Žurfak BDU znoŭ skaraciŭ nabor studentaŭ. Ale dekan chvalicca vysokim prachadnym bałam

Dekan fakulteta Alaksiej Bialajeŭ tłumačyć skaračeńnie naboru i admienu płatnaha navučańnia «adsutnaściu patreby» ŭ bolšaj kolkaści admysłoŭcaŭ i spasyłajecca na kolkasny «zapyt z boku dziaržaŭnych ŚMI». Darečy kažučy, z 60-ci pryniatych na pieršy kurs troje abituryjentaŭ pastupali pa metavym nakiravańni i musiać viarnucca na pracu tudy, adkul ich pasyłali vučycca.

Pavialičyć

Alaksiej Bialajeŭ śćviardžaje, što sioleta vypuskniki škoł prajavili vialikuju cikavaść da fakulteta žurnalistyki. Kali praanalizavać statystyku apošnich hadoŭ, to heta praktyčna niezaŭvažna: konkurs pry pastupleńni ŭ hetym hodzie składaŭ 1,3 čałavieka na miesca, letaś jon byŭ 1,12 čałavieka, a pazaletaś — 1,23.

Były vykładčyk fakulteta žurnalistyki źviarnuŭ uvahu na jašče niekalki momantaŭ, jakija supiarečać vysnovam dekana pra papularnaść hetaj śpiecyjalnaści ŭ abituryjentaŭ: «Žurfak nikoli nie byŭ bolš papularny za fakultet mižnarodnych adnosin, jurydyčny abo ekanamičny. I kłasičnaja žurnalistyka ŭžo daŭno karystajecca mienšaj papularnaściu za śpiecyjalnaść «infarmacyja i kamunikacyja», jakaja daje mahčymaść pracavać nie tolki ŭ ŚMI.

Paśla taho jak žurnalistaŭ pačali dzialić na «česnych» i «niačesnych», prestyž hetaj prafiesii staŭ jašče nižejšy, bo navat abituryjentam było zrazumieła, što vysoki zarobak i sacyjalnyja harantyi majuć tolki «česnyja», a być «niačesnym» jašče i ryzykoŭna. Za apošnija hady, kali niedziaržaŭnyja miedyja ŭ Biełarusi vyniščyli, pole dla pracaŭładkavańnia pamienšała. Žurnalistyka pierastała być prafiesijna niezaležnaj: navat adsiedziecca na temach kultury i «sacyjałki» ŭ dziaržaŭnych vydańniach užo nie ŭdasca, bo ŭsio prasiaknuta ideałahičnymi patrabavańniami».

Taksama były vykładčyk žurfaka źviartaje ŭvahu na pastupovaje źmianšeńnie kolkaści abituryjentaŭ sa stalicy dy bujnych haradoŭ, bo raźmierkavańnie (a pry navučańni na biudžetnaj formie jano niepaźbiežnaje) — heta pieradusim «rajonki», dzie zaŭsiody brakuje kadraŭ.

Dekan žurfaka ŭ intervju BiełTA asabliva padkreślivaje, što prachadny bał na śpiecyjalnaść «žurnalistyka» sioleta dasiahnuŭ 340. Adnak heta suma składajecca ź piaci kampanientaŭ: siaredniaha bała atestata, siertyfikataŭ pa dvuch pradmietach centralizavanaha teściravańnia i adznak za dva tvorčyja ispyty — sačynieńnie i sumoŭje. I kali 340 padzialić na 5, to siaredni bał atrymlivajecca nie nadta vysoki — 68 abo 6,8 pa dziesiacibalnaj sistemie.

Darečy, padčas letašniaj ustupnaj kampanii prachadny bał na žurnalistyku ŭ BDU byŭ značna nižejšy — 296. Razam sa źmianšeńniem konkursu heta śviedčyć pra padzieńnie intaresu da prafiesii, kaža były vykładčyk žurfaka. Mahčyma, u hetym hodzie vučycca na rabotnikaŭ miedyja pajšli tyja, chto metanakiravana abiraje pierśpiektyvu pracavać u ciapierašnich umovach. Abo spadziajecca na pieramieny, jakija mohuć adbycca ŭ krainie za nastupnyja čatyry hady.

Što da źmianšeńnia naboru na śpiecyjalnaść «žurnalistyka», to ŭ hetaj tendencyi mohuć być unutranyja pryčyny. Kab vučyć mienšuju kolkaść studentaŭ, treba mieniej vykładčykaŭ, a značyć, možna pazbavicca ŭsich niełajalnych, nietalerantnych supracoŭnikaŭ. I trymać astatnich pad pahrozaj skaračeńnia pry lubych prajavach valnadumstva.

• 1
• 4
• 0
• 0
• 1
• 0