U Kijevie adšukali źnikły dva hady tamu pomnik Žyźnieŭskamu, a biełaruskija dobraachvotniki adnavili narodny miemaryjał suajčyńniku
Marmurovy pamiatny znak z vulicy Hrušeŭskaha ŭ Kijevie byŭ źviezieny ŭ lesapasadku. Ciapier vałanciory dabračynnaha fondu «Vałoška» zaniatyja pošukam dakumientaŭ, jakija ŭzakońvali ŭstalavańnie pomnika, kab viarnuć jaho na miesca.
U dabračynnym fondzie «Vałoška» kažuć, što pomnik Michaiłu Žyźnieŭskamu prybrali ŭ 2021 hodzie i adšukać jaho na praciahu dvuch hadoŭ nie ŭdavałasia.
Siońnia, 13 kastryčnika, vałancioram fondu žychary Kijeva paviedamili, što pomnik zahinułamu na Majdanie biełarusu znachodzicca ŭ kustoŭi lesapasadki. Heta za niekalki sot mietraŭ ad miesca, dzie jaho ŭstalavali. Pomnik upakavany dla transpartavańnia.
U fondzie adznačajuć, što ciapier na vulicy Hrušeŭskaha, dzie raniej stajali dva pomniki, adzin ź jakich Žyźnieŭskamu, raźmieščany miemaryjał u pamiać ab zahinułych bajcach antyterarystyčnaj apieracyi. Pry jaho ŭstalavańni pomnik biełarusu i prapaŭ.
«Ciapier jon valajecca ŭ lesapasadcy, i my nie viedajem, što rabić dalej. Pomnik, jaki stajaŭ pobač z pomnikam Žyźnieŭskamu, pieraniesieny i staić. Na abodva byli dakumienty, ale ciapier treba jašče ich adšukać», — davodzić kiraŭnica fondu Anžeła Dušajeva.
Jana miarkuje, što pomnik prybrali kamunalnyja słužby horada, jakija mielisia jaho pastavić u vyznačaje miesca.
Michaił Žyźnieŭski byŭ adnym ź pieršych zahinułych abaroncaŭ Majdanu ŭ studzieni 2014 hoda. Chłopca zastreliŭ nieviadomy snajpier. Pomnik Žyźnieŭskamu pastavili niepadalok ad miesca, dzie jaho zabili ŭ listapadzie 2014-ha — na vulicy Hrušeŭskaha. Tady ž biełarusa prezident Ukrainy Piatro Parašenka paśmiarotna ŭznaharodziŭ ordenam Hierojaŭ Niabiesnaj sotni, a ŭ 2017 hodzie nadaŭ jamu zvańnie Hieroja Ukrainy
Siońnia ž biełaruskija dobraachvotniki adnavili pamiatny znak Žyźnieŭskamu, jaki stajaŭ na miescy, dzie byŭ zabity abaronca Majdanu. Pra heta paviedamiŭ «Našaj Nivie» biełaruski dobraachvotnik z pazyŭnym «Rakieta».
Pamiatny znak Michaiłu Žyźnieŭskamu, jaki adramantavali biełaruskija dobraachvotniki. Fota: skryn videa dobraachvotnika z pazyŭnym «Rakieta»
Imia Žyźnieŭskaha ŭviekaviečana i na pamiatnym znaku, ustalavanym na vulicy Biełaruskaj.
Niekatoryja ź jaho frahmientaŭ byli demantavanyja. Siarod ich nadpis «Žyvie Biełaruś». Ciapier aktyvisty patrabujuć adnavić pamiatny znak. U roznyja instancyi dasłanyja zvaroty, na jakija pakul niama adkazaŭ.
Demantavać častku pamiatnaha znaka, nastojvajuć aktyvisty, zahadała kiraŭnictva Kijeŭskaha nacyjanalnaha ŭniviersiteta technałohij i dyzajnu. Jon ustalavany na budynku Prafiesijnaha kaledža mastactvaŭ i dyzajnu, jaki padparadkujecca ŭniviersitetu.
Anžeła Dušajeva ličyć, što na adnaŭleńnie pamiatnaha znaka ŭ kiraŭnictva horada niama «palityčnaj voli».
«Biez zahadu tam ničoha nie robiać. Jak była b palityčnaja vola, to na miesca daŭno byli b viernutyja biełaruski i ŭkrainskija ściahi dy «Žyvie Biełaruś». Ale jany zanialisia papiarovaj ciažbaju. Na hety momant nichto nie viarnuŭ, ni «Žyvie Biełaruś», ni Pahoniu», — davodzić kiraŭnica fondu «Vałoška».
Pavodle jaje, pryhladać za pamiatnym znakam na Biełaruskaj uzialisia kalinoŭcy i inšyja biełaruskija dobraachvotniki, jakich aburaje niepavažlivaje staŭleńnie čynoŭnikaŭ da pamiaci zahinułych biełarusaŭ za niezaležnaść Ukrainy.
Pamiatny znak biełarusam, palehłym za Ukrainu, byŭ adkryty ŭ 2016 hodzie. Im ušanavanyja akramia Michaiła Žyźnieŭskaha bajcy taktyčnaj hrupy «Biełaruś» Aleś Čarkašyn i Vital Ciliženka, a taksama paramiedyk marskoj piachoty Ukrainskich uzbrojenych sił Mikoła Iljin.
5 kastryčnika ŭ parłamiencie Ukrainy zapatrabavali ad uładaŭ Kijeva adnavić miemaryjał biełarusam.
«Naša Niva» — bastyjon biełaruščyny
PADTRYMAĆHladzicie taksama:
Aktyvisty buduć adnaŭlać paškodžany znak biełaruskim bajcam u Kijevie
Na mahile Michaiła Žyźnieŭskaha pad Homielem pastavili pomnik z Pahoniaj i Tryzubam FOTAFAKT
«Kadebist u čornych skuranych palčatkach zadavaŭ pytańni, i kali ja nie adkazvała, pačynaŭ mianie dušyć»5
«Kadebist u čornych skuranych palčatkach zadavaŭ pytańni, i kali ja nie adkazvała, pačynaŭ mianie dušyć»
«Moj kachany nie čytaje naviny, kali jany napisanyja pa-biełarusku». Darja Caryk stała na abaronu ruskaj movy i pryplała navat Paźniaka75
Kamientary