Ci patrebny biełarusam vialiki futboł?

«Dvanaccatym hulcom» BATE u matčy z «Bienfikaj» moh by stać pierapoŭnieny stadyjon «Dynama». Na žal, na adzin z najvažniejšych matčaŭ siezona pryjšli tolki kala 12 tysiač čałaviek. Piša Alaksandr Starykievič na gazetaby.com.

My časta i achvotna krytykujem futbolnych čynoŭnikaŭ, trenieraŭ, sudździaŭ, hulcoŭ. Jość za što. Ale ci hatovyja sami zaŭziatary ŭnosić minimalny ŭkład u raźvićcio futboła?

Nizkaja naviedvalnaść na matčach čempijanatu krainy tłumačycca jaho nievysokim uzroŭniem. Ale voś paradoks: u hetym siezonie nivodnaja z troch — usiaho troch za ŭvieś siezon! — hulniaŭ hrupavoha turniru Lihi Jeŭropy nie sabrała poŭnyja trybuny «Dynama».

Pry tym, što BATE niadrenna vyhladaŭ u matčy z «Eviertanam», atrymaŭ valavuju pieramohu nad AJEKam … Zdavałasia, što na šmat u čym vyrašalnuju hulniu z «Bienfikaj» ŭžo dakładna budzie anšłah: tym bolš kłuby takoha kłasu — redkija hości ŭ Biełarusi. Dy jašče i nadvorje była jak na zakaz: vielmi ciopłaje (dla śniežnia) i biez apadkaŭ. Ale ž nie — trybuny byli zapoŭnienyja tolki na tracinu!

I siadzić dumka: a ci sabrali b poŭnuju čašu «Dynama» letašnija lihačempijonskija matčy BATE z turynskim «Juvientusam» i madrydskim «Reałam»,

kali b bolšaść biletaŭ nie raźmiarkoŭvalisia pa pradpryjemstvach? Ciapier užo nie ŭpeŭnieny.

Tak ci patrebny biełarusam vialiki futboł? Dakładniej, kolki siarod nas tych, kamu jon sapraŭdy patrebny? ..

Možna znajści dziasiatak «admazak», kab nie pajści na stadyjon: ad bojazi zarazicca hrypam da zanadta žorstkaha milicejskaha kantrolu na ŭvachodzie. Ale, zdajecca mnie, sprava nie ŭ hetym.

Sapraŭdnaja pryčyna — abyjakavaść, jakaja stała našaj firmiennaj rysaj ŭ mnohich aśpiektach žyćcia — ad palityki da futboła. Maja chata z boku, ja i la televizara pasiadžu …

Možna i la televizara. Ale tady nie treba čakać vialikich pieramoh. Prava raźličvać na pośpiech u supraćstajańni z kamandami, pieravialičvała ŭ kłasie, dajecca tolki ŭ tym vypadku, kali dziela viktoryi pa poŭnaj vykłalisia ŭsio: i hulcy, i treniery, i balelščyki. Zrešty, z AJEKam BATE spraviŭsia i biez anšłahu na «Dynama». A voś u matčy z «Bienfikaj» nie chapiła krychu‑krychu, kab damahčysia chacia b ničyjoj. Mahčyma, hetym «krychu‑krychu» moh by stać stadyjon, zabity pad zaviazku i jaki horača padtrymlivaŭ by svaju kamandu.

Atrymałasia inakš.

Matč Lihi Jeŭropy BATE — «Bienfika» sabraŭ mienšuju aŭdytoryju, čym šarahovaja hulnia napiaredadni ŭ Dnieprapiatroŭsku miascovym «Dniaprom» i pałtaŭskaj «Vorskłaj».

Darečy (dakładniej, niedarečy), nie było anšłahu i na klučavoj u adboračnym cykle čempijanatu śvietu‑2010 hulni pamiž zbornymi Biełarusi i Charvatyi.

I nie tolki futboła tyčycca hetaja vyklataja abyjakavaść. Uspaminajecca fienamienalnaje dasiahnieńnie žanočaj zbornaj Biełarusi pa baskietbole, jakaja, debiutavaŭšy ŭ 2007 hodzie ŭ finalnaj stadyi čempijanatu Jeŭropy, adrazu zavajavała bronzavyja miedali. U inšaj krainie, pazbaŭlenaj pośpiechaŭ u hulniavych vidach sportu, prychilniki nasili b dziaŭčat na rukach. U nas ža sustrakać zbornuju ŭ aeraport pryjechali ličanyja zaŭziatary.

Lubaja, samaja pierśpiektyŭnaja kamanda, adčuŭšy, što jana mała kamu patrebna, rana ci pozna składzie kryły.

Tamu, kali my chočam u budučyni radavacca pieramoham BATE, baskietbolnaj zbornaj i inšych biełaruskich družyn, treba pierachodzić ad virtualnaj padtrymki da realnaj. Našy spartsmieny hetaha zasłuhoŭvajuć.

• 0
• 0
• 0
• 0
• 0
• 0
• 0
• 0