U. Zdanovič: Vyrašajučy svaju prablemu, Minabarony stvaraje značnyja prablemy Minadukacyi

18 śniežnia parłamient u pieršym čytańni pryniaŭ papraŭki ŭ zakon ab vajskovym abaviazku i słužbie.

Adno z važnych novaŭviadzieńniaŭ, praduhledžanych u papraŭkach, — admiena adterminoŭki ad pryzyvu ŭ armiju dla zavočnikaŭ, jakija atrymlivajuć siaredniuju śpiecyjalnuju i vyšejšuju adukacyju.

Vystupajučy ŭ suviazi z hetaj prapanovaj, deputat Uładzimir Zdanovič adznačyŭ, što «Minabarony, vyrašajučy svaju prablemu, stvaraje značnyja prablemy Ministerstvu adukacyi ŭ častcy funkcyjanavańnia VNU i SSNU». Na jaho dumku, hetu papraŭku ŭ zakon treba detalova abmierkavać i dapracavać. «Što lepš dla armii: bajec-małaletka, pryzvany paśla niekalkich miesiacaŭ vučoby na zavočnaj formie, abo darosły bajec z zavieršanaj adukacyjaj bolš vysokaha ŭzroŭniu? Što lepš dla ekanomiki krainy?» — rytaryčna spytaŭ deputat. Jon zhodny z tym, što ŭ Biełarusi namieciłasia tendencyja źnižeńnia kolkaści mužčyn pryzyŭnoha ŭzrostu. «Ale heta nie značyć, što źmienšyłasia kolkaść mužčyn u cełym, a tolki tych, chto padlahaje štohadovamu pieršapačatkovamu pryjomu na voinski ŭlik. Jość ža jašče studenty vajennych kafiedr VNU, jakich možna pryzvać paśla zakančeńnia vučoby, kala 14 tys. studentaŭ štohod adličajucca z VNU i taksama mohuć być pryzvany ŭ armiju», — skazaŭ U. Zdanovič. Jon prapanuje «razam ź Ministerstvam adukacyi padumać ab skaračeńni pryjomu na zavočnuju formu navučańnia za płatu», a taksama ab tym, kab uzmacnić maralnuju i materyjalnuju zacikaŭlenaść moładzi ŭ słužbie ŭ armii.

Zakonaprajektam taksama prapanujecca pašyryć katehoryju asob, što prymajuć vajennuju prysiahu. Da ich buduć pryličany studenty, jakija vučacca pa prahramach padrychtoŭki małodšych kamandziraŭ i aficeraŭ zapasu.

Zhodna z papraŭkami zamacavana dadatkovaje abhruntavańnie, pa jakomu kantrakt z vajennasłužačym, što prachodzić vajennuju słužbu pa kantraktu, moža być skasavany daterminova. Jak paviedamiŭ na pasiadžeńni pieršy namieśnik ministra abarony Piotr Cichanoŭski, prapanujecca skasoŭvać kantrakt za adnarazovaje parušeńnie jaho ŭmoŭ. U pryvatnaści, za kiravańnie transpartnym srodkam u niećviarozym stanie i źjaŭleńnie ŭ takim vyhladzie na słužbie. Ciapier kantrakt moža być skasavany tolki pry sistematyčnym parušeńni jaho ŭmoŭ (za dva i bolš prastupkaŭ na praciahu hoda).

U novaj redakcyi zakona ab voinskim abaviazku i słužbie ŭdakładnieny asobnyja pałažeńni i normy pa pytańniu voinskaha ŭliku i prachodžańnia vajennaj słužby.

Pavodle BIEŁTA

• 0
• 0
• 0
• 0
• 0
• 0
• 0
• 0