U Budsłavie prajšła tradycyjnaja načnaja pracesija sa śviečkami FOTAREPARTAŽ
Budsłaŭski fest, što zvyčajna pravodzicca ŭ pačatku lipienia, źbiraje niekalki tysiačaŭ viernikaŭ i pilihrymaŭ z usioj Biełarusi.
Unačy ŭ Budsłavie adbyłasia pracesija sa śviečkami i śviataja imša, celebracyju jakoj uznačaliŭ Mitrapalit Minska-Mahiloŭski arcybiskup Juzaf Stanieŭski, piša Catholic.by.
Roŭna apoŭnačy vitajučy sabranych u Nacyjanalnym sanktuaryi viernikaŭ, ijerarch adznačyŭ, što Maci Maryja źbiraje svaich dziaciej u hetym śviatym miescy jak adnu siamju.
«Bolš za 400 hadoŭ tamu Maryja pryjšła siudy, na hetuju ziamlu, da našych prodkaŭ, kab ich padtrymać, kab ich naviedać»,— adznačyŭ arcypastyr. Jon nahadaŭ, što 125 hadoŭ tamu našyja prodki na zaklik Papy Pija XII pryśviacili siabie Najśviaciejšamu Sercu Jezusa, i ciapier małady Kaścioł na Biełarusi žadaje znoŭ ździejśnić hety akt pryśviačeńnia.
«U akcie intranizacyi budziem prasić ab jednaści ŭ našych siemjach i ich adnaŭleńni, kab jany byli asiarodkami lubovi i miru, svabodnymi ad zdrady, ahresii i nasilla, adkrytymi dla novaha žyćcia i zdolnymi pieradavać vieru i tradycyju prodkaŭ novym pakaleńniam. Budziem pryśviačać Najśviaciejšamu Sercu Jezusa našuju moładź, kab jana znachodziła sens žyćcia i išła za hołasam Boha, kab sercy maładych ludziej pałali luboŭju da Zbaŭcy, kab ich entuzijazm i viera adnaŭlali Kaścioł», — patłumačyŭ duchoŭny sens intranizacyi arcybiskup Stanieŭski.
Na zakančeńnie hamilii arcypastyr zaachvociŭ sabranych da malitvy: «Prosim siońnia: Boža, błasłavi Biełaruś, błasłavi ŭsich nas, kab dziakujučy addanaj viery i čujnaści našaha serca na patreby bližniaha, my zmahli paspryjać jakasnamu budavańniu našaj sučasnaści, kab jana stałasia tryvałym i pryhožym padmurkam viery, nadziei i lubovi dla budučych pakaleńniaŭ».
Śviatočnuju načnuju liturhiju tradycyjna azdobiŭ pryhožym śpievam chor «Załataja Horka» pad kiraŭnictvam Śviatłany Šejpy ź minskaj parafii Najśviaciejšaj Trojcy (śviatoha Rocha). Paradak padčas celebracyi zabiaśpiečvali biełaruskija katalickija skaŭty.
Naprykancy Imšy arcybiskup Juzaf Stanieŭski pavinšavaŭ prysutnych na celebracyi archimandryta Hajeka i ksiandza prełata Uładzisłava Zavalniuka z 50-hodździem śviatarstva, jakoje jany sioleta adznačyli.
My znajšli śpis «terarystaŭ» ad KDB, jaki zhubiŭsia na piać miesiacaŭ. Ciapier u im amal 450 biełarusaŭ3
Kamientary
čamu tak uparta banicia majho (!) Indiejeca ?