Сціплы фітнэс-бранзалет Церцеля і раскошныя гадзіннікі Баскава. Колькі каштуюць любімыя аксесуары чыноўнікаў
Разгледзелі гадзіннікі чыноўнікаў і падлічылі, колькі сярэдніх заробкаў давядзецца аддаць звычайнаму беларусу, каб купіць такія ж. На некаторыя з пазіцый прыйшлося б зарабляць амаль два гады, але ёсць і сціплыя дзяржслужбоўцы.
Андрэй Савіных і гадзіннік ад Franck Muller
У розны час Андрэй Савіных займаў пасады сакратара пры амбасадзе ў Нідэрландах, намесніка пастаяннага прадстаўніка Беларусі пры аддзяленні ААН у Жэневе, быў паслом Беларусі ў Турцыі і Іраку, а цяпер працуе ў айчынным парламенце. Савіных добра адукаваны: скончыў Мінскі дзяржаўны лінгвістычны ўніверсітэт, а пазней атрымаў дыплом Брытанскага інстытута сертыфікаваных менеджараў у сферы фінансавага менеджменту і аналізу, таксама ён валодае дзвюма мовамі: англійскай і французскай.
Андрэй Савіных сочыць за пасадкай касцюмаў і разбаўляе кансерватыўныя вобразы рознакаляровымі гальштукамі.
![Андрей Савиных Андрэй Савіных](http://nashaniva.com/img/w732d4webp1/photos/z_2023_07/-nyn57.jpg.webp)
Палітык актыўна вядзе старонкі ў сацыяльных сетках. На адной з фатаграфій мы i заўважылі люксавы гадзіннік мадэлі Cintrée Curvex Classic з 18-каратнага золата ад швейцарскага брэнда FRANCK MULLER.
![Андрей Савиных Андрэй Савіных](http://nashaniva.com/img/w732d4webp1/photos/z_2023_07/-ae1xd.jpg.webp)
Сёння такі каштуе 9450 еўра. Улічваючы сярэдні заробак у «моцнай і квітнеючай» — 1657 рублёў «чыстымі», — каб набыць такі аксесуар, звычайнаму беларусу спатрэбілася б адкладаць усе свае грошы цягам паўтара года.
![FRANCK MULLER Франк Мюллер](http://nashaniva.com/img/w732d4webp1/photos/z_2023_07/-o59bi.jpg.webp)
Дзмітрый Баскаў і калекцыя швейцарскіх гадзіннікаў
Імя былога гендырэктара хакейнага клуба «Дынама» часта згадвалася ў прэсе ў 2020 годзе — пасля смерці Рамана Бандарэнкі. Мяркуецца, што падчас канфлікту, які прывёў да трагедыі, чыноўнік знаходзіўся на «Плошчы перамен», што было выяўлена па білінгу яго тэлефона.
![Дмитрий Басков Зміцер Баскаў](http://nashaniva.com/img/w732d4webp1/photos/z_2023_07/-bv49w.jpg.webp)
Баскава — цяпер сенатара — смела можна назваць самым вядомым метрасэксуалам у чыноўніцкай браціі Лукашэнкі. Палітык і бізнэсмен карэктуе форму броваў, сочыць за загарам і надае вялікую ўвагу свайму гардэробу. Ён носіць брэндавы абутак: напрыклад, макасіны знакамiтага італьянскага брэнда Louis Vuitton коштам 805 еўра.
![Зміцер Баскаў Дмитрий Басков](http://nashaniva.com/img/w732d4webp1/photos/z_2023_07/-2c85a.jpg.webp)
Калекцыя гадзiннiкаў палітыка таксама здзіўляе. У ёй сустракаецца мадэль Skeleton Chronograph з жоўтага золата ад элітнага швейцарскага брэнда ChronoSwiss Opus.
![Дмитрий Басков часы](http://nashaniva.com/img/w732d4webp1/photos/z_2023_07/-sb2g4.jpg.webp)
Кошт гэтага гадзінніка залежыць ад года выпуску і вар'іруецца ад 7 да 14,7 тысячы еўра. Калі беларус з сярэднім заробкам вырашыў бы набыць сабе такі, яму спатрэбілася б збіраць ад 14 месяцаў да 2,5 года.
![Chronoswiss Opus](http://nashaniva.com/img/w732d4webp1/photos/z_2023_07/-sp9j3.jpg.webp)
Яшчэ адзін швейцарскі гадзіннік Дзмітрыя Баскава належыць брэнду Ulysse Nardin.
![Ulysse Nardin](http://nashaniva.com/img/w732d4webp1/photos/z_2023_07/-4gxzk.jpg.webp)
Мадэль Diver Chronograph — верны кампаньён яхтсменаў і аматараў дайвінгу — са скураной папружкай сёння будзе каштаваць 11,5 тысячы еўра, або 23 сярэднія заробкі.
![Ulysse Nardin](http://nashaniva.com/img/w732d4webp1/photos/z_2023_07/2-3py0x.jpg.webp)
Раман Галоўчанка і Huawei Watch 2 Classic
Прэм'ер-міністр Беларусі намагаецца не выдзяляцца з акружэння і імкнецца выглядаць як мага прасцей. Ён любіць шэрыя касцюмы, паласатыя кашулі і няяркія гальштукі.
![Роман Головченко Раман Галоўчанка](http://nashaniva.com/img/w732d4webp1/photos/z_2023_07/-qcpr3.jpg.webp)
Што да аксесуараў, то на некаторых мерапрыемствах Раман Галоўчанка з'яўляецца з простым для палітыка такога ўзроўню смарт-гадзіннікам Huawei Watch 2 Classic коштам каля 360 фунтаў (гэта 465 даляраў).
![Huawei Watch 2 Classic](http://nashaniva.com/img/w732d4webp1/photos/z_2023_07/-qtf2q.jpg.webp)
Андрэй Хмель і Huawei Watch 2 Classic
Такую ж мадэль, як у Галоўчанкі, мы заўважылі і ў новага мэра Гродна (былога міністра жыллёва-камунальнай гаспадаркі) Андрэя Хмеля — ён таксама намагаецца не адставаць ад тэхнічнага прагрэсу i аддае перавагу кітайскаму гаджэту.
![Андрей Хмель Андрэй Хмель](http://nashaniva.com/img/w732d4webp1/photos/z_2023_07/mycollages27-lawbx.jpg.webp)
Іван Церцель і фітнэс-бранзалет Xiaomi
Кіраўнік КДБ Іван Церцель аддае перавагу фітнэс-бранзалету брэнда Xiaomi.
![Иван Тертель Іван Тэрцэль](http://nashaniva.com/img/w732d4webp1/photos/z_2023_07/mycollages141-lyr65.jpg.webp)
Каштуюць такія амаль 50 еўра — і гэта самы бюджэтны аксесуар у нашай падборцы. Купіць такі можа любы беларус з сярэднім прыбыткам.
![фітнес-бранзалет Xiaomi фитнес-браслет Сяоми](http://nashaniva.com/img/w732d4webp1/photos/z_2023_07/--q6487.jpg.webp)
Юрый Караеў і «Луч»
Тры гады таму Юрый Караеў змяніў міліцэйскую форму на цывільную. У сваім новым жыцці экс-міністр унутраных спраў і цяперашнi інспектар па Гродзенскай вобласці носіць чорныя і цёмна-шэрыя касцюмы. Змрочныя вобразы палітык разбаўляе чырвонымі гальштукамі — менавіта ў іх ён з'яўляецца часцей за ўсё.
![Юрий Караев Юры Караеў](http://nashaniva.com/img/w732d4webp1/photos/z_2023_07/-dodeo.jpg.webp)
У адрозненне ад калег, у выбары аксесуараў Юрый Караеў аддае перавагу айчынным брэндам. Так на руцэ чыноўніка бачны гадзіннiк мінскага завода «Луч» з лімітаванай калекцыі, прысвечанай 75-годдзю Перамогі. У гэтай лінейцы тры мадэлі — кожнай выпушчана ўсяго па 200 экзэмпляраў.
![Юры Караеў Юрий Караев часы](http://nashaniva.com/img/w732d4webp1/photos/z_2023_07/2-fbq85.jpg.webp)
Дызайн гэтага гадзінніка звязаны з гістарычнай тэхнікай ваенных гадоў: танкам T-34, грузавіком Studebaker US6 і знішчальнікам Supermarine Spitfire. Папружкі для яго ўручную выраблялі беларускiя рамеснікі, а на заднім вечку з нержавейкі можна разгледзець персанальны парадкавы нумар.
![Луч Т34](http://nashaniva.com/img/w732d4webp1/photos/z_2023_07/34-vkqte.jpg.webp)
Каштуе такi гадзіннік 107 еўра, альбо чвэрць ад сярэдняга заробка — цалкам пад'ёмная сума для простага грамадзяніна.
Ігар Брыло i Samsung Galaxy Watch Active 2
Былы міністр сельскай гаспадаркі і цяперашні памагаты Лукашэнкi па Віцебскай вобласці Ігар Брыло імкнецца выглядаць крэатыўна, але, відавочна, перабірае з акцэнтнымі дэталямі. Самая частая памылка чыноўніка — мiкс двух відаў палоскі, якія не спалучаюцца паміж сабой.
![Игорь Брыло Ігар Брыло](http://nashaniva.com/img/w732d4webp1/photos/z_2023_07/-cfor6.jpg.webp)
Палітык дапаўняе свае смелыя лукі сціплым смарт-гадзіннікам Samsung Galaxy Watch Active 2. Актуальны кошт такога 284 даляры, або ўсяго толькі палова сярэдняга заробку.
![Игорь Брыло Samsung Galaxy Watch Active 2](http://nashaniva.com/img/w732d4webp1/photos/z_2023_07/2-5ig3a.jpg.webp)
Юрый Шулейка i «Аднастрэлачнік»
Губернатар Брэсцкай вобласці Юрый Шулейка любіць прынтаваныя гальштукі. У яго калекцыі можна сустрэць аксесуары ў індыйскія «агуркі», далікатны гарошак і ромбік.
![Юрий Шулейко Юрый Шулейка](http://nashaniva.com/img/w732d4webp1/photos/z_2023_07/-9izcd.jpg.webp)
Але ж у выбары гадзінніка палітык больш стрыманы: у ліку нямногіх, Шулейка носіць гадзіннік мінскага завода «Луч». На яго руцэ можна заўважыць унісэкс-мадэль з калекцыі «Аднастрэлачнік» коштам 122 еўра. Беларус з сярэднім заробкам заробіць на такі гадзіннік за некалькі тыдняў.
![Луч Однострелочник](http://nashaniva.com/img/w732d4webp1/photos/z_2023_07/-dcxv8.jpg.webp)
Даведацца, колькі каштуюць аксесуары чыноўніц і фаварытак Лукашэнкі, можна ў яшчэ адным нашым матэрыяле.
Каментары