«Minskaja spadčyna» znoŭ biarecca za klaštar biernardzincaŭ i kaścioł Sv. Jazepa
Navukovamu kiraŭniku abjekta historyka-kulturnaj spadčyny pieradadziena na ŭzhadnieńnie prajektna-kaštarysnaja dakumientacyja.
Našumieły prajekt pa pieraŭtvareńni terytoryi i budynkaŭ byłoha klaštaru biernardzincaŭ u hatelny kompleks padaje prykmiety žyćcia paśla amal trochhadovaha pierapynku.
Jak paviedamiŭ «NN» staršynia «Biełaruskaha dobraachvotnaha tavarystva achovy pomnikaŭ historyi i kultury» Anton Astapovič, «Minskaja spadčyna» pieradała prajektna-kaštarysnuju dakumientacyju na ŭzhadnieńnie navukovamu kiraŭniku abjekta Alaksandru Kropatavu.
«Heta moža aznačać chutki pačatak ramontna-restaŭracyjnych, ci, chutčej, ramontna-budaŭničych pracaŭ na terytoryi klaštaru», — miarkuje A. Astapovič. Pa jahonych słovach, kali raspracavany «Minskprajekt» prajekt budzie ažyćcioŭleny, da 70% aŭtentyčnaj zabudovy kompleksu budzie źniščana, najpierš unutranaja častka, freski.Staršynia Tavarystva achovy pomnikaŭ kaža, što za try hady zacišša prajekt amal nie źmianiŭsia. Ciapier Anton Astapovič rychtuje zvarot da kiraŭnictva krainy z chadajnictvam ab pieradačy klaštaru biernardzincaŭ katalikam. Jon paviedamiŭ taksama, što maje infarmacyju pra zvarot Mitrapalita Minska-Mahiloŭskaha, arcybiskupa Tadevuša Kandrusieviča da Alaksandra Łukašenki z takoj ža prośbaj. «Pa majoj infarmacyi, toj zvarot pieradadzieny z Administracyi na razhlad u Ministerstva kultury», — skazaŭ A. Astapovič.
Adkazny za ŚMI pry Sakrataryjacie Kanfierencyi Katalickich Biskupaŭ u Biełarusi Alaksandr Amialčenia prakamientavaŭ infarmacyju staršyni Tavarystva achovy pomnikaŭ nastupnym čynam:
«Tema hetaja zastajecca aktualnaj dla nas. My nie spynili našych namahańniaŭ pa viartańni kaścioła Sv. Jazepa i klaštara biernardzincaŭ. My nie robim heta ŭ formie manifiestacyj. Heta robicca ŭ formie zvarotaŭ, u tym liku piśmovych, u roznyja instancyi».
Viartańnia klaštara z kaściołam Śviatoha Jazepa ŭ Vierchnim horadzie minskija vierniki damahajucca bolš za 17 hadoŭ. U 2005 hodzie kiraŭnictva kaściołu ŭ Biełarusi źviarnułasia da ŭładaŭ z adpaviednym patrabavańniem. Adnak 25 maja 2005 hodu tahačasny staršynia Minharvykankamu Michaił Paŭłaŭ vydzieliŭ ź biudžetu srodki na rekanstrukcyju i restaŭracyju pomnika XVII—XVIII st., kompleksu budynkaŭ №6, 8 pa vulicy Kiryły i Miafodzija z prystasavańniem pad hatelny kompleks i abjekty handlova bytavoha pryznačeńnia. U sakaviku 2007 hoda prajekt pieraŭtvareńnia klaštara ŭ hatel trapiŭ u ŚMI. Vierniki pačali kampaniju pa abaronie bažnicaŭ. Pad ścienami kaściołu Sv. Jazepa rehularna ładzilisia supolnyja malitvy, byli sabranyja tysiačy podpisaŭ pad zvarotam da kiraŭnika dziaržavy za viartańnie viernikam śviatyniaŭ. U krasaviku taho ž hoda Biełaruskaja respublikanskaja navukova-mietadyčnaja rada pa pytańniach historyka-kulturnaj spadčyny pry Ministerstvie kultury Biełarusi adobryła pieradprajektnuju prapanovu pa rekanstrukcyi i prystasavańni budynkaŭ byłoha klaštaru biernardzincaŭ pad hatelny kompleks. Pry hetym Rada prapanavała zaviaršyć navukova-daśledčyja pracy i dapracavać prajekt. A potym inicyjatary prajektu ŭziali trochhadovuju paŭzu.
***
Klaštar biernardzincaŭ zasnavany ŭ 1624 h. Fundavali Andrej i Jan Kansoŭskija. Paśla pažaru da 1652 h. byŭ zbudavany kamienny kaścioł i klaštar. Paśla rekanstrukcyi 1752 budynki nabyli ciapierašnija rysy. U 1864 h. kaścioł prystasavali pad pravasłaŭnuju pałkavuju carkvu Sv.Kiryła i Miafodzija (z 1872 h. pad archiŭ), a karpusy pad kazarmy Kałomienskaha piachotnaha pałka i śledčuju kamisiju. U 1983 h. kaścioł častkova restaŭravany (arch. H. Bosak).
Kali Kanapackaja stała całkam padkantrolnaja Łukašenku?22
Kamientary