Biełaruski pradprymalnik Mikałaj Vaskabojnikaŭ vyjhraŭ bujny turnir pa pokiery ŭ Čarnahoryi. Za pieramohu ŭ finale jon atrymaŭ kałasalnuju sumu — 4,737 młn dalaraŭ. Vaskabojnikaŭ pieramoh na hałoŭnaj padziei turniru prestyžnaj sieryi Triton Super High Roller Series u Čarnahoryi. Dla ŭdziełu ŭ turniry hulcy rabili ŭniosak u 125 tys. dalaraŭ.
Biełarus apošnim časam vystupaje na bujnych turnirach redka. Adnak amal zaŭsiody jon dachodzić da vyrašalnych stałoŭ. U finale hetaha turniru jon abyhraŭ čarnahorca Dejana Kaładžurdževiča. U šaści turnirach sieryi jon čatyry razy traplaŭ u finał — i ciapier atrymaŭ pieršuju pieramohu.
«Heta sapraŭdy dzivosnaje pačućcio. U mianie było dobraje pradčuvańnie niekalki miesiacaŭ tamu. Dumka pra pieramohu pryjšła mnie ŭ śnie», — padzialiŭsia adčuvańniami Vaskabojnikaŭ.
37-hadovy pokieryst pry hetym adznačyŭ, što amal 5 młn dalaraŭ — heta nie tyja hrošy, jakija źmieniać jaho žyćcio.
U rejtynhu na kaniec minułaha hoda Vaskabojnikaŭ byŭ piatym siarod biełaruskich pokierystaŭ pa pryzavych za karjeru — na toj momant jon zarabiŭ 2,773 młn dalaraŭ.
Tydzień tamu na hetym ža samym turniry ŭ Čarnahoryi, ale nie ŭ hałoŭnaj padziei, inšy biełarus Alaksiej Łasoŭski vyjhraŭ 1,3 młn dalaraŭ.
Jak ciapier vyhladaje palitźniavoleny Ihar Łosik FOTA7
Kamientary