Aktyvisty buduć adnaŭlać paškodžany znak biełaruskim bajcam u Kijevie
Inicyjatary ŭstalavanaha ŭ Kijevie z 2016 hoda pamiatnaha znaka biełarusam, jakija zahinuli za Ukrainu, zajavili, što jany adnoviać paškodžanyja elemienty.
Anžeła Dušajeva, pradstaŭnica dabračynnaha fondu «Vałoška», adna ź inicyjatarak stvareńnia ŭ 2016 hodzie ŭ Kijevie miemaryjała ŭ pamiać pra biełarusaŭ, jakija zahinuli va Ukrainie, miarkuje, što paškodžańnie pomnika musić rasśledavać Słužba biaśpieki Ukrainy.
«Toje, što adbyłosia (źniali hierb i nadpisy «Žyvie Biełaruś!» i «Słava Ukrainie»), heta dakładna zrabili nie ŭłady. I da vandalizmu heta nie padobna, bo ŭ takim vypadku chutčej by paškodzili partrety. Heta płanamiernaja pravakacyja, jakaja moža być vyhadnaja tolki śpiecsłužbam Łukašenki», — skazała «Svabodzie» Anžeła Dušajeva.
Jana nahadała, što ŭ 2016 hodzie dla ŭstalavańnia miemaryjała inicyjatary atrymali dazvoł kijeŭskich uładaŭ.
«Budziem raźbiracca, jašče adny inicyjatary stvareńnia pomnika buduć źviartacca z zajavaj u palicyju. Choć hetaj spravaj musiła b zaniacca SBU, kab vyśvietlić, kamu treba było pačynać skandał u čas vajennaha stanovišča. Miemaryjał nikomu nikoli nie pieraškadžaŭ. Mahčyma, heta źviazana z novaj abviestkaj pałka Kalinoŭskaha pra nabor u padraździaleńnie», — dadała Anžeła Dušajeva.
Pradstaŭnica dabračynnaha fondu «Vałoška» raźličvaje, što pravaachoŭnyja orhany zmohuć znajści tych, chto heta zrabiŭ, na padstavie videazapisaŭ z kamier, jakija znachodziacca pobač z hetym miescam.
Vałanciorka Volha Halčanka, jakaja ŭ 2016 hodzie zajmałasia afarmleńniem dazvołu kijeŭskich uładaŭ na ŭstalavańnie pomnika, paviedamiła, što jon budzie adnoŭleny. Jana nazvała cyničnym paškodžańnie memaryjała dobraachvotnikam 1 kastryčnika, kali va Ukrainie adznačajuć Dzień abaroncaŭ.
«Niejkija idyjoty vyrašyli paškodzić pamiatny znak našym chłopcam… Skazać, što ja złaja — heta ničoha nie skazać. Kamu ŭvohule takoje pryjšło ŭ hałavu — u časie vajny ŭ Kijevie razhramić pomnik zahinułym dobraachvotnikam?» — napisała Volha Halčanka na svajoj staroncy ŭ fejsbuku.
Meryja nakiravała ŭ administracyju Šaŭčenkaŭskaha rajona, na terytoryi jakoha znachodzicca vulica Biełaruskaja i pamiatny znak. U rajonnaj administracyi na telefanavańni nie adkazvajuć.
Uračystaja cyrymonija adkryćcia pomnika z udziełam hanarovaj varty adbyłasia 28 sakavika 2016 hoda. Miemaryjał inicyjavali niekalki ŭkrainskich arhanizacyj, a taksama taktyčnaja hrupa «Biełaruś», u jakuju na toj čas byli arhanizavanyja biełaruskija dobraachvotniki.
Ad BNF da HRU. Chto takaja Natalla Sudlankova, jakoj čechi zahadali pakinuć krainu27
Kamientary