Pryjazdžaŭ na dzień-dva, lubiŭ chadzić na voziera
Antanina Bykava — žonka małodšaha z bratoŭ-Bykavych Mikałaja ŭ 2013 hodzie ŭ adnym ź intervju ŭzhadvała, jak Vasil Bykaŭ pravodziŭ svoj čas, kali jamu ŭdavałasia na paru dzion pryjechać u rodnuju viosku Byčki, što na Viciebščynie.
Antanina Bykava
Piśmieńnik zaŭsiody pryvoziŭ padarunki, plamieńnikam — cacki. Ledź nie pastajannym rytuałam dla jaho była prahułka da miascovaha voziera. Ale zatrymlivaŭsia na małoj Radzimie piśmieńnik niadoŭha, jak adznačaje Antanina Bykava: «Načavaŭ u asnoŭnym u našym domie. Nikoli ŭ Byčkach nie zatrymlivaŭsia. Dzień-dva pabudzie i źjazdžaje. U jaho zaŭsiody nie chapała času».
Svajačka Vasila Bykava adznačała, što kali litaratar byŭ u Minsku, to zaŭsiody dasyłaŭ list na adras viaskovaj kramy, dzie i pracavała spadarynia Antanina: «Pišycie mnie da zapatrabavańnia, ja ŭžo ŭ Minsku». Jana adznačała, što žyła siamja Bykavych niebahata i Vasil u asnoŭnym pryjazdžaŭ u Byčki hramadskim transpartam: «Pieršaja žonka była nastaŭnicaj, i nie achci jakuju zarpłatu atrymlivała. A Vasil zaŭsiody ŭ raźjezdach. U jaho hrošy razychodzilisia. Mašyny doŭha nie mieŭ. Usio aŭtobusam da nas pryjazdžaŭ. Kali z Hrodna ŭ Minsk pierajechaŭ, tady ŭžo ŭ jaho źjavilisia «Žyhuli»».
Zvyčajna piśmieńnik pryjazdžaŭ letam, kali ŭ vioscy šmat pracy. Kali ŭ 1984 hodzie Bykavu prysvoili zvańnie Hieroj sacyjalistyčnaj pracy, jon ź piśmieńnikami pryjazdžaŭ u škołu ŭ Kubličy, što ŭ kiłamietrach troch-čatyroch ad Byčkoŭ. Miascovaje kiraŭnictva z takoj nahody prapanavała arhanizavać bankiet, ale Bykaŭ admoviŭsia: ««Nie, chaču pabyć u kole rodnych». My ŭsie tady sabralisia razam. Vasil šmat nie piŭ — čaračku-dźvie. Ale ja jaho ni razu ŭ žyćci takim nie bačyła, jak u toj raz! Jon usiakuju ŭsiačynu raspaviadaŭ, takija aniekdoty! I ŭ takim nastroi byŭ! A zvyčajna ŭ jaho tak atrymlivałasia: u niekalkich słovach raspytaje i televizar hladzić abo hazietu čytaje», — dzialiłasia ŭspaminami spadarynia Antanina.
Klocki, vialiki dranik i amlet ź piečy
Spadarynia Antanina ŭzhadvaje, što Vasil Bykaŭ ranicaj u horadzie nikoli nie śniedaŭ, vyklučna piŭ kavu. A ŭ Byčkach zaŭsiody parušaŭ hetuju tradycyju: «Amlet na skvarkach — jaho lubimaja strava, — uzhadvaje svajačka piśmieńnika. — Jašče klocki lubiŭ. Uvohule, padabałasia jamu viaskovaja ježa, pryhatavanaja ŭ piečy. Časta paŭtaraŭ: «Ci to sprava — pieč, nie durań jaje prydumaŭ. Usio ŭ joj smačnaje!»».
Spadarynia Antanina ŭzhadvaje, što pry žyćci maci Vasil asabliva nie pryvoziŭ haściej. A adnojčy pryvioz u hości ažno vosiem piśmieńnikaŭ: «Pryjšoŭ da mianie: «Pakormiš nas?» — «Biezumoŭna». U vioscy pa-inšamu nijak. Dy i leta na dvary: svaje ahurki, pamidory. Da taho ž i skvarka była, i karova daiłasia», — raspaviadała svajačka Vasila Bykava.
Antanina Alaksandraŭna ŭspaminała, što piśmieńnik lubiŭ pałasavacca i vialikim dranikam. Užo potym, paśla śmierci Bykava, svajačka častavała takim dranikam i amletam na skvarkach ź piečy zamiežnych turystaŭ, što naviedvali dom-muziej u Byčkach.
Dom-muziej Vasila Bykava ŭ v. Byčki
Jak pryhatavać amlet, jaki lubiŭ Bykaŭ?
Hatujecca strava vielmi prosta i chutka. Amlet atrymlivajecca vielmi kałaryjny, chiba tamu Vasil Bykaŭ i dazvalaŭ sabie taki śniadanak tolki ŭ vioscy.
Sała lepš vybirać nie nadta toŭstaje, ź miakkaj skurkaj i miasnymi prasłojkami. Taksama spatrebiacca jajki, šklanka małaka, sol i pierac pa smaku. Pry žadańni možna dadać cybuli i zielaniny.
Pradukty dla pryhatavańnia amletu
Spačatku narezanaje advolna śvinoje sała absmažvajecca na suchoj patelni da załacistaha koleru. U hety čas jano vyłučaje šmat tłušču, na jakim potym i hatujecca strava.
Da sała dałučyć narezanuju cybulu i davieści taksama da załacistaha koleru.
Jajki raźbić u prydatnuju jomistaść i z dapamohaj videlca ŭźbić ich da stanu adnarodnaj vadkaści, dadaŭšy sol i pierac pa smaku.
Dadać małaka, jašče raz dobra ŭźbić i vylić na patelniu.
Pastavić u pieč, duchavuju šafu abo hatavać na plicie pad nakryŭkaj na nievialikaj tempieratury kala 7 chvilin. Jak vyparycca vadkaść, amlet uzydzie i budzie hatovy.
Pry padačy stravu možna pasypać pakryšanaj zielaninaj. Smačna jeści!
Nam spatrebicca:
- Sała śvinoje — 100 hramaŭ
- Małako — 50 mililitraŭ
- Jajka kurynaje — 3 štuki
- Cybula — 50 hramaŭ
- Sol, pierac, zielanina — pa smaku
Čytajcie taksama:
Top-6 najlepšych ekranizacyj tvoraŭ Vasila Bykava
Jak Łukašenka čarhovy raz drobna adpomściŭ Bykavu
Pahladzicie, jakija pryhožyja marki vypuściła da 100-hodździa Vasila Bykava Rada BNR FOTAFAKT
Haradziency źviarnulisia ŭ harvykankam nakont pomnika Bykavu, im adkazali
«Z dobraj enierhietykaj». U Hrodnie pradajecca kvatera, u jakoj žyŭ Vasil Bykaŭ
