U Homieli zakryvajuć najbujniejšy spartyŭny kłub — pryčyny, napeŭna, palityčnyja
Homielski harvykankam admoviŭ u akredytacyi «Kłubu dziudo «Prajd». Hety papularny spartyŭny kłub z šyrokaj sietkaj załaŭ u Homieli i Žłobinie. U tym liku heta najbujniejšaja ŭ Biełarusi škoła dziudo.
«Prajd» naličvaje kala 50 hrup, u jakich zajmałasia bolš za tysiaču dziaciej. Kłub zasnavaŭ majstar sportu pa dziudo Kanstancin Palej. Jon nie raz stanaviŭsia hierojem publikacyj dziaržpresy, u pryvatnaści, paśla taho, jak adkryŭ hrupy dla dziaciej z asablivaściami raźvićcia, piša «Fłahštok».
U lutym Homielski harvykankam admoviŭ kłubu ŭ prachodžańni «dziaržaŭnaj akredytacyi na prava ažyćciaŭleńnia dziejnaści pa raźvićci fizičnaj kultury i sportu». Patrabavańnie ab akredytacyi spartyŭnych ustanoŭ, u tym liku fitnes-kłubaŭ, trenažornych załaŭ uviali z 1 studzienia 2024 hoda — dla praciahu pracy jany pavinny byli vykanać šerah umoŭ.
U rašeńni za podpisam staršyni harvykankama Uładzimira Pryvałava havorycca ab admovie «ŭ dziaržaŭnaj akredytacyi na prava ažyćciaŭleńnia dziejnaści pa raźvićci sportu (praviadzieńnie spartyŭnych mierapryjemstvaŭ i (abo) udzieł u ich) z pravam ažyćciaŭleńnia dziejnaści pa raźvićci fizičnaj kultury». Pryčynaj nazvana «nievykanańnie kryteryjaŭ dla prachodžańnia dziaržaŭnaj akredytacyi, zaćvierdžanych pastanovaj Savieta Ministraŭ Respubliki Biełaruś ad 28 červienia 2023 h. № 416».
Punkt 2.6, z-za jakoha nie projdzienaja akredytacyja, palityčny. Jon źmiaščaje takija kryteryi:
«Adsutnaść faktaŭ pryciahnieńnia da adkaznaści za niepavažlivaje staŭleńnie da dziaržaŭnych i hramadskich instytutaŭ, u tym liku dziaržaŭnych simvałaŭ Respubliki Biełaruś, kanstytucyjnaha ładu, kiraŭnika, namieśnikaŭ kiraŭnika arhanizacyi (…), a taksama adsutnaść faktaŭ pryciahnieńnia hetych asob da adkaznaści za ŭčynieńnie supraćpraŭnych dziejańniaŭ suprać paradku kiravańnia, hramadskaha paradku i hramadskaj maralnaści».
Viadoma, što ŭ 2020 hodzie zasnavalnik i staršynia kłuba Kanstancin Palej padviarhaŭsia administracyjnamu aryštu i padpisvaŭ zvarot spartyŭnaj hramadskaści dy zakliki da ŭładaŭ spynić hvałt.
U pabliku kłuba źjaviłasia videa, u jakim sam Kanstancin Palej prakamientavaŭ admovu ŭ akredytacyi. Jon raspavioŭ, što šmat hadoŭ kłub zajmaŭsia raźvićciom dziudo ŭ rehijonie i ŭsioj krainie, što padmacoŭvałasia vysokimi vynikami, padziakavaŭ usim, chto pryjazdžaŭ na turniry i sa škadavańniem adznačyŭ, što kłub bolš nie moža arhanizoŭvać spabornictvy:
«Heta źviazana z tym, što nam admovili ŭ akredytacyi — spasyłajucca na nievykanańnie kryteraŭ. U studzieni paŭstała pytańnie — jak dalej być? Adsutnaść trenirovak adbivajecca na stanie dziaciej. Ja rady, što hetaja situacyja doŭžyłasia nie vielmi doŭha».
Palej zajaviŭ, što źjaviŭsia čałaviek, jaki ŭziaŭ na siabie adkaznaść i vyrašyŭ «zhurtavać u novaj arhanizacyi ŭsie našy tradycyi». Heta Jaŭhien Siomačkin — biełaruski sambist i dziudaist, majstar sportu mižnarodnaha kłasa, načalnik kursa Homielskaha filijała ŭniviersiteta hramadzianskaj abarony MNS.
Jak patłumačyŭ Palej, Siomačkin stvaryŭ kłub «Leon», u jakim buduć pracavać treniery z kłuba «Prajd», tam ža buduć zajmacca i vychavancy.
Pra siabie Palej raspavioŭ, što, pakolki bolš nie moža kiravać arhanizacyjaj, budzie zajmacca svaim ułasnym rostam — jon pastupiŭ u Mižnarodnuju akademiju dziudo, dzie budzie atrymlivać adukacyju (vierahodna, idzie havorka pra Mižnarodnuju akademiju dziudo ŭ Kyrhyzstanie).
Vychavancam kłuba jon pažadaŭ stać sapraŭdnymi, prystojnymi ludźmi i hramadzianami krainy.
U śniežni 2023 hoda «Prajd» paśpieŭ pravieści ŭ Homieli mižnarodnaje spartyŭnaje śviata, jakoje składałasia ź sieryi maštabnych turniraŭ. Spabornictvy sabrali bolš za 1200 spartsmienaŭ. U ramkach śviata prajšoŭ Mižnarodny turnir pa dziudo Pride Cup III, u jakim udzielničali kala 600 spartsmienaŭ z Uźbiekistana, Kyrhyzstana, Tadžykistana, Kazachstana, Rasii i Biełarusi.
Kamientary