Biełaboty, rasijskija ladovyja šou i katy. Čym buduć zabaŭlać biełaruskich dziaciej pad Novy hod

Hałoŭnaja jołka krainy

Pa tradycyi kožny hod u vialikaj zale Pałaca Respubliki pravodziać «hałoŭnuju jołku krainy», kudy prychodzić Łukašenka.

Sioleta jamu pakažuć śpiektakl «Mašyna Navahodniaha času». Siužet nie vielmi aryhinalny. Chitry złodziej Šnups i jaho pamahatyja łamajuć mašynu Navahodniaha času i chavajuć Dziadulu Maroza. Śniahurka i jaje siabroŭka Mira źviartajucca pa dapamohu da troch supierhierojaŭ Biełabotaŭ (tak nazvali biełaruskich transformieraŭ).

Pakazvajuć hety śpiektakl z 23 śniežnia pa 5 lutaha. Kvitki kaštujuć 15-25 rubloŭ u budni, 17-32 rubli ŭ vychadnyja.

Hałoŭnaja jołačka krainy

U małoj zale Pałaca Respubliki teatralny prajekt «TryTfarmaT» pakaža kazku «Vielmi novy hod»! Paznačana, što režysiorka — Taćciana Sambuk, a mastackaja kiraŭnica — Viera Palakova.

Tut siužet jašče bolš prosty: zamiest Dzieda Maroza i Śniahurki na śviata prychodziać pieraapranutyja baba Jaha i Lasun.

Skazku buduć pakazvać z 21 śniežnia pa 7 studzienia. Košt kvitkoŭ — 15,50-23,50 rubla ŭ budnyja dni i 17,50-28,50 rubla ŭ vychadnyja.

«Samaja lepšaja jołka. Kaśmičnaje padarožža»

Kancertnaja zała «Minsk» abiacaje padčas śpiektakla interaktyŭnyja hulni z załaj, a taksama padarunki kožnamu dziciaci. Dziejańnie kazki «Samaja lepšaja jołka. Kaśmičnaje padarožža» pačynajecca na płaniecie Technaśviet, dzie žyvuć robaty. Jany atrymali ad ziamlan zaprašeńnie na navahodniaje śviata, adnak złydzień Siryus, daviedaŭšysia, što robaty źbirajucca ŭ padarožža, usialak hetamu pieraškadžaje.

Pavialičyć

Pakazy śpiektakla adbuducca z 23 pa 29 śniežnia. Kvitki kaštujuć 17.50-31.50 rubloŭ.

U hości da Dzieda Maroza pa Dziciačaj čyhuncy

Pieršy «Navahodni ekspres» na Dziciačaj čyhuncy startuje ad stancyi Zasłonava 23 śniežnia, a apošni adbudziecca 7 studzienia. Šlach u adzin bok da Dzieda Maroza zajmaje 20 chvilin. Potym maleńkich i darosłych čakaje teatralizavanaje pradstaŭleńnie z udziełam piersanažaŭ ź dziciačych kazak i multfilmaŭ, a taksama Dzieda Maroza i Śniahurki.

Kvitki raskuplajuć vielmi chutka: prodaž startavaŭ 12 śniežnia. Kaštujuć jany 26 rubloŭ.

Pavialičyć

«Marozka» ad Illi Avierbucha

Srebny pryzior Alimpijady Illa Avierbuch, jaki nieadnarazova vykazvaŭsia ŭ padtrymku vajny va Ukrainie (i, darečy, maje škołu ŭ akupavanym Krymie), płanuje trojčy sabrać na navahodnija śviaty «Minsk-Arenu».

Jon viazie ŭ biełaruskuju stalicu śpiektakl na lodzie «Marozka». U rekłamie šou Avierbuch kaža pra toje, što ruskija kazki vučać dziaciej viečnym kaštoŭnaściam — dabru i spraviadlivaści.

Šou pakažuć 23 śniežnia ažno try razy zapar. Kvitki kaštujuć 25-95 rubloŭ.

«12 miesiacaŭ» u roznych haradach Biełarusi

Jašče adna alimpijskaja pryziorka z Rasii praviazie svajo ladovaje šou pa roznych haradach Biełarusi. Iryna Słuckaja prezientuje «12 miesiacaŭ» u pieryjad z 21 pa 30 śniežnia. Heta kaściumiravanaje muzyčnaje ladovaje šou.

Košt kvitkoŭ zaležyć ad miesca praviadzieńnia. Ale aryjentavacca možna na sumu ad 13 da 49 rubloŭ.

Pavialičyć

«Śniahurka» ŭ Biełdziaržcyrku

Adzin z najbolš papularnych varyjantaŭ dziciačych navahodnich zabaŭ dla dziaciej z roznych haradoŭ Biełarusi — heta šou ŭ Biełdziaržcyrku. Tamu na šmat jakija daty ŭžo zastałosia litaralna adzin-dva kvitki.

Navahodniuju cyrkavuju prahramu «Śniahurka» buduć pakazvać z 16 śniežnia pa 14 studzienia. Kvitki kaštujuć 13-153 rubli.

«Mahija kryštala» ŭ «Čyžoŭka-Arenie»

Jašče adno cyrkavoje šou pakažuć u «Čyžoŭka-Arenie». Nazyvajecca jano «Mahija kryštala». Arhanizatary abiacajuć vystupy najlepšych biełaruskich artystaŭ.

Buduć kaskadziory na viełasipiedach, pavietranyja himnastki na pałotnach, dresiravanyja chaski i małamuty, ekvilibrysty, žanhlory. Upieršyniu na arenie hledačy ŭbačać vystupleńnie motakaskadzioraŭ na spartyŭnych bajkach.

Pakazy adbuducca 22-24 śniežnia. Kvitki kaštujuć 16,50-54,50 rubla. Dzieci da šaści hadoŭ mohuć prychodzić biaspłatna (ale asobnaha miesca ŭ hetym vypadku nie praduhledžana).

Konnaje navahodniaje šou ŭ Ratamcy

U hetym hodzie haściej zaprašaje Respublikanski centr alimpijskaj padrychtoŭki konnaha sportu i koniehadoŭli. Tut padrychtavali konnaje šou pad nazvaj «Bremienskija muzyki».

Adbudziecca jano 23-25 i 27-28 śniežnia. Kvitki kaštujuć 23 rubli.

Pavialičyć

Mulciašnyja saŭndtreki na «Minsk-Arenie»

Imperial Orchestra viartajecca ŭ Minsk z navahodniaj prahramaj dla dziaciej i darosłych. Zaviecca jana «Navahodniaje padarožža ŭ Multylend». Abiacajuć dźvie hadziny piesień ź lubimych multfilmaŭ, jakija vykanajuć 120 artystaŭ pad kiraŭnictvam dyryžiora Iosifa Nurdajeva. Zapłanavana taksama maštabnaje multymiedyjnaje i śvietłavoje šou.

Adbudziecca kancert «CINEMA MEDLEY: Navahodniaje padarožža ŭ Multylend» na «Minsk-Arenie» 13 studzienia. Kvitki kaštujuć 32-225 rubloŭ.

Teatr kotak

Na studzień zapłanavany vystup Kaciaryny Kukłačovaj, dočki taho samaha znakamitaha stvaralnika teatra kotak. U staličnym Pałacy kultury čyhunačnikaŭ jana pakaža śpiektakl «Kotki ŭ haściach u Babki-Jožki».

Fota z sajtu kvitki.by

Adbuducca pakazy 6 i 7 studzienia. Kvitki kaštujuć 29-38 rubloŭ.

• 0
• 0
• 0
• 3
• 1
• 0
• 1
• 0