biełaruskich arhanizacyj, ź jakimi pasolstva supracoŭničała na praciahu šmat hadoŭ.
«Pakul udałosia praduchilić inšyja niepapraŭnyja biedy dla niamiecka-biełaruskich adnosinaŭ. U tym liku dziakujučy dypłamatyčnaj prysutnaści Hiermanii ŭ Biełarusi, usio jašče mahčymyja kantakty ŭ roznych formach. Niemcy i biełarusy siońnia blizkija adzin adnomu jak, mahčyma, nikoli za ŭsiu historyju, niahledziačy na hłyboki palityčny razłom», — miarkuje pasoł Hiermanii ŭ Biełarusi.
Pa słovach Chuterera, jak svaju vielmi asabistuju zadaču jon usprymaŭ zachavańnie i raźvićcio histaryčnaha daru prymireńnia pamiž niemcami i biełarusami.
«My, niemcy, zaŭsiody budziem šanavać pamiać achviaraŭ varvarskich złačynstvaŭ, jakija nie padlahajuć prabačeńniu, nacysckaj Hiermanii ŭ Biełarusi, jakija ŭviekaviečanyja ŭ Chatyni, Małym Traściancy, Krasnym Bierazie, Azaryčach i minskaj Jamie. Hetyja i inšyja miescy pamiaci ja časta naviedvaŭ», — adznačyŭ pasoł.
Pra partnioraŭ, jakija ŭ źniavoleńni ci vyhnańni
Pa słovach pasła, Hiermanija nie zabudzie palityčnych źniavolenych u Biełarusi. «Paŭtary tysiačy biełarusaŭ i biełarusak niezakonna znachodziacca ŭ źniavoleńni tolki tamu, što jany mirna vystupali za svaje pravy i za vykanańnie ŭniviersalnych kaštoŭnaściej. Fiederalny ŭrad Hiermanii i Jeŭrapiejski Sajuz patrabujuć vyzvaleńnia ŭsich palityčnych źniavolenych u Biełarusi.
Tolki dyjałoh, nakiravany na prymireńnie pamiž uładaju i hramadzianskaj supolnaściu, jaki viadzie da novych svabodnych i sumlennych vybaraŭ, moža aznačać novy šlach upierad»,
— adznačaje Manfred Chuterer. Na jaho dumku, taki krok zmoh by ŭmacavać suvierenitet Biełarusi jak va ŭnutranaj, tak i ŭ źniešniaj palitycy.
«Mnie vielmi baluča, što ja nie zdoleŭ asabista raźvitacca šmat ź jakim z partnioraŭ pasolstva Hiermanii ŭ Minsku», — padkreśliŭ Marcin Chuterer i adznačyŭ Maryju Kaleśnikavu i Alesia Bialackaha jak pradstaŭnikoŭ niezakonna źniavolenych biełarusaŭ.
«Maryja Kaleśnikava zaŭsiody vystupała za dyjałoh i niehvałtoŭnyja mietady. U značnaj miery dziakujučy joj pratesty letam 2020-ha hoda nasili mirny charaktar», — adznačyŭ pasoł.
Marcin Chuterer nahadaŭ, što pasolstva Hiermanii ŭ Minsku na praciahu šmat hadoŭ u svajoj pracy ŭ śfiery pravoŭ čałavieka padtrymlivała ciesnyja kantakty ź Bialackim i pravaabarončym centram «Viasna». A za baraćbu za demakratyju i pravy čałavieka ŭ Biełarusi, jakaja na praciahu dziesiacihodździaŭ pravodziłasia ŭ Biełarusi, Aleś Bialacki niekalki miesiacaŭ nazad byŭ udastojeny Nobieleŭskaj premii miru.
«Mienavita za hetuju dziejnaść u intaresach demakratyi i pravoŭ čałavieka Aleś Bialacki znachodzicca ŭ Biełarusi ŭ źniavoleńni. Maryja Kaleśnikava i Aleś Bialacki dziejničali z patryjatyčnych matyvaŭ», — vykazaŭ svaju pazicyju pasoł Hiermanii.
Vajna Rasii suprać Ukrainy i pierśpiektyvy jaje zakančeńnia
Manfred Chuterer vykazaŭ pazicyju svajoj krainy, jakaja zaklučajecca ŭ dapamozie Ukrainie ŭ abaronie jaje terytaryjalnaj cełasnaści ad rasijskaha ahresaru.
«Hiermanija praciahnie padtrymku samaabaronu Ukrainy stolki, kolki heta budzie nieabchodna. Nie moža być biaśpiečnaj Jeŭropy, kali biaśpieka i niezaležnaść Ukrainy pad pahrozaju. Miesca Ukrainy — u Jeŭropie, i jaje budučynia — u Jeŭrapiejskim sajuzie», — adznačyŭ Pasoł.
Pa jaho słovach, napad Rasii na susiedniuju Ukrainu ŭ parušeńnie mižnarodnaha prava ŭspryniali jak ciažki ŭdar navat tyja, chto prytrymlivaŭsia mierkavańnia, što Rasija, jak i lubaja inšaja dziaržava, maje zakonnyja intaresy ŭ śfiery biaśpieki, i ich nieabchodna ŭličvać.
«Rasija raźviazała zachopnickuju vajnu. Hetaja vajna nieadkładna skončycca, jak tolki Rasija vyviedzie svaje vojski z Ukrainy. I ciapier nieabchodna, kab heta adbyłosia. Heta adkryła b šlach da pieramovaŭ, u vyniku jakich moh by być adnoŭleny mir i zabiaśpiečana biaśpieka na jeŭrapiejskim kantyniencie na doŭhija hady.
U situacyi, jakaja skłałasia, kali tak składana admovicca ad łohiki vajennaj kanfrantacyi, važnym było b raspracavać bačańnie, jak možna zaviaršyć vajnu i adnavić biaśpieku na ŭsim jeŭrapiejskim kantyniencie. Heta pavinna było b stać zadačaj analitykaŭ i ekśpiertaŭ, jakija vałodajuć śpiecyfikaj rehijona. Nam nieabchodny zahadzia raspracavanyja hatovyja kancepcyi dla taho času, kali vajna sapraŭdy skončycca», — adznačaje Manfred Chuterer.
Na dumku pasła, Biełaruś mahła b adyhrać vielmi važnuju rolu ŭ jeŭrapiejskaj struktury biaśpieki, navat va ŭstanaŭleńni hłabalnaha miru ŭ cełym. Heta vyciakaje z adnaho tolki hieahrafičnaha stanovišča krainy ŭ centry Jeŭropy.
Jakija ŭražańni ab biełarusach
Pasoł Hiermanii adznačyŭ, što ŭ jaho zastanucca samyja lepšyja ŭspaminy pra biełarusaŭ. Jon padkreśliŭ, što za tryccać hadoŭ svajoj dypłamatyčnaj słužby jaho nidzie nie prymali z takoju haścinnaściu, jak Biełarusi. I nidzie jon nie adčuvaŭ siabie tak utulna, jak u našaj krainie siarod biełarusaŭ i biełarusak.
Jon zapeŭniŭ, što jaho sustrečy z «takimi adkrytymi, sardečnymi i vielikadušnymi ludźmi ŭ Biełarusi» zastanucca ŭ ciopłych uspaminach na ŭsio žyćcio.
Manfred Chuterer padzialiŭsia adnym uspaminam, jakoje dla jaho, čałavieka, jaki vyras u kole moładzievych arhanizacyj katalickaj carkvy, maje asablivaje značeńnie. Heta pałomnictva da kaściołu Uniebaŭziaćcia Najśviaciejšaj Dzievy Maryi ŭ Budsłavie. «Hety čaroŭny letni dzień u minułym hodzie ja nie zabudu nikoli», — adznačaje Pasoł.
Pa słovach Chuterera, kali, niahledziačy na hłybokuju palityčnuju prorvu, jakaja siońnia isnuje, niešta ŭsialaje nadzieju na lepšuju budučyniu hiermana-biełaruskich adnosin, i adnosiny Biełarusi z astatniaju Jeŭropaju, to heta ludzi Biełarusi.
«Biełaruś nie tolki znachodzicca ŭ centry Jeŭropy, jaje ludzi myślać i adčuvajuć pa-jeŭrapiejsku. Ja ŭsprymaju ludziej Biełarusi jak najlepšuju častku Jeŭropy», — ličyć pasoł.
Što budzie paśla adjezdu pasła ź Minska
Manfred Chuterer raspavioŭ, što ciapier u Jeŭrapiejskim Sajuzie dasiahnuty kansensus nie nakiroŭvać u Minsk novych pasłoŭ. Zamiest hetaha ŭstanaviłasia pracedura pryznačeńnia časovych pavieranych. Hetaha budzie prytrymlivacca i Hiermanija.
Pasoł adznačyŭ, što Biełaruś mahła b być dla Hiermanii, ES i mižnarodnaj supolnaści partnioram u samym sercy Jeŭropy. jaki hłyboka šanujecca. Jon nazvaŭ takija napramki supracoŭnictva, jak abarona klimatu i ŭstojlivaje raźvićcio, mižnarodnaja palityka ŭ halinie achovy zdaroŭja, adnaŭleńnie razburanaj Rasijaj jeŭrapiejskaj sistemy biaśpieki.
«Dla rašeńnia kožnaj z hetych centralnych zadač abaviazkova patrabujecca transpamiežnaje supracoŭnictva. Na žal, u ciapierašni momant my vielmi dalokija ad takoha ŭzajemadziejańnia.
Hiermaniju i jaje jeŭrapiejskich i transatłantyčnych partnioraŭ abjadnoŭvaje z usimi biełarusami zacikaŭlenaść u svabodnaj, suvierennaj, demakratyčnaj, praćvitajučaj Biełarusi, jakuju pavažaje mižnarodnaja supolnaść, zacikaŭlenaść u dziaržavie Biełaruś, jakaja padtrymlivaje mirnyja, kanstruktyŭnyja adnosiny sa svaimi susiedziami.
Za hetuju zacikaŭlenaść Hiermanija i budzie ŭ dalejšym usimi siłami vystupać praz svajo dypłamatyčnaje pradstaŭnictva», — zapeŭniŭ u kancy svajho raźvitalnaha intervju pasoł Hiermanii ŭ Biełarusi.
Čytajcie jašče:
Niamiecki pasoł na sustrečy ŭ biełaruskim MZS zapatrabavaŭ vyzvalić palitviaźniaŭ i spynić represii
Rabotnikam Centra alimpijskaj padrychtoŭki pa frystajle zabaranili iści na pachavańnie Mikałaja Kazieki15
Rabotnikam Centra alimpijskaj padrychtoŭki pa frystajle zabaranili iści na pachavańnie Mikałaja Kazieki
U Biełarusi zaćvierdzili praviły evakuacyi kaštoŭnaściaŭ na vypadak vajny: cehłu z Bresckaj krepaści z nadpisami buduć ratavać pierš za karciny Šahała i Sucina1515
Kamientary