Stała viadoma, u čym padazrajuć Ramašeŭskuju, Dzikavickaha i inšych top-mieniedžaraŭ «Biełsata»
Jak paviedamlaje partał Onet, likvidatar Polskaj televizii (TVP) Danieł Horhaš, jaki razam z aŭdytarami pravioŭ pravierku na Biełsacie, nakiravaŭ u akruhovuju prakuraturu Varšavy paviedamleńnie. U im jon padazraje klučavych asobaŭ kiraŭnictva Biełsata ŭ finansavych złačynstvach i złoŭžyvańni paŭnamoctvami, z-za čaho Polskaje telebačańnie mahło stracić bolš za 7 miljonaŭ złotych (kala $1,77 miljona).
![](http://nashaniva.com/img/w840d4webp1/photos/z_2024_07/mycollages-35-z361m.jpg.webp)
Polskaja prakuratura ŭ adkaz na heta raspačała aficyjnaje rasśledavańnie, pieradaje Onet.
U mahčymych parušeńniach likvidatar i aŭdytary padazraje byłuju kiraŭnicu Biełsata Ahniešku Ramašeŭsku-Huzy, ciapierašniaha kiraŭnika telekanała Alaksieja Dzikavickaha, jaho namieśnicu Bieatu Krasickuju, kiraŭnika adździeła prahramy TVP Polonia Valdemara Damanskaha i jašče šaściarych klučavych asobaŭ kanała.
Adkaznaść pa tych artykułach Kryminalnaha kodeksa Polščy, jakija adpaviadajuć apisanym złačynstvam, moža dasiahać 5-8 hadoŭ pazbaŭleńnia voli.
Aŭdytary śćviardžajuć, što kiraŭnictva Biełsata ŭ pieryjad z 10 žniŭnia 2018 hoda da 10 studzienia 2024 hoda zaklučała damovy na IT-pasłuhi ŭ abychod tendarnych pracedur i biez analizu rynku. Pavodle ich słovaŭ, kantrakty atrymlivali kampanii, jakija nie mieli adpaviednaha vopytu. Na ich dumku, taksama jość padazreńni, što hetyja kampanii stvaralisia śpiecyjalna pad kankretnyja zamovy.
U tekście paviedamleńnia ŭ prakuraturu, na jaki spasyłajecca Onet, zhadvajucca kampanii Devkom Szymon Puacz i Devkom sp. z o.o., jakija naležać polskamu pradprymalniku Šymonu Puaču. Pa śćviardžeńniach aŭdytaraŭ, jon maje suviazi z byłoj kirujučaj partyjaj Polščy «Prava i spraviadlivaść» (PiS). Za niekalki hadoŭ Puač zaklučyŭ 248 damovaŭ na akazańnie pasłuh Biełsatu.
«Cana na akazańnie padobnych pasłuh była našmat vyšej za rynkavuju, a Šymon Puač nie mieŭ nieabchodnaj infrastruktury, resursaŭ i srodkaŭ dla vykanańnia hetych pasłuh. Jaho kampanija Devkom sp. z o. o. znachodzicca ŭ žyłym pamiaškańni, dzie i pražyvaje sam Puač.
Infarmacyi ab dziejnaści jaho IT-kampanii ŭ internecie ŭvohule niama, na sajcie pradpryjemstva paznačany tolki łahatyp i elektronnaja pošta», — piša ŭ svaim zvarocie da prakuratury likvidatar TVP Danieł Horhaš.
Šymon Puač, u svaju čarhu, abviarhaje ŭsie abvinavačvańni ŭ svoj adras, adznačajučy, što pradastaŭlaŭ pasłuhi Biełsatu pa rynkavaj canie i što amal nie znajomy z byłoj kiraŭnicaj telekanała Ahnieškaj Ramašeŭskaj.
Sama Ramašeŭskaja nazvała publikacyju Onet «niekampietentnaj», a abvinavačvańni — «absurdnymi». Pa jaje słovach, usie kantrakty i zakazy apłačvalisia «Biełsatam» u adpaviednaści z pracedurami, ustalavanymi TVP, a ŭsie faktury i spravazdačy pieradavalisia Ministerstvu zamiežnych spraŭ Polščy, jakoje ŭ asnoŭnym finansavała biudžet Biełsata.
Akramia taho, Ramašeŭskaja paskardziłasia «na sproby źviazać usiu hetuju spravu z pradstaŭnikami PiS, jakija ŭvohule nie viedajuć nijakaha Šymona Puača».
Nahadajem, što prablemy ŭ telekanała ŭźnikli z pryčyny reformy hramadskich ŚMI ŭ Polščy, u tym liku telekampanii TVP, u strukturu jakoj uvachodzić Biełsat.
Situacyja stała vynikam źmieny kiraŭnictva Polskaha telebačańnia. Kadravyja pierastanoŭki inicyjavała novaja ŭłada, što pryjšła paśla parłamienckich vybaraŭ. Byŭ taksama zvolnieny mieniedžmient Polskaha radyjo i Polskaha ahienctva druku.
Siarod zvolnienych akazałasia i Ahnieška Ramašeŭskaja-Huzy, jakaja 17 hod kiravała Biełsatam na pasadzie dyrektarki. Pry hetym joj nibyta śpiarša prapanavali zvolnicca pa ŭłasnym žadańni i z załatym parašutam, to-bok na vielmi dobrych umovach, ale žančyna na heta nie pahadziłasia.
Kiraŭnikom Biełsata ciapier źjaŭlajecca Alaksiej Dzikavicki.
Byłaja dyrektarka «Biełsata» vydała zajavu ŭ suviazi z abvinavačańniami ŭ rastratach. Patrabuje «spynieńnia paklopu» i prabačeńniaŭ
Dzikavicki adreahavaŭ na abvinavačańni prakuratury suprać byłoj kiraŭnicy «Biełsata»
Zachavańnie «Biełsata» i źmiakčeńnie ŭmovaŭ pravozu tavaraŭ praz polskuju miažu — što Cichanoŭskaja abmierkavała ź Sikorskim
Kamientary
Posmotritie na finalnyje titry pieriedači «Chod myśli s Viktorom Šiendierovičiem», kto zanimajetsia jejo proizvodstvom, kto tranślacijej, a komu prinadležat prava.