«Nie pierasvarylisia». U Kijevie prajšła zakrytaja sustreča bajcoŭ z usich biełaruskich farmavańniaŭ, jakija vajujuć va Ukrainie

Na vychadnych 19-20 žniŭnia ŭ Kijevie adbyŭsia schod biełaruskich dobraachvotnickich farmavańniaŭ, jakija ŭdzielničajuć u bajavych dziejańniach va Ukrainie. Jaje arhanizataram vystupiła Asacyjacyja biełaruskich dobraachvotnikaŭ, jakaja abjadnoŭvaje ŭ svaich šerahach biełarusaŭ-vieteranaŭ, što prajšli praz vajnu.

Kiraŭnik Asacyjacyi biełaruskich dobraachvotnikaŭ Andrej Kušniaroŭ (pazyŭny «Rycar») paviedamiŭ, što na sustrečy prysutničali pradstaŭniki 79-j asobnaj desantna-šturmavoj bryhady, atrada «Atam», a taksama asobnyja vajary ź Biełaruskaha dobraachvotnickaha korpusu, bataljonaŭ «Vołat» i «Lićvin» (hetyja bataljony ŭvachodziać u połk imia Kastusia Kalinoŭskaha), a taksama II Internacyjanalnaha lehijona. Heta ludzi z usich biełaruskich farmavańniaŭ, jakija na hety momant vajujuć va Ukrainie, raniej takija sustrečy nie arhanizoŭvalisia. 

Aproč taho, na sustrečy prysutničali pradstaŭniki hramadzianskich i paramilitarnych arhanizacyj — fondu «Volnaja Biełaruś», hramadskaha abjadnańnia «Pahonia», «Paspalitaha rušeńnia», dobraachvotnickaha abjadnańnia biełarusaŭ u Litvie «Litviny», arhanizacyi dapamohi biełaruskim dobraachvotnikam «Krajt», reabilitacyjnaha centra «Łanka». 

Siarod hałoŭnych rašeńniaŭ, uchvalenych na sustrečy dobraachvotnikaŭ — praviadzieńnie dabračynnaha marafonu dla zboru srodkaŭ siemjam zahinułych biełarusaŭ, a taksama sacyjalnaja padtrymka vajaroŭ i ich siemjaŭ.

«Dla nas važna arhanizavać praces rehularnaha infarmavańnia biełaruskaj dyjaspary ab dziejnaści biełaruskich dobraachvotnickich farmavańniaŭ. Reč u tym, što ich dziejnaść nie mocna pradstaŭlenaja ŭ biełaruskich i ŭkrainskich ŚMI», — raskazvaje Andrej Kušniaroŭ. 

Pry hetym na sustrečy nie było pradstaŭnikoŭ štaba pałka imia Kastusia Kalinoŭskaha (najbujniejšaha biełaruskaha farmavańnia. — RS), nie prysutničaŭ taksama i siabra Abjadnanaha pierachodnaha kabinieta ŭ pytańniach abarony i nacyjanalnaj biaśpieki Valer Sachaščyk, jaki maje dačynieńnie da dziejnaści 79-j asobnaj desantna-šturmavoj bryhady. 

«Heta pieršaja sustreča, na jakoj byli pradstaŭniki ŭsich padraździaleńniaŭ. My siadzieli za adnym stałom dva dni i nie pasvarylisia. A adnosiny miž vajarami krychu lepšyja, čym siarod štaboŭ. Naša meta — dasiahnuć rašeńniaŭ, a nie sutykać iłbami ludziej, u jakich jość palityčnyja ambicyi. Kali nastupny raz bajcy vyrašać zrabić svaimi pradstaŭnikami ludziej sa štaba, to my nie budziem suprać», — skazaŭ Andrej Kušniaroŭ. 

Padobnyja sustrečy płanujecca pravodzić i ŭ budučyni. Jaje ŭdzielniki vyrašyli, što takaja placoŭka pavinna dziejničać rehularna. 

Na ciapierašni momant va Ukrainie, pavodle źviestak «Radyjo Svaboda», vajuje kala paŭtysiačy biełaruskich dobraachvotnikaŭ. Sama mieniej 33 biełarusy zahinuli ad pačatku poŭnamaštabnaj vajny.

• 73
• 0
• 8
• 3
• 4
• 6
• 8
• 0