Jutubier vykłaŭ piać arhumientaŭ, čamu nie pierachodzić na ruskuju movu ŭ jutubie
Valancin Konan tłumačyć, u čym niedarečnaść arhumienta, što biełaruskamoŭny kantent nie budzie mieć vialikaj kolkaści prahladaŭ.
Valancin Konan, aŭtar biełaruskamoŭnaha jutub-kanała @Konan_V, atrymaŭ kamientar ad adnaho z hledačoŭ nastupnaha źmiestu:
«Heta tvoj vybar, prosta ty zmožaš danosić svaju infarmacyju mienšaj kolkaści ludziej. Z druhoha boku, heta prosta niepavaha da svajoj aŭdytoryi».
Valancin havoryć, što možna było b adkazać na hety kamientar prosta, što «heta sproba racyjanalizavać ułasnuju impierskuju sacyjalizacyju dy šavinistyčnuju niepavahu da inšych moŭ», ale jon vyrašyŭ adkazać razhornuta, bo heta sapraŭdy typovy kamientar.
Pa-pieršaje, jak zaŭvažaje Konan, kali b jon chacieŭ, kab jaho razumieła bolšaja kolkaść ludziej, to jon vykarystoŭvaŭ by najbolš raspaŭsiudžanyja movy: anhlijskuju, kitajskuju, chindzi, ispanskuju, francuzskuju ci partuhalskuju. Ale nie ruskuju, bo jana nie ŭvachodzić u top-5 moŭ śvietu.
Jon padkreślivaje, što ni adna ź piaci najbolš raspaŭsiudžanych moŭ nie spryčyniłasia da asimilacyi i źniščeńnia Biełarusi, tamu jany i mohuć suisnavać ź biełaruskaj, u adroźnieńnie ad ruskaj.
«Bo ŭ našym rehijonie, dzie nibyta dziaržaŭnaje «dvuchmoŭje», na samaj spravie [nazirajecca] vyniščeńnie aŭtachtonnaj movy. I biełarusy viedajuć heta jak nichto inšy», — zaŭvažaje Valancin.
Pa-druhoje, Konan źviartaje ŭvahu, što jaho videa supravadžajucca subcitrami. Tamu «kali intelektualnyja zdolnaści čałavieka, relihija ci impierskaja sacyjalizacyja nie dazvalajuć čałavieku ŭklučyć subcitry, jakija jość u videa, to heta jaho prablema».
Pa-treciaje, Konan adznačaje:
«Mova, jakuju ja vybiraju, mienavita ja, adlustroŭvaje maje mety. I kali maje mety — danieści štości da biełarusaŭ i ŭkraincaŭ, to vidavočnym budzie spynić svoj vybar na biełaruskaj. Bo z-za takoha susieda-złačyncy biełarusy i ŭkraincy majuć amal adnolkavy dośvied sutyknieńnia z pryhniotam. I razam supraćstajać hetamu pryhniotu niejak zručniej».
Aŭtar havoryć, što jaho sproby pačynajučy z 2012 hoda danieści štości ŭ tym liku i da žycharoŭ Rasii skončylisia biasplonna. Ciapier mienavita z Rasii na naš abšar prychodziać samyja antyhumannyja źjavy. «Biełarusam ciapier heta dobra viadoma, bo zakony, jakija prymajucca akupacyjnymi ŭładami tut, faktyčna adlustroŭvajuć zakony i impet złačynnaj Rasijskaj Fiederacyi», — zaŭvažaje Valancin.
Pa-čaćviortaje, na pohlad aŭtara, «arhumient ad kolkaści» haniebny navat na maralnym uzroŭni. Jon tłumačyć, što sapraŭdy mova videa ŭpłyvaje na patencyjnuju kolkaść hledačoŭ. Ale kali hladzieć ahułam, to heta datyčyć nie tolki movy. Na kolkaść aŭdytoryi, na toje, jak ałharytmy sacsietki buduć prasoŭvać ci nie [prasoŭvać] tvajo videa, upłyvaje taksama źmiest, prapracoŭka materyjału, žanr.
Valancin zaŭvažaje, što dobra viadoma, jakija videa padabajucca bolšaści hledačoŭ. Dastatkova hlanuć na trendy jutuba ci nanova ŭstalavać sabie TikTok, kab jon pakazaŭ toje, što padabajecca bolšaści ludziej.
«I heta žachlivyja rečy, źviazanyja ci ź niejkimi eratyčnymi spravami, ci ź dziciačym kantentam, jak heta adbyvajecca ŭ jutubie, ci navat ź niejkimi biazhłuzdymi videa, dzie ludzi źniščajuć niejmaviernuju kolkaść hrošaj samymi roznymi srodkami.
Na žal, ludziam ahułam padabajecca nie štości karysnaje, prapracavanaje, nadta składanaje dla ŭsprymańnia. Ludziam padabajucca prostyja rečy, śmiešnyja. I ŭ hetym niama ničoha haniebnaha. Prosta bolšaść ludziej takim čynam baviać svoj čas», — kaža Valancin.
Konan padkreślivaje, što sam fakt taho, što jon u 2012 hodzie abraŭ stvareńnie navukova-papularnych videa, padkreślivaje, što jon nie imkniecca da niejkaj «usieahulnaj viadomaści». Stvarajučy svaje prapracavanyja videa, pryśviečanyja surjoznym temam, aŭtar razumieje, što ich nie buduć hladzieć miljony hledačoŭ. Bo heta vielmi składanyja temy.
«Navat siarod redaktaraŭ navukova-papularnych knih jość žartaŭlivaje praviła pra toje, što kožnaja formuła na arkušy papiery skaračaje aŭdytoryju knihi ŭdvaja.
Tamu, kali bolšaści hledačoŭ va ŭsim śviecie padabajucca žartoŭnyja rečy, zabaŭlalny kantent, ci mušu ja stvarać hety kantent? Ci mušu admovicca ad taho, što cikava ŭłasna mnie? Ci mušu ja padparadkoŭvacca hetaj bolšaści i stvarać toje, što navat mnie nie budzie cikava? Viadoma ž, nie», — zaŭvažaje Valancin.
Na jaho pohlad, kab u śviecie sapraŭdy ŭsprymali «arhumient ad kolkaści» jak niejkaje załatoje praviła, jakim kožny musić karystacca, my byli b na ŭzroŭni staražytnaha hramadstva. Bo ŭsie rabili b toje, što padabajecca bolšaści.
«Navošta składanyja rečy, narod hetaha nie zrazumieje. Navošta prapracoŭka čahości, vynachodnictva novych rečaŭ. Atrymlivajecca, što «arhumient ad kolkaści» — hańba čałavieku, jaki jaho vykazvaje, bo jon zaklikaje ciabie admovicca ad svaich met, impetu, svajho raźvićcia i padparadkoŭvacca niejkaj efiemiernaj bolšaści. Jakaja ŭ vypadku ruskaj movy na samaj spravie nijakaja nie bolšaść», — śćviardžaje Konan.
Što datyčyć druhoj častki kamientara pra niepavahu aŭdytoryi, to na heta Valancin adkazaŭ nastupnym čynam: «Viedajecie, kali rasiejec bačyć niepavahu ŭ tym, što čałaviek, movu i dziaržavu, kulturu i narod jakoha jon i jaho suajčyńniki niščyli niekalki stahodździaŭ, raptoŭna z-za čahości paviartajecca da svajoj movy, to ŭ mianie tolki adna prapanova da takoha čałavieka. Heta pajści ŭśled za svaim vajskovym karablom.
Sapraŭdnaja niepavaha — heta asimilavać i źniščać svaich susiedziaŭ. Niepavaha — heta paśla hetaj asimilacyi spažyvać dasiahnieńni asimilavanych. I navat nie stavić pierad saboju pytańnia, a jak ža tak stałasia, što čałaviek inšaj krainy, inšaj kultury vykarystoŭvaje vyklučna i pieravažna tvaju movu. I jak ža tak adbyłosia, što bolšaść nasielnictva hetaj krainy tak błaha razmaŭlaje i razumieje svaju movu.
Niepavaha — heta padčas čarhovaj zachopnickaj złačynnaj vajny svajoj dziaržavy, jakaja pa samyja vałasy vypackanaja ŭ kryvi i vajennych złačynstvach, navat nie pačać refleksavać nakont ułasnaj impierskaj sacyjalizacyi i śvietapohladu. Voś ža cudoŭny śviet u rasiejcaŭ. Možna vielmi pavažliva vyniščać inšyja movy. Ale tolki pasprabuj na joj vykazacca. Adrazu — niepavaha».
Valancin zaŭvažaje, što, ułasna kažučy, hetaja niepavaha ŭ kamientary rasiejca adlustroŭvaje piaty dovad niedarečnaści «arhumienta ad kolkaści». Aŭdytoryja, akramia takoj charaktarystyki, jak kolkaść hledačoŭ, maje jašče takuju charaktarystyku, jak jakaść hledačoŭ.
«I pytańniečka ŭ tym, a navošta mnie siarod maich hledačoŭ niazdolnyja prapracoŭvać ułasnuju sacyjalizacyju jołupni dy impierskija vyludki, jakija bačać niepavahu ŭ tym, što ja razmaŭlaju pa-biełarusku. Pytańnie, jakoje nie patrabuje adkazu», — padsumoŭvaje Valancin.
Čytajcie jašče:
Žycharcy Mahilova pahražajuć kryminałkaj za toje, što źniała ranišniuju čarhu ŭ rehistraturu3
Kamientary