Orban zajaviŭ, što choča kiravać Vienhryjaj jašče 11 hadoŭ

Premjer Vienhryi zajaviŭ ab žadańni zastavacca kiraŭnikom nacyjanalnaha ŭrada ciaham jašče 11 hadoŭ, piša Radyjo Svaboda.

Paśla vybaraŭ 2018 hoda Orban zajaŭlaŭ ab namiery zastacca premjeram tolki da 2030 hoda. Źmienu płanaŭ jon patłumačyŭ tym, što poŭnamaštabnaje rasijskaje vajennaje ŭvarvańnie va Ukrainu i pandemija karanavirusa «zabrali» čatyry hady ź dziejnaści ŭrada.

Ciapier Orban zajaviŭ, što vyrašyŭ zastacca kiraŭnikom urada da 2034 hoda. Jak paviedamiła vydańnie Telex, pra heta Viktar Orban zajaviŭ na tradycyjnym pikniku ŭ vioscy Kietče.

Palityk taksama skazaŭ, što Vienhryja «choča być vialikaj, mocnaj i bahataj». Jon maryć ab tym, kab śviet pavažaŭ Vienhryju, i ahučyŭ płan dla dasiahnieńnia hetych žadańniaŭ.

Siarod takich 15 pryjarytetnych krokaŭ — demahrafičny pavarot, stvareńnie zasnavanaj na pracy ekanomiki, pierachod z pazyčalnikaŭ u kredytory, raźvićcio armii, ukaranieńnie ličbavaha pašparta i inšaje.

Viktar Orban čarhovy raz zajaviŭ, što bačyć surjoznuju niebiaśpieku ŭ isłamizacyi Jeŭropy i što ŭ budučyni chryścijanskija hramady buduć uciakać z Zachadu ŭ Vienhryju.

Viktar Orban pracavaŭ na pasadzie premjer-ministra z 1998 da 2002 hoda i z 2010 hoda da ciapierašniaha času. Jaho krytykujuć za ciesnyja suviazi z Maskvoj i admovu pieradavać Ukrainie vajskovuju dapamohu dla supraćstajańnia rasijskaj ahresii.

Vienhryja adzinaja ź Jeŭrasajuza nie padtrymała dakłada ABSIE ab parušeńniach pravoŭ čałavieka ŭ Biełarusi. Taksama Vienhryja damahajecca, kab z budučaha pakietu sankcyj Jeŭrasajuza prybrali troch čałaviek, u tym liku kiraŭnika Biełaruskaj čyhunki Uładzimira Marozava.

Adnosiny Vienhryi ź Jeŭrasajuzam dasiahnuli najbolšaj napružanaści ŭ 2015 hodzie ŭ pytańni ab mihracyi, kali premjer-ministr krainy Viktar Orban pabudavaŭ pamiežnuju aharodžu i vystupiŭ suprać pryjomu ŭciekačoŭ. Prykładna ŭ toj ža čas ahienctva ES u baraćbie z machlarstvam OLAF padniało tryvohu z nahody niametavaha vykarystańnia hrošaj, jakija vydzialajucca Vienhryi z ahulnaha biudžetu.

U lutym 2023 hoda kiraŭnik MZS Vienhryi Pieter Sijarta naviedvaŭ Minsk.

• 2
• 0
• 7
• 1
• 0
• 1
• 7
• 0