Apielacyju žurnalista Karnieja adchilili, jon rychtujecca da kałonii, skardzicca na cyharetny dym
U listach z Mahiloŭskaha SIZA Ihar Karniej piša: «U kamiery amal usie kurać, uvieś prapach nikacinam», piša Radyjo Svaboda.
Viarchoŭny sud 7 červienia razhledzieŭ apielacyjnuju skarhu žurnalista Ihara Karnieja, jaki byŭ asudžany na 3 hady pazbaŭleńnia voli i štraf u 20 tysiač rubloŭ nibyta za ŭdzieł u ekstremisckim farmavańni.
Prysud Mienskaha haradskoha suda adnosna Ihara Karnieja pakinuli bieź źmienaŭ. Heta stała viadoma ad svajakoŭ žurnalista, jakija raniej musili vyjechać za miažu.
Apošnim časam Ihara Karnieja trymajuć u Mahiloŭskim SIZA i nie kažuć, dzie jon budzie adbyvać pakarańnie. Pra ŭmovy ŭtrymańnia žurnalista viadoma niašmat.
«Na zdaroŭje nie skardzicca. Charčavańnie siaredniaje, vahi nie nabiareš, ale ruchu nie chapaje, tamu nie schudnieŭ. Skardzicca tolki na cyharetny dym u kamiery. Kamiera raźličanaja na 18 čałaviek, ź ich, akramia jaho, tolki adzin nia kuryć. Praz heta naskroź prapach nikacinam», — paviedamiła svajačka Ihara Karnieja.
U Ihara Karnieja čatyry dački. U kancy traŭnia adna z dačok Karnieja zakončyła navučańnie ŭ prestyžnym univiersitecie ŭ ZŠA. Ale, pavodle svajakoŭ žurnalista, jon hetaj važnaj dla siamji naviny jašče nie viedaje.
«Praź internet anłajn nazirali cyrymoniju ŭhanaravańnia mahistraŭ univiersitetu, ale baćka nie maje takoj mahčymaści. Zamiest hetaha adukoŭvaje sukamiernikaŭ, bo bolšaść nie toje što ŭniviersitetaŭ, škoły nie zakančvali. Razmaŭlaje ź imi na biełaruskaj movie. Narakaje na biednaść turemnaj biblijateki, ale adznačaje, što ŭsio ž jość šmat biełaruskaj kłasiki. Čytaje Ryhora Baradulina, Pimiena Pančanku, Janku Kupału. Nastroj badziory, niahledziačy na ŭmovy. Rychtujecca da kałonii — vučycca hulać u nardy. Kaža, što tam heta prydasca», — raskazała pra Ihara Karnieja surazmoŭca.
Ihara Karnieja zatrymali ŭ lipieni 2023 hoda. Heta adbyłosia nieŭzabavie paśla pachavańnia palitviaźnia-mastaka Alesia Puškina, ź jakim žurnalist siabravaŭ. Biełaruskija pravaabaroncy pryznali Ihara Karnieja palitviaźniem.
Pavodle Biełaruskaj asacyjacyi žurnalistaŭ, u źniavoleńni ŭ Biełarusi znachodziacca 38 supracoŭnikaŭ miedyja.
«Jon užo doma». Dačka Ryhora Kastusiova raskazała pra pieršuju hutarku z baćkam paśla vyzvaleńnia1
«Jon užo doma». Dačka Ryhora Kastusiova raskazała pra pieršuju hutarku z baćkam paśla vyzvaleńnia
Rasiejskaja armija rychtuje novy ŭdar pa ŭkrainskaj abaronie — navat bolš mahutny, čym šturm Aŭdziejeŭki13
Kamientary