«Chaładniej za -32°C pakul nie było». Navalny, jakoha kinuli za palarny kruh, z samaironijaj raspavioŭ pra svaje novyja ŭmovy
Apazicyjaniera Alaksieja Navalnaha, jakoha pieraviali ŭ kałoniju asobaha režymu «Palarny voŭk» na Jamale, znoŭ adpravili ŭ štrafny izalatar. U kanale palityka źjaviŭsia jahony apovied pra novyja ŭmovy ŭtrymańnia. Prynamsi, pačućcia humaru Navalny pakul nie straciŭ.
«Dumka pra toje, što Pucin zadavoleny tym, što ŭpiok mianie ŭ barak na Krajniaj Poŭnačy, i ciapier mianie pierastanuć muryžyć u ŠIZA, była nie tolki maładušnaj, ale i naiŭnaj.
Tolki ja vyjšaŭ z karancinu, jak «asudžany Navalny admoviŭsia pradstavicca pa formie, na vychavaŭčuju pracu nie reahuje, naležnych vysnoŭ dla siabie nie robić». 7 sutak ŠIZA».
Navalny raspaviadaje, što tych, chto ŭ ŠIZA, na prahułku vyvodziać u samy luty maroz — na śvitanku.
«Pryhožaja detal: u štrafnym izalatary trochi inšy rasparadak dnia. U zvyčajnym — prahułka paśla abiedu, i choć ciapier palarnaja noč, usio roŭna paśla abiedu na niekalki hradusaŭ ciaplej.
A ŭ ŠIZA prahułki a 6:30 ranicy. Ale ja ŭžo paabiacaŭ sabie, što budu staracca vychodzić na špacyr u luboje nadvorje», — raspavioŭ palityk.
Navalny apisaŭ svoj prahułačny dvor: 11 krokaŭ ad ściany i 3 da ściany — «asabliva nie razhulaješsia».
«Chaładniej za -32°C pakul nie było. Ale navat i pry takoj tempieratury bolš za paŭhadziny možna špacyravać, tolki kali paśpiavać adroščvać novy nos, vušy i palcy. Mała što tak badzioryć, jak prahułka na Jamale ŭ 6:30 ranicy. A ŭžo jaki vydatny śviežy vietryk zadzimaje ŭ dvor, niahledziačy na bietonny płot, prama uch!» — iranizuje palityk.
Navalny pryjšoŭ da dumki, što hieroj Leanarda Dy Kaprya ź filma «Vyžyły» ŭ jaho ŭmovach nie ŭratavaŭsia b.
«Siońnia voś hulaŭ, miorz i dumaŭ pra Leanarda Dy Kaprya i truki jaho hieroja ź miortvym kaniom u filmie «Vyžyły». Nie dumaju, što tut by heta spracavała. Miortvy koń tut by pramiorz chvilin za 15.
Tut patrebny słon, haračy słon, smažany. Kali razrezać žyvot razahretamu słanu i zaleźci ŭ jaho, to niejki čas možna pahrecca. Ale dzie ja na Jamale vaźmu haračaha smažanaha słana, dy jašče i a 6:30 ranicy? Pryjdziecca mierznuć», — napisaŭ Navalny.
U pačatku śniežnia paplečniki palityka stracili ź im suviaź, amal try tydni nie było viadoma, dzie jon. Paźniej vyśvietliłasia, što jon u PK-3 «Palarny voŭk» u Jamała-Nienieckaj aŭtanomnaj akruzie.
Umovy tam žorstkija, z asobym režymam, u zonie viečnaj mierzłaty. «Tudy vielmi składana dabracca i heta maksimalna mahčymy ŭzrovień izalacyi ad śvietu», — raspaviali paplečniki palityka.
Da taho ž, Navalnaha ŭvieś čas sadžajuć u ŠIZA pad roznymi padstavami. Da ciapierašniaj kałonii jaho 23 razy adpraŭlali ŭ ŠIZA.
Braty-bliźniaty pryjšli pracavać u milicyju. Adzin ź ich pierapłyŭ raku i ŭciok ź Biełarusi, kab nie zajmacca palityčnymi spravami. Pahutaryli ź im1111
Kamientary