Biełaruskaha deputata nie puścili ŭ Polšču nazirać za vybarami
Deputata Pałaty pradstaŭnikoŭ Dzianisa Karasia polski bok nie dapuściŭ da ŭdziełu ŭ mižnarodnym nazirańni za parłamienckimi vybarami ŭ Polščy, paviedamlaje BIEŁTA.
«Respublika Polšča aficyjna zaprasiła Arhanizacyju pa biaśpiecy i supracoŭnictvie ŭ Jeŭropie, jaje dziaržavy-ŭdzielnicy i struktury, uklučajučy Parłamienckuju asambleju, uziać udzieł u mižnarodnym nazirańni za majučymi adbycca parłamienckimi vybarami ŭ siabie ŭ krainie. Respublika Biełaruś adhuknułasia na hetu prapanovu. U adpaviednaści z rašeńniem kiraŭnictva Pałaty pradstaŭnikoŭ maja kandydatura jak siabra nacyjanalnaj delehacyi Biełarusi ŭ PA ABSIE była va ŭstanoŭlenym paradku i ŭ adpaviednaści z usimi patrabavańniami padadziena ŭ Parłamienckuju asambleju ABSIE, — skazaŭ Dzianis Karaś.— PA ABSIE sfarmavała svaju naziralnuju misiju na majučyja adbycca vybary, u jakuju mianie ŭklučyli aficyjna».
Adnak 12 kastryčnika Karasia raźviarnuli na miažy.
«Susiedzi ad Boha, ich nie vybirajuć, my zacikaŭleny ŭ pošuku šlachoŭ narmalizacyi adnosin. Biełaruś praciahnuła ruku družby, ale, na žal, našy susiedzi hetaj mahčymaściu ŭ čarhovy raz nie skarystalisia», — skazaŭ deputat.
«U cełym, na moj pohlad, takija dziejańni padryvajuć usialaki davier da samoj idei inkluziŭnaha nazirańnia za vybarami pad ehidaj ABSIE. Hroš cana takomu nazirańniu, kali pradstaŭniki susiednich krain pry maŭklivym patakańni asamblei vyklučajucca z hetaha pracesu», — dadaŭ Dzianis Karaś.
Kamientaroŭ polskaha boku pakul nie było.
Na refierendumie ŭ 2022 hodzie pa źmienie Kanstytucyi ŭ Biełarusi nie było naziralnikaŭ ź ES — biełaruski bok nie zaprasiŭ.
Ciapier čytajuć
Andrej Švied, architektar represij, pryznačany staršynioj Viarchoŭnaha suda10
Kamientary