U Hłybokim u vyšuk abviaścili žurnalista i ŭsiu jaho siamju

Pra Źmitra Łupača paviedamlajecca, što jon «schavaŭsia ad śledstva», a taksama paznačany artykuł 361-4 (č. 1) Kryminalnaha Kodeksa RB (viarboŭka, inšaje ŭciahvańnie asoby ŭ ekstremisckuju dziejnaść, navučańnie, a taksama inšaje sadziejničańnie ekstremisckaj dziejnaści).

Žurnalist-fryłansier Źmicier Łupač byŭ vymušany źjechać ź Biełarusi paśla šmatlikich vypadkaŭ administracyjnaha pieraśledu za supracoŭnictva ź niezaležnymi ŚMI. Niepasredna pierad adjezdam u lipieni 2021 hoda jaho zatrymlivali na troje sutak u miežach kryminalnaj spravy, raspačataj za nibyta raspalvańnie varožaści. U śniežni 2023 hoda siłaviki praviali pieratrusy ŭ jahonaj kvatery ŭ Hłybokim, a taksama ŭ viaskovaj chacie, jakaja dastałasia Źmitru Łupaču ŭ spadčynu.

Hetaksama letaś u śniežni na Viciebščynie prajšła cełaja sieryja dopytaŭ i pieratrusaŭ u miežach kryminalnaj spravy, raspačataj suprać stvaralnikaŭ siužeta, źniataha ŭ Połacku i pakazanaha na telekanale «Biełsat» (miedyja abvieščanaje ŭ Biełarusi «ekstremisckim farmavańniem»). Źmicier Łupač nie vyklučaje, što pieratrusy ŭ jahonym žylli mahli być źviazanyja z hetaj spravaj, ale pra toje, što jaho asabista vinavaciać u «sadziejničańni ekstremizmu», jamu ničoha nieviadoma. Pozvy ŭ sud jon nie atrymlivaŭ, nijakich aficyjnych źviestak pra toje, što jon užo asudžany pa kryminalnym artykule, niama. Tamu zaličeńnie ŭ šerah «złačyncaŭ» jon ličyć paklopam.

Na hetym samym stendzie kala Hłybockaha RAUS raźmieščany i fotazdymki jahonych dziaciej — syna Valancina i dački Kaciaryny, jakija ciapier taksama žyvuć u zamiežžy. Pra Valancina Łupača napisana, što jon nibyta ŭchilajecca ad mierapryjemstvaŭ pa pryzyvie na vajskovuju słužbu ( č. 1 art. 435 KK RB), pra Kaciarynu Łupač — što jana «chavajecca ad śledstva», raspačataha na padstavie č. 1 art. 342 KK RB (Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich).

Śviatłana, starejšaja dačka Źmitra Łupača, užo asudžanaja pavodle hetaha artykuła i adbyvaje pakarańnie ŭ homielskaj PK № 4.

Sioleta 19 studzienia imia i proźvišča žančyny źjaviłasia ŭ «Pieraliku hramadzian Respubliki Biełaruś, zamiežnych hramadzian i asobaŭ biez hramadzianstva, datyčnych da ekstremisckaj dziejnaści». Biełaruskaja pravaabarončaj supolnaść pryznała jaje palitźniavolenaj. 

U hłybocki «śpis złačyncaŭ», abvieščanych takimi biez sudu i śledstva, trapiła i Ludmiła Barejka, jakaja prydumała łozunh «Stop tarakan». Śledčy kamitet raspačaŭ suprać jaje «śpiecvytvorčaść», bo žančyna taksama była vymušanaja źjechać za miažu.

• 0
• 4
• 0
• 6
• 4
• 8
• 43