Ścipły fitnes-branzalet Cierciela i raskošnyja hadzińniki Baskava. Kolki kaštujuć lubimyja aksiesuary čynoŭnikaŭ
Razhledzieli hadzińniki čynoŭnikaŭ i padličyli, kolki siarednich zarobkaŭ daviadziecca addać zvyčajnamu biełarusu, kab kupić takija ž. Na niekatoryja z pazicyj pryjšłosia b zarablać amal dva hady, ale jość i ścipłyja dziaržsłužboŭcy.
Andrej Savinych i hadzińnik ad Franck Muller
U rozny čas Andrej Savinych zajmaŭ pasady sakratara pry ambasadzie ŭ Niderłandach, namieśnika pastajannaha pradstaŭnika Biełarusi pry adździaleńni AAN u Ženievie, byŭ pasłom Biełarusi ŭ Turcyi i Iraku, a ciapier pracuje ŭ ajčynnym parłamiencie. Savinych dobra adukavany: skončyŭ Minski dziaržaŭny linhvistyčny ŭniviersitet, a paźniej atrymaŭ dypłom Brytanskaha instytuta siertyfikavanych mieniedžaraŭ u śfiery finansavaha mieniedžmientu i analizu, taksama jon vałodaje dźviuma movami: anhlijskaj i francuzskaj.
Andrej Savinych sočyć za pasadkaj kaściumaŭ i razbaŭlaje kansiervatyŭnyja vobrazy roznakalarovymi halštukami.
Palityk aktyŭna viadzie staronki ŭ sacyjalnych sietkach. Na adnoj z fatahrafij my i zaŭvažyli luksavy hadzińnik madeli Cintrée Curvex Classic z 18-karatnaha zołata ad šviejcarskaha brenda FRANCK MULLER.
Siońnia taki kaštuje 9450 jeŭra. Uličvajučy siaredni zarobak u «mocnaj i kvitniejučaj» — 1657 rubloŭ «čystymi», — kab nabyć taki aksiesuar, zvyčajnamu biełarusu spatrebiłasia b adkładać usie svaje hrošy ciaham paŭtara hoda.
Dźmitryj Baskaŭ i kalekcyja šviejcarskich hadzińnikaŭ
Imia byłoha hiendyrektara chakiejnaha kłuba «Dynama» časta zhadvałasia ŭ presie ŭ 2020 hodzie — paśla śmierci Ramana Bandarenki. Miarkujecca, što padčas kanfliktu, jaki pryvioŭ da trahiedyi, čynoŭnik znachodziŭsia na «Płoščy pieramien», što było vyjaŭlena pa bilinhu jaho telefona.
Baskava — ciapier sienatara — śmieła možna nazvać samym viadomym mietraseksuałam u čynoŭnickaj bracii Łukašenki. Palityk i biznesmien karektuje formu brovaŭ, sočyć za zaharam i nadaje vialikuju ŭvahu svajmu harderobu. Jon nosić brendavy abutak: naprykład, makasiny znakamitaha italjanskaha brenda Louis Vuitton koštam 805 jeŭra.
Kalekcyja hadzinnikaŭ palityka taksama ździŭlaje. U joj sustrakajecca madel Skeleton Chronograph z žoŭtaha zołata ad elitnaha šviejcarskaha brenda ChronoSwiss Opus.
Košt hetaha hadzińnika zaležyć ad hoda vypusku i varjirujecca ad 7 da 14,7 tysiačy jeŭra. Kali biełarus ź siarednim zarobkam vyrašyŭ by nabyć sabie taki, jamu spatrebiłasia b źbirać ad 14 miesiacaŭ da 2,5 hoda.
Jašče adzin šviejcarski hadzińnik Dźmitryja Baskava naležyć brendu Ulysse Nardin.
Madel Diver Chronograph — vierny kampańjon jachtsmienaŭ i amataraŭ dajvinhu — sa skuranoj papružkaj siońnia budzie kaštavać 11,5 tysiačy jeŭra, abo 23 siarednija zarobki.
Raman Hałoŭčanka i Huawei Watch 2 Classic
Premjer-ministr Biełarusi namahajecca nie vydzialacca z akružeńnia i imkniecca vyhladać jak maha praściej. Jon lubić šeryja kaściumy, pałasatyja kašuli i niajarkija halštuki.
Što da aksiesuaraŭ, to na niekatorych mierapryjemstvach Raman Hałoŭčanka źjaŭlajecca z prostym dla palityka takoha ŭzroŭniu smart-hadzińnikam Huawei Watch 2 Classic koštam kala 360 funtaŭ (heta 465 dalaraŭ).
Andrej Chmiel i Huawei Watch 2 Classic
Takuju ž madel, jak u Hałoŭčanki, my zaŭvažyli i ŭ novaha mera Hrodna (byłoha ministra žyllova-kamunalnaj haspadarki) Andreja Chmiela — jon taksama namahajecca nie adstavać ad techničnaha prahresu i addaje pieravahu kitajskamu hadžetu.
Ivan Cierciel i fitnes-branzalet Xiaomi
Kiraŭnik KDB Ivan Cierciel addaje pieravahu fitnes-branzaletu brenda Xiaomi.
Kaštujuć takija amal 50 jeŭra — i heta samy biudžetny aksiesuar u našaj padborcy. Kupić taki moža luby biełarus ź siarednim prybytkam.
Juryj Karajeŭ i «Łuč»
Try hady tamu Juryj Karajeŭ źmianiŭ milicejskuju formu na cyvilnuju. U svaim novym žyćci eks-ministr unutranych spraŭ i ciapierašni inśpiektar pa Hrodzienskaj vobłaści nosić čornyja i ciomna-šeryja kaściumy. Zmročnyja vobrazy palityk razbaŭlaje čyrvonymi halštukami — mienavita ŭ ich jon źjaŭlajecca čaściej za ŭsio.
U adroźnieńnie ad kaleh, u vybary aksiesuaraŭ Juryj Karajeŭ addaje pieravahu ajčynnym brendam. Tak na ruce čynoŭnika bačny hadzinnik minskaha zavoda «Łuč» ź limitavanaj kalekcyi, pryśviečanaj 75-hodździu Pieramohi. U hetaj liniejcy try madeli — kožnaj vypuščana ŭsiaho pa 200 ekzemplaraŭ.
Dyzajn hetaha hadzińnika źviazany z histaryčnaj technikaj vajennych hadoŭ: tankam T-34, hruzavikom Studebaker US6 i źniščalnikam Supermarine Spitfire. Papružki dla jaho ŭručnuju vyrablali biełaruskija ramieśniki, a na zadnim viečku ź nieržaviejki možna razhledzieć piersanalny paradkavy numar.
Kaštuje taki hadzińnik 107 jeŭra, albo čverć ad siaredniaha zarobka — całkam padjomnaja suma dla prostaha hramadzianina.
Ihar Bryło i Samsung Galaxy Watch Active 2
Były ministr sielskaj haspadarki i ciapierašni pamahaty Łukašenki pa Viciebskaj vobłaści Ihar Bryło imkniecca vyhladać kreatyŭna, ale, vidavočna, pierabiraje z akcentnymi detalami. Samaja častaja pamyłka čynoŭnika — miks dvuch vidaŭ pałoski, jakija nie spałučajucca pamiž saboj.
Palityk dapaŭniaje svaje śmiełyja łuki ścipłym smart-hadzińnikam Samsung Galaxy Watch Active 2. Aktualny košt takoha 284 dalary, abo ŭsiaho tolki pałova siaredniaha zarobku.
Juryj Šulejka i «Adnastrełačnik»
Hubiernatar Bresckaj vobłaści Juryj Šulejka lubić pryntavanyja halštuki. U jaho kalekcyi možna sustreć aksiesuary ŭ indyjskija «ahurki», dalikatny harošak i rombik.
Ale ž u vybary hadzińnika palityk bolš strymany: u liku niamnohich, Šulejka nosić hadzińnik minskaha zavoda «Łuč». Na jaho ruce možna zaŭvažyć uniseks-madel z kalekcyi «Adnastrełačnik» koštam 122 jeŭra. Biełarus ź siarednim zarobkam zarobić na taki hadzińnik za niekalki tydniaŭ.
Daviedacca, kolki kaštujuć aksiesuary čynoŭnic i favarytak Łukašenki, možna ŭ jašče adnym našym materyjale.
Vy nie pavierycie, kim akazaŭsia «vypadkovy» bajanist na vakzale, jaki śpiavaŭ pra Łukašenku15
Kamientary