Jašče adnaho biznesoŭca asudzili za «ahienturnuju dziejnaść» i «špijanaž». Na karyść Francyi ci Litvy?

Pamiatajecie materyjał pra čałavieka, na jakoha nalacieli niekalki ŭzbrojenych siłavikoŭ i pakłali tvaram u asfalt? Heta byŭ 32-hadovy Siarhiej Botvič z Hrodna, jaki pracavaŭ kucharam u piceryi. «Naša Niva» sprabavała adsačyć jaho los i natknułasia na infarmacyju pra sud nad niejkim Siarhiejem Botvičam, jaki prachodziŭ u Hrodzienskim abłasnym sudzie. Artykuły — «špijanaž» i «ahienturnaja dziejnaść». Toj samy Botvič?

Nie, vyjaviłasia, što havorka pra inšaha, 59-hadovaha mužčynu, jaki, choć i nie maje biełaruskaha hramadzianstva, ale vyras i žyŭ u Biełarusi. Hety Botvič Siarhiej Ivanavič vałodaŭ kampanijami, ahulny abarot jakich składaŭ sotni tysiačaŭ dalaraŭ, a častka ich była zarehistravanaja ŭ ES. Voś što pra jaho viadoma.

Chto taki Siarhiej Botvič?

Siarhiej Botvič naradziŭsia ŭ ahraradku Novy Dvor, jaki ŭ Śvisłackim rajonie Haradzienskaj vobłaści. Ën skončyŭ Minski instytut zamiežnych movaŭ — ciapier heta Linhvistyčny ŭniviersitet. Na čaćviortym kursie, jašče ŭ časy SSSR, mužčyna źjeździŭ u Francyju na stažyroŭku.

Admietna, što mužčyna maje rasijskaje, a nie biełaruskaje hramadzianstva, jakoje jon atrymaŭ u 1994 hodzie.

Siarhiej zajmaŭsia biznesam u Biełarusi, Rasii, Francyi i Litvie — u asnoŭnym, heta byŭ turyzm i aptovy ekspart vuhalu z Uschodniaj Jeŭropy ŭ krainy Bałtyi i Zachodniaj Jeŭropy. 

Ahulny abarot kampanij Botviča ŭ «tłustyja» hady składaŭ niekalki socień tysiač dalaraŭ u hod. Heta nie vielmi vialiki biznes, ale i nie mały.

U 2014-m Botvič paŭdzielničaŭ u prajekcie budaŭnictva zavoda pa vytvorčaści draŭnianaha vuhalu pad Śvisłačču. Dziaržaŭnaja hazieta paviedamlała, što na zavod «pryciahnuli inviestycyjaŭ na 967 tysiač dalaraŭ». Zavod musiła budavać AAT «BSPenierdžy», firma ź litoŭskimi karaniami. Adnym z klučavych inviestaraŭ stała firma sa Śvisłackaha rajona «Erabl Hrup», jakaja taksama ekspartavała vuhal ź Biełarusi ŭ Francyju i Litvu.

Jašče adzin jahony bujny prajekt — kupla majontka Bahudzienki kala Śvisłačy za 30 tysiačaŭ dalaraŭ. Heta draŭlanaja siadziba, jakaja była pabudavanaja na miažy XIX i XX stahodździaŭ i niekali naležała Tadevušu Butaŭt-Andrajkoviču, maje status historyka-kulturnaj kaštoŭnaści.

Botvič dekłaravaŭ ambitnyja płany: stvaryć tam ceły kompleks ź dźviuma haścinicami i stajniaj, a majontak adrestaŭravać. Maŭlaŭ, tam buduć cełyja safary-tury dla bahatych turystaŭ, jakija pryniasuć rajonu sotni tysiačaŭ dalaraŭ. Dla turystaŭ «papraściej» mierkavałasia prapanavać eka-zabavy kštałtu piešych vandrovak. Botvič abiacaŭ navieźci tudy «suśvietnych zorak i pradstaŭnikoŭ suśvietnych miedyja», nazyvaŭ, u pryvatnaści, imia futbalista Złatana Ibrahimaviča.

Pavialičyć

Praŭda, ničoha hetaha nie ažyćciaviłasia: Botvič zvaziŭ tudy tolki paru nievialikich hrup zamiežnych turystaŭ, a abiacanyja restaŭracyjnyja raboty tak i nie pačaŭ. Haścinica taksama nie adkryłasia.

U niejki momant biznes pačaŭ sypacca. Nieviadoma, što mienavita adbyłosia, ale vuhalny zavod tak i nie pabudavaŭsia, a na Botviča ŭ červieni 2018-ha zaviali kryminalnuju spravu. Zhodna sa źviestkami z bazaŭ «Kibierpartyzanaŭ», fabuła kryminalnaj spravy suprać mužčyny hučyć tak:

«Botvič Siarhiej… naŭmysna, z karyślivych namieraŭ, nie źbirajučysia vykonvać uziatyja na siabie abaviazacielstvy, šlacham padmanu i złoŭžyvańnia davieram, na padstavie ŭdziełu ŭ inviestycyjnym prajekcie pa budaŭnictvie zavoda pa vytvorčaści vuhalu, zavałodaŭ hrašovymi srodkami TAA «Erabl hrup» u sumie 734 tysiačaŭ jeŭra».

Vytvorčaść pa joj była spynienaja zhodna p. 5 č. 1 st. 246 UPK — chutčej za ŭsio, mužčyna vyjechaŭ za miažu.

Pavialičyć

Štości dziŭnaje adbyvałasia i z usimi inšymi firmami Botviča, jakija my adšukali. Litoŭskija amal usie zbankrutavali, francuzskaja i rasijskaja dziejnaści nie viaduć. Siadzibu Bahudzienki ŭ jaho zabrali i jana dahetul bieznadziejna pradajecca.

Mužčyna ŭ apošni raz abnaŭlaŭ svoj fejsbuk u lipieni 2021-ha — heta była abjava ab prodažy mašyny. Za hod da hetaha jon pisaŭ, što «biełarusy majuć tysiačahadovuju historyju» ŭ adkaz na niejkuju ruskamirskuju publikacyju.

Toje, što adbyłosia paśla — zahadka. Vyhladaje tak, što mužčynu zatrymali. Botviča abvinavacili pa dvuch artykułach — «špijanaž» i «ahienturnaja dziejnaść». Sud adbyŭsia ŭ kastryčniku 2022-ha, sudziŭ jaho Hrodzienski abłasny sud.

Nieviadomy jak prysud mužčynie, hetak i fabuła spravy, ale jon dakładna ciapier u kałonii, bo inšyja formy pakarańnia pa hetych artykułach nie praduhledžanyja.

Na jakija dziaržavy jon špijoniŭ? Na Litvu, Francyju, u jakich u jaho byŭ biznes? My taksama pakul hetaha nie viedajem.

Što datyčyć jaho 32-hadovaha ciozki-kuchara, to jaho ŭ vyniku asudzili pa artykule za ŭdzieł u masavych biesparadkach. Toje, što ŭ turmu papali dva čałavieki z adnolkavym redkim proźviščam, nahadvaje nam pra masavy charaktar represij. A spravy ab «zdradzie radzimie» i «špijanažy» množacca.

Kali vy viedajecie bolej pra Siarhieja Botviča abo pra toje, što ź im zdaryłasia, to dasyłajcie infarmacyju redaktaru «Našaj Nivy» ŭ TH ci na [email protected].

Albo pišycie asabista tym žurnalistam i redaktaram «Našaj Nivy», jakich vy viedajecie i jakim daviarajecie (lepš — u sihnał ci telehram).

• 6
• 0
• 4
• 1
• 6
• 9
• 26
• 0