Ci sapraŭdy karystańnie sacyjalnymi sietkami vyklikaje pryvykańnie? Daśledčyki padzialilisia novymi vysnovami 

Novaje daśledavańnie pakazała, što skaračeńnie času karystańnia sacsietkami ŭvohule nie mianiaje žadańnie čałavieka viarnucca ŭ internet. Heta kaža pra toje, što sacsietki ŭ bolšaści ludziej nie vyklikajuć sapraŭdnaha pryvykańnia. Pra heta dniami napisaŭ bujny časopis Science. 

Apošnija hady naziraŭsia chutki rost karystalnikaŭ sacsietak, tamu ludzi zaniepakoilisia tym, što praźmiernaje ich vykarystańnie moža mieć niehatyŭnyja nastupstvy dla arhanizma čałavieka.

Rehularna pravodzilisia roznyja daśledavańni, jakija pakazvali, što praźmiernaje vykarystańnie, naprykład, instahrama źviazana z pavyšeńniem tryvožnaści i depresii. Časam navukoŭcy śćviardžali, što admova ad sacsietak mahła b mieć takija ž efiekty, jak i detoks u narkazaležnych.

Adnak vyniki takich nazirańniaŭ vyklikali pytańni. Choć niekatoryja ludzi i adčuvali siabie bolš ščaślivymi paśla tak zvanaha ličbavaha detoksu, u toj ža momant inšyja navat nie zaŭvažali istotnaj roźnicy pamiž svaim samaadčuvańniem da i paśla admovy ad sacsietak. Mienavita z hetaj pryčyny navukoŭcy z Daremskaha ŭniviersiteta (Vialikabrytanija) nie śpiašalisia vykarystoŭvać termin «zaležnaść» u kantekście sacyjalnych sietak.

Dla svajho ekśpierymientu psichołahi z Daremskaha ŭniviersiteta Nikałas Ichsen i Majkł Uodśli paprasili 51 studenta ŭstanovy admovicca ad sacyjalnych sietak na tydzień, ale nie abmiažoŭvali dostup da ich. Apytańni studentaŭ adnačasova fiksavali ŭzrovień ich emacyjnaha dabrabytu i kolkaść času, jaki jany tracili na dadatki dla smartfonaŭ. Psichołahi takim čynam chacieli vyśvietlić, jak ustrymańnie ad sacyjalnych miedyja ŭpłyvaje na emacyjnaje zdaroŭje čałavieka.

«Vyniki nazirańnia pakazali poŭnuju adsutnaść źmienaŭ u žadańni karystacca sacyjalnymi sietkami na praciahu tydnia. Ničoha nie źmianiłasia. Heta dakazvaje toje, što staŭleńnie ludziej da sacsietak adroźnivajecca ad zaležnaści ad narkotykaŭ, dzie pry ŭstrymańni možna było b čakać łomki», — piša časopis Science sa spasyłkaj na daśledavańnie. 

Ale ŭsio ž taki detoks ad sacsietak pa-roznamu paŭpłyvaŭ na ludziej. Niekatoryja dzialilisia, što adčuvali pamianšeńnie kolkaści niehatyŭnych emocyj, a inšyja kazali, što i pazityŭnych emocyj stała mienš. Heta, jak kaža psichołah Nikałas Ichsien, z-za taho, što čałaviek nie maje mahčymaści radavacca za toje, što, naprykład, jaho fota ŭ instahramie spadabałasia vialikaj kolkaści ludziej, bo čałaviek hetaha nie bačyć.

Nie ŭsie navukoŭcy, adnak, acanili hety ekśpierymient. Niekatoryja prakamientavali, što adzin tydzień niedastatkovy dla taho, kab pabačyć istotnyja źmieny, a inšyja śpiecyjalisty paličyli, što kolkaść udzielnikaŭ dla takoha daśledavańnia taksama niedastatkovaja.

Psichołahi z Daremskaha ŭniviersiteta na heta adkazali, što pakolki emocyi ŭ studentaŭ u asnoŭnym stabilizavalisia praź niekalki dzion, to doŭhi čas ekśpierymientu nie źmianiŭ by situacyju istotna, pieradaje Science.

«Cikava, što paśla skančeńnia ekśpierymientu 7 čałaviek usio ž taki vyrašyli praciahnuć admovu ad sacsietak. Bolšaść z udzielnikaŭ u vyniku značna skaraciła čas karystańnia sacsietkami. Mahčyma, što navat taki karotkaterminovy pierapynak moža dapamahčy ludziam navažycca admovicca ad instahrama, fejsbuka i tvitara», — adznačyli psichołahi.

Čytajcie taksama:

Intensiŭnaść vykarystańnia mabilnika ŭpłyvaje na jakaść śpiermy — navukoŭcy

U dziaciej, jakija zadoŭha siadziać pierad televizaram ci ŭ telefonie, bolšaja ryzyka źjaŭleńnia sardečnych chvarob

Vyśvietliłasia, kolki b hrošaj zhubiła Biełaruś za adzin dzień bieź internetu 

• 2
• 0
• 0
• 0
• 1
• 0
• 0
• 0