Što viadoma pra žychara Bresta, jakoha zatrymali za toje, što chadziŭ na palityčnyja sudy
28 sakavika MUS paviedamiła, što ŭ SIZA źmiaścili 40-hadovaha bieraściejca, jaki chadziŭ na sudy.
Jak paviedamlaje «Bresckaja viasna», havorka, chutčej za ŭsio, idzie pra 40-hadovaha Vitala Čopika. Roznyja svajaki palitviaźniaŭ, jak i ludzi jakich sudzili ŭ Breście pa palityčnych spravach, mahli jaho bačyć u sudach ciaham apošnich troch hadoŭ.
Toje, što na palityčnyja sudy Vital Čopik chadziŭ časta, zaŭvažyli taksama i bresckija prapahandysty. Jaho zdymali na kamieru paśla takich sudoŭ i sprabavali zadavać pytańni.
Adnojčy prapahandysty pryjšli na prysud pinčuku, jakoha sudzili za toje, što 27 lutaha 2022 hoda źniaŭ na videa vajskovy samalot i atrymaŭ dva hady kałonii. Zakadravy hołas u prapahandysckim videa pakazvaje ŭ kadry Čopika i nazyvaje mužčynu «zaŭsiodnikam» takich sudoŭ: «rehularna naviedvaje sudovyja pracesy, dzie abvinavačanyja — prychilniki apazicyjnych pohladaŭ».
Vitala Čopika nie pakidali biez uvahi i siłaviki. Viadoma, što ŭ mužčyny pravodzili pieratrus 1 śniežnia 2021 hoda.
A ŭ vieraśni 2022 hoda Čopika zatrymali spačatku pa artykule 19.11 KaAP, ale kali akazałasia, što ŭ mužčyny prosta niama telefona, dzie mohuć być niejkija «ekstremisckija materyjały», to skłali pratakoł užo pa art.24.23 KaAP. Padstavaj dla pratakoła staŭ bieł-čyrvona-bieły ściah, prylepleny skotčam znutry da akna doma. Mužčyna śćviardžaŭ, što ściah źjaviŭsia ŭžo paśla taho, jak jaho zatrymali i dastavili ŭ IČU.
Apošni vitok eskałacyi pamiž Čopikam i siłavikami zdaryŭsia ŭ pačatku sakavika hetaha hoda: bieraściejca znoŭ zatrymali. Pavodle źviestak pravaabaroncaŭ, paśla zatrymańnia mužčynu dastavili ŭ balnicu sa śladami mocnaha źbićcia, a koler tvaru Čopika byŭ žoŭtym (što moža kazać ab paškodžańni piečani praź źbićcio).
12 sakavika byŭ administracyjny sud pavodle art. 24.3 KaAP za nibyta niepadparadkavańnie patrabavańniam milicyi.
Jak vynikaje z rašeńnia suda, Čopik kazaŭ, što na praciahu adnoj chviliny adčyniŭ dźviery HUBAZiIKu dla pieratrusu — ale supracoŭnik HUBAZiKa śćviardžaŭ, što hučna patrabavaŭ adkryć dźviery cełych 20 chvilin.
HUBAZ chacieŭ trapić dadomu da Čopika, kab pravieści pieratrus, sankcyjanavany namieśnikam hienprakurora. Pieratrus pravodziŭsia ŭ miežach kryminalnaj spravy pa č. 1 art. 361-1 KK (stvareńnie, kiraŭnictva ekstremisckim farmavańniem).
28 sakavika MUS abviaściła, što źmiaściła mužčynu ŭ SIZA. Jaho padazrajuć u «sadziejničańni ekstremisckaj dziejnaści», č.1 art. 361-4 KK.
Kamientary