Syn Sachaščyka: Sistema prymusiła b mianie stać Paŭlikam Marozavym i zdradzić svajmu baćku

Major Alaksandr Sachaščyk zakončyŭ fakultet vajskovaj raźviedki i fakultet Hienieralnaha štaba Uzbrojenych sił Vajskovaj akademii. Jon słužyŭ u 33-m asobnym atradzie śpiecyjalnaha pryznačeńnia kamandavańnia sił śpiecyjalnych apieracyj.

Intervju ź im vyjšła na kanale Valeryja Sachaščyka.

Jak uciakaŭ ź Biełarusi

Alaksandr zhadvaje, što paśla taho, jak jaho baćka 27 lutaha 2022 hoda vystupiŭ sa zvarotam da biełaruskich vajskoŭcaŭ, jamu daviałosia zrabić svoj vybar.

«Acaniŭšy reakcyi kamandavańnia sił śpiecyjalnych apieracyj, kontrykaŭ (kontraźviedčykaŭ — NN), jakija byli za nami zamacavanyja, i dobra razumiejučy, jak pracuje heta mašyna, ja acaniŭ situacyju i zrazumieŭ, što ŭ mianie, pa sutnaści, dźvie ściežki, jakimi ja mahu dalej ruchacca.

Pieršaja — tancavać pad dudku sistemy, jakaja rana ci pozna prymusiła b mianie da taho, kab ja staŭ Paŭlikam Marozavym i zdradziŭ svajmu baćku i svaim unutranym intaresam i pačućciam. Mahčyma, mianie b prymusili dać niejkija intervju, padobnyja da tych, što davali Biełakonieŭ i Dzienisienka.

Druhaja ściežka — ja admaŭlajusia heta rabić. Pierśpiektyva taksama niecikavaja z-za taho, što mahło b być sa mnoju ŭ krainie. Tamu ja vybraŭ treci varyjant — pakinuć terytoryju Respubliki Biełaruś».

Pa słovach Alaksandra, jak tolki rašeńnie było pryniata, dalej užo byŭ «techničny składnik»:

«Dobra, što ja vałodaju viedami i navykami, jakija dazvalajuć pierajści miažu. U mianie było raspracavana niekalki maršrutaŭ, varyjantaŭ. Asnoŭnyja, zapasnyja. Dalej zastavałasia stvaryć umovy, kab pra mianie na niekatory čas zabylisia. Što ŭ mianie, u pryncypie, i atrymałasia».

Alaksandr pierajšoŭ biełaruska-litoŭskuju miažu, jakaja dla jaho była «samaj znajomaj, zrazumiełaj i prostaj».

«Było niekalki maršrutaŭ. Samy reziervovy byŭ kala 35-40 kiłamietraŭ biez dapamožnych srodkaŭ.

Ja zakryvaŭ vočy i dakładna sabie ŭjaŭlaŭ huhł-kartu, miascovyja aryjenciry, pa jakich ja ruchajusia. I dakładna viedaŭ, kudy ja vyjdu. Śpiecyfika była ŭ tym, što biaśpiečniej było heta rabić dniom. Pierapłyŭ raku, łamaŭ lod. Jość taki narmatyŭ — pieraadoleńnie vodnaj pieraškody. Usio, jak vučyli. Pierapłyŭ na toj bok, apranuŭsia i pajšoŭ zdavacca miascovym pamiežnikam».

Pra dziacinstva i vybar prafiesii

Uspaminy pra dziacinstva vyklikajuć u Alaksandra tolki stanoŭčyja emocyi. «Ja dakładna nie nazavu siabie pasłuchmianym dziciem. Dastatkova šmat było epizodaŭ, kali čužyja baćki skardzilisia na mianie maim baćkam. Vyklikali ŭ škołu. Ja prychodziŭ z raźbitym tvaram i raźbitymi rukami.

Kožny baćkoŭski schod u škole zakančvaŭsia surjoznaj razmovaj pa dušach z baćkam. Zaŭsiody było adno rytaryčnaje pytańnie: «Čamu…?» U starejšych kłasach (9—11-m) u mianie byŭ šanc adkazać «čamu» ŭ sparynhu z maim baćkam.

Jość prykłady siarod maich znajomych, kali ich baćki prosta, miakka kažučy, davali im kuchtaloŭ, a ŭ mianie byŭ šanc zaŭsiody adstajać svaje intaresy. I ja liču heta pravilnym, bo z pryčyny ŭzrostu (junačy maksimalizm), tabie padajecca, što ty robiš niešta sapraŭdy pravilnaje. Ciapier, viartajučysia da taho času, pa-inšamu ŭsio aceńvaješ i razumieješ, što mamka pravilna havaryła zimoju, kab nadzieŭ šapku. A tabie padavałasia, što šapka z pamponam nie nadta kruta.

Baćka staraŭsia mianie vychoŭvać zaŭsiody tak, kab mnie nikoli nie było soramna za tyja ŭčynki, jakija ja ździejśniŭ. Na hetym i budavałasia ŭsio vychavańnie — sumlennaść, prystojnaść. Dužyja abaraniajuć słabych. I hetyja prostyja iściny zakładvalisia z samoha dziacinstva…. Ja nie škaduju, jakim čałaviekam vyras dziakujučy tamu vychavańniu, jakoje mnie dali baćki».

Dziacinstva ŭ vajennym haradku vyznačyła i vybar prafiesii:

«Ja naradziŭsia i vyras u vajskovym haradku. Majo dziacinstva mała čym adroźnivałasia ad dziacinstva maich siabroŭ. My pravodzili dastatkova šmat času na terytoryi 38-j bryhady. Ja chadziŭ na palavyja vychady z raźviedvalna-desantnaj rotaj i ŭdzielničaŭ u pakazalnych vystupach.

U pryncypie dastatkova šmat času pravodziŭ na słužbie ŭ baćki. Tamu pytańnie vybaru prafiesii pierad mnoju nie stajała. Ja viedaŭ, što budu vajennym, viedaŭ, jakija dyscypliny treba padciahnuć — fizika, matematyka, ruskaja mova, — kab zdać centralizavanaje teściravańnie. Ja zajmaŭsia sportam i viedaŭ, što kali nie pastuplu, to pajdu prachodzić terminovuju słužbu i budu sprabavać na nastupny hod pastupić», — zhadvaje Sachaščyk.

Mužčyna raspavioŭ, što z baćkam było tolki adzinaje roznahałośsie pierad vypuskam z Vajennaj akademii:

«Jamu chaciełasia, kab ja išoŭ słužyć u adnu z desantnych bryhad. A mnie chaciełasia trapić u adzin z aficerskich atradaŭ. Na hetuju temu ŭ nas było dastatkova burnaje abmierkavańnie, šmat sprečak. Ale vybar ja pakinuŭ za saboju».

Pra adnosiny z maci

Alaksandr Sachaščyk raspavioŭ, što pazicyja jaho mamy kardynalna adroźnivajecca ad pazicyi baćki.

«Jana ŭ mianie prosty čałaviek — doktarka-piedyjatr — i nie cikavicca palitykaj tak, jak cikaviacca joj inšyja. Jana žyvie adna (jany z baćkam raźviedzienyja dastatkova daŭno), i ŭ pryncypie, na hetyja temy my ź joj nikoli nie razmaŭlali. U jaje svoj śvietapohlad. Jana dastatkova vierujučy čałaviek, tamu niejkija temy my prosta nie padymajem. Kožny čałaviek vieryć u svaich demanaŭ i ŭ toje, što jamu bolš padabajecca».

Pa słovach mužčyny, jon nikoli šmat nie raspaviadaŭ maci pra svaju słužbu, tamu pra toje, što syn apynuŭsia na terytoryi Jeŭrapiejskaha sajuza jana daviedałasia pastfaktum. 

Čym ciapier zajmajecca

Alaksandr ciapier uvachodzić u Departamient nacyjanalnaj biaśpieki (pry Abjadnanym pierachodnym kabiniecie), jakim kiruje jaho baćka. Tam mužčyna zajmaje pasadu načalnika štaba.

«Departamient abjadnaŭ dastatkova mocnych asobaŭ, u jakich vajskovaje minułaje. Jany prachodzili słužbu ŭ Biełarusi na roznych pasadach, jak u vojskach, tak i ŭ štabach, majuć kałasalny dośvied. Heta ludzi, jakija nie zhodnyja z tym, što ciapier adbyvajecca ŭ Biełarusi, tamu apynulisia pa hety bok płotu».

Departamient zajmajecca analizam i pradstaŭleńniem infarmacyi kiraŭniku dla pryniaćcia rašeńniaŭ. Na bazie hetaj infarmacyi ŭnosiacca peŭnyja prapanovy dla raboty Abjadnanaha pierachodnaha kabinieta.

Akramia hetaha supracoŭniki departamienta zajmajucca pierapracoŭkaj asnoŭnych dakumientaŭ — Vajennaj daktryny, Kancepcyi nacyjanalnaj biaśpieki.

Treci napramak pracy — dapamoha ŭkrainskamu narodu ŭ baraćbie z rasijskim ahresaram. U pryvatnaści, heta pieršaja biełaruskaja desantna-šturmavaja rota, jakaja vajuje ŭ 79-j desantna-šturmavoj bryhadzie na danieckim napramku.

Pa słovach Alaksandra, z pačatkam sumiesnaj pracy adbylisia źmieny ŭ adnosinach z baćkam: «Samaj hałoŭnaj źmienaj stała toje, što našy adnosiny ŭ ramkach słužbovaj dziejnaści nabyli bolš aficyjny charaktar. Zjaviŭsia načalnik i padnačaleny — toje, čaho raniej u našym žyćci nie było».

Čytajcie jašče:

Rota Sachaščyka abjaviła nabor vajskovych śpiecyjalistaŭ

Valeryj Sachaščyk raskazaŭ pra svaju žonku i dziaciej

• 70
• 0
• 7
• 2
• 3
• 5
• 10
• 0