Rasija hatovaja pieradać Ukrainie cieły zahinułych pry krušeńni Ił-76
Ułady RF śćviardžajuć, što na borcie znachodzilisia 65 vajennapałonnych.
Ukraina źviartałasia da rasijskich pradstaŭnikoŭ pa pytańni ab pieradačy cieł zahinułych pry krušeńni samalota Ił-76 u Biełharodskaj vobłaści, paviedamiła RIA Naviny ŭpaŭnavažany pa pravach čałavieka ŭ RF Taćciana Maskalkova.
«Takaja razmova była — ci hatovy rasijski bok addać cieły», — zajaviła ambudsmen.
Pa jajeie infarmacyi, rasijski bok hatovy pieradać cieły zahinułych.
«Tak, hatovyja, dla hetaha ŭsio nieabchodnaje z punktu hledžańnia pracedury majecca… Cieły mohuć być pieradadzienyja pavodle pracedur, jakija isnujuć», — dadała Maskalkova.
Ambudsmen zajaviła, što znachodzicca na suviazi z upaŭnavažanym Viarchoŭnaj Rady Dźmitryjem Łubincom. Jana śćviardžaje, što ŭ rasijskaha boku «jość paćvierdžańni i ŭsie DNK, jakija, pa zaklučeńni ekśpiertyzy, dazvalajuć zrabić identyfikacyju asoby» zahinułych pry krušeńni samalota.
***
Vajenna-transpartny samalot Ił-76 byŭ źbity 24 studzienia ŭ rajonie siała Jabłonava ŭ Biełharodskaj vobłaści. Minabarony Rasii śćviardžała, što na borcie byli 65 ukrainskich vajennapałonnych, jakich vieźli dla abmienu, i nazvała krušeńnie teraktam, abvinavaciŭšy ŭ im Ukrainu. Pa viersii Śledčaha kamiteta Rasii, samalot byŭ źbity rakietaj amierykanskaha kompleksu Patriot, vypuščanaj z rajona nasielenaha punkta Lipcy Charkaŭskaj vobłaści. Pra toje, što Ił-76 źbili rakietaj kompleksu Patriot, taksama paviedamlali amierykanskija čynoŭniki, nahadvaje «Mieduza».
Ułady Ukrainy paćviardžali, što abmien pałonnymi rychtavaŭsia, ale adznačali, što ŭ ich niama źviestak ab tym, ci byli na borcie vajskoŭcy Uzbrojenych sił Ukrainy. Sakratar Rady nacyjanalnaj biaśpieki i abarony (RNBA) Ukrainy Alaksiej Daniłaŭ paźniej zajaviŭ, što ŭkrainskich pałonnych na borcie samalota nie było.
38-hadovaha vajskovaha lotčyka sudziać za abrazu Łukašenki4
Kamientary