Viehietaryjanstva moža pieradavacca ŭ spadčynu — daśledavańnie
Amierykanskija daśledčyki praanalizavali hieny viehietaryjancaŭ i pryjšli da niečakanaha vyniku.
Viehietaryjanstva praktykavałasia roznymi kulturami ciaham tysiačahodziaŭ, i siońnia čaściej za ŭsio asnoŭnymi pryčynami takoj dyjety vystupajuć etyčnyja mierkavańni ludziej i niežadańnie škodzić žyviołam. Amierykanskija navukoŭcy pasprabavali vyśvietlić, ci moža takaja dyjeta taksama być abumoŭlena i našaj hienietykaj. Pra vyniki hetaha daśledavańnia dniami raspaviało vydańnie Euronews.
Hrupa daśledčykaŭ pad kiraŭnictvam prafiesara kafiedry patałahičnaj anatomii Paŭnočna-Zachodniaha ŭniviersiteta ZŠA Nabila Jasina praviała analiz vialikaj amierykanskaj bijamiedycynskaj bazy danych UK Biobank.
Navukoŭcy paraŭnali hienomy bolš za 5 tysiač viehietaryjancaŭ i amal 330 tysiač miasajedaŭ va ŭzroście ad 40 da 69 hadoŭ. Kamanda sprabavała znajści peŭnyja hieny ŭ čałaviečaj chramasomie, jakija mahli b adkazvać za viehietaryjanstva. I pošuki akazalisia paśpiachovymi.
«My vyjavili 3 hieny, jakija ŭ značnaj stupieni źviazanyja ź viehietaryjanstvam, i jašče 31 hien, jaki, mahčyma, taksama źviazany ź im. Takija vyniki adkryvajuć novuju temu dla daśledavańniaŭ: jak źviazanyja viehietaryjanstva i hienietyka ŭ čałavieka», — zajaviŭ prafiesar Nabil Jasin.
Prafiesar adznačyŭ, što na padstavie hetych danych možna vykazać zdahadku, što ŭ viehietaryjancaŭ jość ułasny mietabalizm tłuščaŭ, jaki ŭpłyvaje na pracu ich mozhu.
Adna z hipotezaŭ navukoŭcaŭ takaja: miasa moža mieć kampanienty tłušču, jakija viehietaryjancy zdolnyja sintezavać endahienna (samastojna), adnak inšym ludziam dla hetaha treba charčavacca miasnoj pradukcyjaj.
«My spadziajomsia, što heta praca stanie stymułam dla nastupnych daśledavańniaŭ u halinie hienietyki i fizijałohii viehietaryjanstva. Atrymanyja viedy mohuć dazvolić nam raspracoŭvać bolš indyvidualnyja dyjetyčnyja rekamiendacyi i, mahčyma, stvaryć bolš jakasnyja pradukty, jakija zamianiajuć miasa», — padzialiŭsia svaimi dumkami Jasin.
«Heta, naturalna, nie supierfud». Čym karysnaja i škodnaja bulba i jak časta jaje jeści?
«Usie prychodzili na pach i častavalisia». Što adbyvajecca ź viehanskimi kramami i kafe ŭ Minsku
U lidarach — kaviarni i pončykavyja. Jakija franšyzy papularnyja ŭ Biełarusi
Jak aptymizavać svoj bijałahičny hadzińnik, kab nie paŭnieć
Bondarava abrynułasia na muziej Janki Kupały i mastaka Sušu23
Kamientary