Redakcyja New York Times zaklikała Bajdena źniać svaju kandydaturu z vybaraŭ
Redakcyjnaja kalehija amierykanskaj haziety The New York Times apublikavała zajavu z zahałoŭkam «Kab słužyć svajoj krainie, prezident Bajden pavinien pakinuć honku».
Žurnalisty vydańnia ličać, što dziejny prezident «užo nie toj, jakim byŭ čatyry hady tamu», i aścierahajucca, što jon nie zmoža pieramahčy Donalda Trampa na prezidenckich vybarach.
NYT zaklikaje Bajdena sastupić miesca bolš «pierakanaŭčamu» i «enierhičnamu» kandydatu ad demakrataŭ, pierakazvajuć artykuł «Aściarožna, naviny».
«Samaje vialikaje hramadskaje słužeńnie, jakoje ciapier moža akazać spadar Bajden — heta abviaścić, što jon nie budzie praciahvać bałatavacca na pieraabrańnie», — zaklikajuć reparciory NYT.
Redakcyja haziety stanoŭča vykazvajecca ab palitycy Džo Bajdena, ale minułyja teledebaty z Trampam ličyć pravalnymi, bo na ich Bajden paŭstaŭ jak «cień vialikaha dziaržaŭnaha słužačaha» i «ź ciažkaściu adkazvaŭ na pravakacyi» apanienta.
U artykule taksama havorycca, što Dempartyi ZŠA zanadta ryzykoŭna mierkavać, što amierykancy nie źviernuć uvahi na ŭzrost i niemač Bajdena. A dla pieramohi demakratam treba być sumlennymi i pryznać, što jon nie moža praciahvać honku.
Z nahody vystupu Trampa na teledebatach NYT zajaviła, što jon «nachabna i šmatkroć chłusiŭ ab svaich dziejańniach i supierniku». «Jon apisaŭ płany, jakija naniasuć škodu amierykanskaj ekanomicy, padarvuć hramadzianskija svabody i sapsujuć adnosiny Amieryki ź inšymi krainami», — piša pra Tramp NYT.
U čaćvier u ZŠA prajšli pieršyja teledebaty pamiž Bajdenam i Trampam — asnoŭnymi kandydatami na nastupnych vybarach prezidenta ZŠA.
Pavodle apytańnia CNN (ličycca prademakratyčnym), 67% hledačoŭ nazvali Trampa pieramožcam na vybarach. Niahledziačy na parazu ŭ debatach, štab Bajdena zajaviŭ, što prezident nie pakinie pieradvybarnuju honku.
60-ja vybary prezidenta ZŠA zapłanavany na 5 listapada 2024 hoda. U listapadzie Džo Bajdenu spoŭnicca 82 hady.
Akaŭnt Kabančuka ŭzłamali — ale ci biełaruskija śpiecsłužby?3
Kamientary
Dazvalaju stavić mnie załatyja rostavyja pomniki ŭ parkach kultury i adpačynku rabotnika na sialancy