U viadomaha aŭtamabilnaha partała, jaki prypyniaŭ pracu praz najezd siłavikoŭ, źmianilisia ŭładalniki. Voś chto heta

Redakcyja ABW.BY 17 studzienia paviedamiła ab źmienie ŭładalnikaŭ: «Siońnia ŭ ABW.BY novyja zasnavalniki, jakija padchapili estafietu 30-hadovaj historyi haziety «Aŭtabiznes». 

Na sajcie vydańnia ŭ jakaści ŭładalnika pakazanaja kampanija «Bonustorh», jakaja vałodała partałam i raniej.

Adnak kali raniej joj vałodali Śviatłana Astašanka (90,1%) i z 1998 hoda ««Ślivki baj» (9, 9%), to z 19 studzienia imiony ŭłaśnikaŭ źmianilisia.

Ciapier heta Alaksiej Martynoŭski i Alaksiej Ćvirka, kožnamu ź jakich naležyć dola ŭ 50%, vynikaje sa źviestak Adzinaha dziaržrehistratara. 

Jašče ŭ 2021 hodzie na samim partale raspaviadali ab kampanii biznesmienaŭ. Ich nazyvali ŭładalnikami firmy WestMotors, jakaja pryvozić mašyny ŭ Biełaruś z-za miažy. 

Pierad zakryćciom partała, pra jakoje paviedamlałasia ŭ listapadzie minułaha hoda, u kampanii źmianiŭsia kiraŭnik. 30 kastryčnika im staŭ Aleh Lubinski.

Nahadajem, 28 kastryčnika minułaha hoda ŭ telehram-kanale HUBAZiK źjaviłasia videa zatrymańnia dyrektara partała ABW.BY Vitala Palakova. Jaho prymusili skazać, što jon braŭ udzieł u akcyjach pratestu, a taksama nazvać svoj zarobak. 

Pavodle źviestak siłavikoŭ, uładalniki sajta ABW.BY taksama źjaŭlalisia ŭłaśnikami slivki.by, bamper.by, restarana «Arbat», paba «Piena» i ŭ dadatak mieli DNŽ i inšy biznes u Jeŭrasajuzie. Siłaviki taksama pryhrazili tady ŭładalnikam biznesu, jakija, pavodle ich słoŭ, ciapier adpačyvajuć u ekzatyčnych krainach: «Stamilisia, nabirajucca sił. Jany im spatrebiacca. Chutka». 

Raniej u studzieni 2023 hoda sud Frunzienskaha rajona Minska prysudziŭ hałoŭnaha redaktara ABW.by Juliju Mudreŭskuju da 1,5 hoda kałonii pavodle artykuła ab parušeńni hramadskaha paradku, a redaktara śpiecprajektaŭ partała Juryja Hładčuka — da 2,5 hoda kałonii.

8 listapada zasnavalniki TAA «Bonustorh», jakomu naležyć ABW.by, paviedamili, što zakryvajuć prajekt. U zajavie jany pastaralisia dystancyjavacca ad suviazi hetaha rašeńnia z palityčnaj situacyjaj u krainie. 

19 listapada na sajcie ABW.by byŭ apublikavany raźvitalny list kalektyvu prajekta pad nazvaj «ABW.BY: zamiest epiłoha». U im redakcyja padziakavała svaim čytačam za addanaść, padtrymku i krytyku, rekłamadaŭcaŭ — za davier, a ekśpiertaŭ, pradstaŭnikoŭ DAI i inšych viedamstvaŭ, arhanizacyj i kampanij — za supracoŭnictva i pradstaŭlenuju mahčymaść rychtavać cikavyja i karysnyja materyjały.

• 1
• 0
• 1
• 3
• 0
• 0
• 26
• 0