Chronika represij i supracivu

Haładoŭka ŭ Bieraści

1 žniŭnia bieraściejskaja taksistka Luboŭ Razanovič abvieściła suchuju haładoŭku. Nahadajem, što taksisty patrabujuć, kab ź ich nie spahaniali zadniaj dataj padatak na ŭvoz aŭtamabilaŭ. Haładoŭniki źviarnulisia z adkrytym listom da Łukašenki. 7 žniŭnia haładoŭniki zajavili pra namier zaviaršyć akcyju.

31 lipienia

U Mahilovie zatrymali Ŭładzimiera Navasiada z paplečnikami, jakija jechali na sustreču z moładzievymi aktyvistami HA «Hramadzianski forum». Ich spynili na padjeździe da horadu, pierasadzili ŭ inšy transpart, zavieźli ŭ Leninski rajadździeł, dzie raspytvali, chto jany, kudy jeduć i ź jakoj metaj. Adpuścili tolki paśla taho, jak mienčuki zajavili, što nia majuć namieru ŭdzielničać u vuličnych akcyjach i što siarod ich niama zamiežnikaŭ.

Pry kancy lipienia ŭ psychijatryčnuju bolnicu «Navinki» trapiła Kaciaryna Sadoŭskaja: supracoŭnik KDB zabraŭ jaje prosta z domu. Jaje muž ličyć, što heta palityčna matyvavanaja sprava, vyklikanaja pravaabarončaj dziejnaściu žonki.

1 žniŭnia

Prakuror Zelvienskaha rajonu dapytaŭ baćku Jaŭhiena Skrabutana pa spravie «Maładoha frontu».

Hazecie PKB «Tovariŝ» viarnuli 100-tysiačny nakład pieradvybarnaha numaru. 4 žniŭnia maskoŭskaja drukarnia «TMK» admoviłasia drukavać vydańnie, bo «spyniaje svaju dziejnaść na niavyznačany termin u źviazku ź planavanym pierajezdam».

2 žniŭnia

Piaciora mahiloŭskich aktyvistaŭ padali skarhu na niezakonnyja dziejańni milicyjantaŭ abłasnomu prakuroru i načalniku abłasnoj upravy milicyi. Mahiloŭcaŭ zatrymali 27 lipienia: milicyjantam nie spadabalisia sakołki z vyjavaj AHP i bieł-čyrvona-biełyja pavietranyja baloniki ŭ aktyvistaŭ.

Minjust zapatrabavaŭ ad Partyi kamunistaŭ Biełaruskaj ciaham tydnia padać persanalnyja źviestki pa kolkasnym składzie strukturaŭ.

U Savieckim sudzie Homielu prajhrankaj skončyŭsia praces zvolnienaha kiroŭcy aŭtaparku Siarhieja Šviedava, aktyvista prafsajuzu REP, suprać kiraŭnictva pradpryjemstva. Sudździa pavieryŭ na słova śviedčańniam revizorak aŭtaparku, praihnaravaŭšy astatnich śviedkaŭ, u tym liku pasažyraŭ sprečnaha rejsu. Šviedaŭ adpracavaŭ u aŭtaparku 30 hadoŭ, jaho partret upryhožvaŭ Došku honaru.

3 žniŭnia

Dyrektar abutkovaj fabryki Viačasłaŭ Tumaščyk padaŭ u sud na baranavickuju niedziaržaŭnuju hazetu «Intex-press» za źniavahu honaru i hodnaści. Hazeta napisała, što na jaho raspačata prakuraturaj kryminalnaja sprava za złoŭžyvańnie ŭładaj i słužbovymi paŭnamoctvami. U sudzie infarmacyja paćvierdziłasia. Sudździa adkłaŭ spravu da 16 žniŭnia i vyklikaŭ suadkazčykami milicyjantaŭ.

4 žniŭnia

Eniru Branickuju i Alaksandra Šałajku asudzili na 6 miesiacaŭ turmy. Cimocha Drančuka – na 1 hod kalonii ahulnaha režymu, Mikołu Astrejku – na 2 hady. Advakaty Drančuka i Astrejki padrychtavali kasacyjnyja skarhi.

Na Mienščynie zatrymali ŭ letniku moładzievych aktyvistaŭ Paŭła Krasoŭskaha z Darjaj Pisarenkaj i Illu Šyłu. Milicyjanty zahadali zvaročvać letnik, bo spałochalisia, što pryjeduć zamiežniki – švedy.

5 žniŭnia

Na Jurasia Hubareviča ŭ Biarozaŭskim rajonie padčas pachodu «Ruch dobraj voli» skłali pratakoł za vykarystańnie niezarehistravanaj symboliki. Sud pačali adrazu ž, u vychadny dzień – subotu, ale aktyvist zapatrabavaŭ advakata, tamu praces pieranieśli na 8 žniŭnia.

Na ŭdzielnikaŭ pachodu skłali jašče dva pratakoły: za namiotavy haradok na terytoryi zakaźnika i za toje, što aŭtamabil padjechaŭ da vadajomu bližej, čym na 50 m.

Ź mienskaj turmy na Akreścina vypuścili rasiejku Kaciarynu Vinakuravu, asudžanuju za pikiet la rasiejskaj ambasady. Joj zabaranili ŭjezd u Biełaruś na 5 hadoŭ. Razam ź joj vypuścili biełarusa Viktara Simanoviča, udzielnika toj samaj akcyi.

6 žniŭnia

Na navukovuju kanferencyju, pryśviečanuju Kleckaj bitvie, nie puścili miascovych demakratyčnych aktyvistaŭ Siarhieja Panamarova, Časłavu Kniazievu, Pakłonskaha.

7 žniŭnia

Arturu Fińkieviču administracyja kalonii zabaraniła karystacca noŭtbukam i radyjoprymačom paśla zahadu ź Miensku. Ad chłopca patrabujuć, kab pakazaŭ dakumenty na techniku.

Siarhiej Alfier padaŭ u sud skarhu na mytnikaŭ aeraportu «Miensk-2»: 25 sakavika ŭ jaho kanfiskavali 80 dalaraŭ i 135 eŭra, zajaviŭšy, što jany falšyvyja. Aktyvist AHP patrabuje viarnuć jamu valutu. Sud pryznačany na 11 žniŭnia.

• 0
• 0
• 0
• 0
• 0
• 0
• 0
• 0