Na jakich umovach biełarusy mohuć atrymać hramadzianstva Ispanii, Partuhalii, Hiermanii i inšych krain

 Hišpanija. Statusu ŭciekača čakać bolš za dva hady

Biełarus Jaŭhien* (imia źmienienaje dziela biaśpieki surazmoŭcy. — RS) pryjechaŭ u Hišpaniju razam ź siamjoj u sakaviku 2022 hodu. Razhladali lehalizacyju praz vučebnuju vizu.

«Heta nam nie zusim padyšło. Navučalnyja prahramy treba apłočvać. Na rachunku treba mieć davoli vialikija hrošy, kab pakazać, što ja mahu ŭtrymlivać siabie i ŭsiu siamju. Kali sam navučeniec maje prava pracavać na niapoŭnuju staŭku, to tym, chto pierajaždžaje razam ź im, pracavać nielha. Treba było abo iści vučycca ŭsim, abo zajmacca «šeraj» pracaj», — tłumačyć surazmoŭca.

Da taho ž paśla zaviaršeńnia vučoby treba było b šukać novuju pryčynu, kab zastacca ŭ krainie. Tamu siamja vybrała šlach uciakactva. Jany skarystalisia pasłuhami rasiejskamoŭnaha advakata, jaki prakansultavaŭ i dapamoh skłaści dakumenty. Advakatu zapłacili kala 400-500 eŭra. Jaŭhien ličyć zvarot da specyjalista słušnym krokam.

U nabory dakumentaŭ treba było mieć pierakład, jaki i zrabiŭ aficyjny pierakładčyk. Takich pierakładčykaŭ, ź biełaruskaj na hišpanskuju movu, niašmat. Adna staronka pierakładu moža kaštavać niekalki dziasiatkaŭ eŭra. Kali vialiki stos dakumentaŭ, to spatrebicca niekalki socień eŭra.

Kab padacca na ŭciakactva, treba było zapisacca onłajn na sustreču z palicejskim kamisaram.

«Zapisacca na ŭsialakija jurydyčnyja pracedury ŭ Hišpanii nie zaŭsiody prosta. Ty pilnuješ zapis kožnuju ranicu, kali źjaviacca tyja svabodnyja vokny, abo šukaješ ludziej, jakija za hrošy ciabie zapisvajuć. Heta kaštuje 20-30 eŭra. My zapisalisia za hrošy», — kaža surazmoŭca.

Na pryjom da kamisara siamja trapiła praz čatyry miesiacy paśla pierajezdu. Jany ŭziali z saboj uvieś pakiet nieabchodnych dakumentaŭ. Adnak ź biełarusami tolki pahavaryli i zapisali jašče raz na padaču dakumentaŭ praz dva miesiacy. Dali dakument, jaki dazvalaŭ hetyja dva miesiacy lehalna znachodzicca na terytoryi Hišpanii, bo viza na toj momant užo zakančvałasia.

Praz dva miesiacy jany znoŭ pryjšli na razmovu. Im zadavali pytańni pra adukacyju, prafesiju, pryčyny taho, čamu jany vyjechali z krainy. Taksama treba było patłumačyć, čamu siamja padajecca na ŭciakactva ŭ Hišpanii, a nia ŭ pieršaj krainie ŭjezdu, jak patrebujuć normy.

Urešcie im vydali «biełuju kartku» — list papiery sa źviestkami pra čałavieka, niekatorymi jahonymi abstavinami i fatazdymkam. Heta byŭ lehalizacyjny dakument na paŭhoda. Praz paŭhoda «biełuju kartku» zamianili na čyrvonuju. Jana ŭžo vyhladała jak nievialikaja kardonka sa źviestkami, fatazdymkam i adbitkam palca. «Čyrvonaja kartka» daje dazvoł na pracu.

Kartki vydavali ŭ Ofisie ŭciakactva i prytułku. Zapisacca tudy hetak sama składana, jak i da palicejskaha kamisara. Siamja znoŭ zapłaciła hrošy. (Adnak hetyja płatnyja pasłuhi nielehalnyja.)

«Hišpanskaja dziaržava zaraz sprabuje niešta zrabić z małoj dasiažnaściu zapisaŭ. Dziesiać hadoŭ tamu ŭ našaj aŭtanomnaj supolnaści (usiaho ŭ Hišpanii 17 aŭtanomnych rehijonaŭ) było 3-4 tysiačy prośbaŭ ab uciakactvie na hod. Letaś ža ich było 120 tysiač, u 40 razoŭ bolš», — raskazvaje biełarus.

Farmalna zapyt na ŭciakactva ŭ Hišpanii maje razhladacca dva hady. Adnak palicyjant, jaki addavaŭ im dakumenty, skazaŭ, što jany nie paśpiejuć, daviadziecca čakać daŭžej. I voś siamja biełarusaŭ čakaje rašeńnia nakont statusu ŭciekača ŭžo amal dva hady. Uvieś hety čas im nielha vyjaždžać z Hišpanii.

Jaŭhien adznačyŭ, što hetyja lehalizacyjnyja dakumenty mohuć uskładniać uzajemadziejańni z zamiežnymi kampanijami.

«Vam mohuć zablakavać kartku płaciežnaj systemy, bo hety farmat dakumenta nie pasuje hetaj eŭrapiejskaj, ale niehišpanskaj płaciežnaj systemie», — pryvioŭ jon prykład.

Tyja, chto padajecca na ŭciakactva ŭ Hišpanii, mohuć źviartacca da Čyrvonaha Kryža abo da inšych arhanizacyj (prykładam, arhanizacyi Accem), jakija dapamahajuć z žytłom, hrašyma. Ale čałaviek tady nia moža vybrać miesca, dzie žyć. Siamja Jaŭhiena vybrała nie źviartacca pa dapamohu.

Kali siamja nie atrymaje statusu ŭciekačoŭ, jany razhladajuć varyjant padacca na dazvoł na žycharstva pavodle asiełaści. Dla hetaha treba pražyć u Hišpanii bieśpierapynna try hady, mieć žytło, pracu, viedać movu, nia mieć prablemaŭ z zakonam.

«Dla biełarusaŭ treba mieć nacyjanalny dakument, kab tudy ŭstavić dazvoł na žycharstva. Kali pašparty skončylisia, niezrazumieła, kudy heta stavić. Jość jašče farmat pašparta inšaziemca, ale ja pakul nia viedaju, jak heta pracuje», — kaža surazmoŭca.

Partuhalija. Lehalizacyju praź IP skasavali

Andrej* (imia źmienienaje dziela biaśpieki surazmoŭcy. — RS) pierajechaŭ u Partuhaliju ź siamjoj. Jany b u budučyni chacieli atrymać hramadzianstva hetaj krainy. Amal dva hady tamu siamja padała dakumenty na časovy dazvoł na žycharstva.

«U teoryi ŭsio prosta. Ale teoryja razychodzicca z praktykaj», — kaža surazmoŭca.

Jon tłumačyć, što biełarus moža padavacca na hramadzianstva, kali pražyvie ŭ Partuhalii bieśpierapynna piać hadoŭ. Adnak pry hetym treba mieć časovy dazvoł na žycharstva. Jaho vydajuć spačatku na dva hady, potym na try. Praź piać hadoŭ čałaviek moža padavacca na pastajanny dazvoł na žycharstva i paralelna padavacca na hramadzianstva.

«Adnak u nas jašče pieršaha dazvołu na žycharstva niama. U nas znajomy padaŭ dakumenty (na časovy dazvoł na žycharstva. — RS) minułym letam — i ni vokam nie vidać, ni słycham nie čuvać, jaki tam status», — kaža surazmoŭca.

Piać-šeść hadoŭ u teoryi pieraŭtvarajucca ŭ prykładna dziesiać hadoŭ u realnaści, pakul biełarus idzie da hramadzianstva ŭ Partuhalii, tłumačyć Andrej. Ichnaja znajomaja siamja ź dziećmi žyvie ŭ Partuhalii bolš za dziesiać hadoŭ, i tolki niadaŭna jany atrymali partuhalskaje hramadzianstva.

Andrej padavaŭsia na dazvoł na žycharstva na padstavie adkrytaha ŭ Partuhalii IP. Tam niama patreby pakazvać vysoki ŭzrovień dachodu. adkryć IP było dosyć prosta. Bolš składanaściaŭ u biełarusaŭ było adkryć rachunak u banku, bo paśla poŭnamaštabnaha ŭvarvańnia Rasiei va Ŭkrainu ŭviali sankcyi. Rachunki biełarusam urešcie staŭ adkryvać tolki adzin dziaržaŭny bank.

Adnak ciapier hetuju padstavu (praź IP) skasavali, u budučyni biełarusy nia zmohuć joj skarystacca. Surazmoŭca tłumačyć, što hety zakon dazvalaŭ lohka lehalizavacca ŭ Partuhalii, tamu tudy pryjechali mihranty z Banhladeš, Nepału, Brazylii, Biełarusi, Rasiei, inšych krainaŭ. U čarzie na atrymańnie dazvołu na žycharstva praź IP było kala 400 tysiač čałaviek. Jon dumaje, što praź vialiki napłyŭ mihrantaŭ vyrašyli admianić hety punkt zakanadaŭstva.

«My čakali, što praz hod atrymajem dazvoł na žycharstva, a atrymajem praz dva», — kaža Andrej.

Jon miarkuje, što pracedura zaležyć ad randomnych, čałaviečych faktaraŭ, taksama ad rehijonu Partuhalii, katynentalnaj ci astraŭnoj jaje častki. Niekamu čamuści robiać dakumenty chutčej, kamuści zaciahvajuć.

U siamji biełarusaŭ jość znajomyja, jakija pryjechali paźniej za ich, ale ŭžo atrymali dazvoł na žycharstva. Padalisia na padstavie taho, što jany vysokakvalifikavanyja specyjalisty ŭ IT-sfery. Jość umova, što taki vysokakvalifikavany ajcišnik maje pracavać mienavita ŭ partuhalskaj firmie, a taksama mieć dyplom pra adpaviednuju adukacyju. Andrej pryvioŭ prykład rasiejskaha muzyki Michaiła Jepifanava z hurtu «Kasta», jaki žyvie ŭ Lisabonie, ale nia zmoh padać zajaŭku jak vysokakvalifikavany specyjalist, bo nia maje dyplomu repera.

Andrej taksama raskazaŭ pra sposab lehalizavacca praź dziaciej, jakija vučacca ŭ staršych klasach partuhalskaj škoły. Adnak, kali dzieci skončać škołu, treba budzie šukać novuju pryčynu, kab zakonna zastavacca ŭ krainie.

Što nieabchodna, kab atrymać hramadzianstva

Hišpanija

• Pa miescy žycharstva (naturalizacyja)

1. Pražyć u Hišpanii 10 hadoŭ zakonna i bieśpierapynna niepasredna pierad padačaj na hramadzianstva. Mieć miesca žycharstva ŭ Hišpanii. Naturalizacyja na ahulnych padstavach prachodzić u try etapy. Spačatku treba atrymać časovy dazvoł na žycharstva, praź piać hadoŭ — pastajanny dazvoł na žycharstva, jašče praź piać hadoŭ možna padavacca na hramadzianstva.

2. Za hety 10-hadovy peryjad nielha vyjaždžać za miežy Hišpanii daŭžej, čym na 6 miesiacaŭ za adnu pajezdku.

3. Patrebien biełaruski pašpart, paśviedčańnie ab naradžeńni.

4. Čałaviek pavinien nia mieć sudzimaściaŭ u Hišpanii i Biełarusi.

5. Zdać ekzamen na viedańnie zakonaŭ, historyi, tradycyj Hišpanii, a taksama hišpanskaj movy na ŭzroŭni A2.

6. Apłacić zbor kala 105 eŭra.

• Uciakactva

Pieršapačatkovy dazvoł na pražyvańnie vydajuć na padstavie statusu ŭciekača na 1 hod, potym jaho mohuć praciahvać dvojčy na 2 hady. Paśla hetaha mohuć dać pastajanny dazvoł na žycharstva na 5 hadoŭ. Astatnija ŭmovy, jak u papiarednim punkcie. Zajavu na ŭciakactva, pavodle zakonu, majuć razhladać ad paŭhoda da 2 hadoŭ, ale ŭ realnaści terminy mohuć być bolšymi.

• «Ličbavy vandroŭnik»

«Ličbavy vandroŭnik» (digital nomad) — čałaviek, jaki ŭ pracy nie zaležyć ad pastajannaha miesca znachodžańnia i vandruje pa śviecie z noŭtbukam.

Lehalizacyja na hetaj padstavie źjaviłasia ŭ Hišpanii tolki ŭ 2023 hodzie. Dla jaje treba:

1. Mieć dyplom ab specyjalnaści abo try hady relevantnaha dośviedu.

2. Nia mienš za try miesiacy pracavać na kampaniju, jakuju zarehistravali nia mienš jak hod tamu. Možna być frylanseram.

3. Paćvierdzić štohadovy dachod u 30 250 eŭra, plus 11 340 eŭra na druhoha člena siamji, plus 3770 na kožnaha nastupnaha.

• Vysokakvalifikavany specyjalist

1. Nieabchodna paćvierdzić svaju vysokuju kvalifikacyju, pradstavić dyplom ab vyšejšaj adukacyi, pakazać svaje funkcyi, pamier adkaznaści na pracoŭnym miescy, kolkaść padnačalenych. Dakładnaha aznačeńnia «vysokakvalifikavany specyjalist» u zakanadaŭstvie niama. Zarobak maje być ad 41 tysiačy eŭra za hod dla specyjalistaŭ i ad 55 tysiač eŭra dla kiraŭnikoŭ.

Takija zajavy majuć razhledzieć chutčej, čym inšyja, — ciaham miesiaca. Pry hetym padaje dakumenty arhanizacyja, jakaja najmaje rabotnika, a nia sam čałaviek.

• Vučoba

1. Nieabchodna vučycca ŭ hišpanskim VNU abo na moŭnych kursach. Inšyja siamiejniki lehalizujucca razam z hetym navučencam. Navučencam moža ličycca navat dzicia, jakoje chodzić u hišpanskuju škołu; baćki lehalizujucca jak tyja, chto jaho supravadžaje.

2. Pakazać, što jość hrošy na ŭtrymańnie: 600 eŭra na adnaho čałavieka plus 450 eŭra na druhoha člena siamji, plus 300 eŭra na nastupnych. Tak, na siamju z troch čałaviek treba sama mieniej 1350 eŭra na miesiac.

Vučoba daje tolki časovy dazvoł žyć u krainie i faktyčna zaciahvaje atrymańnie hišpanskaha pašparta. Čas vučoby nie ŭvachodzić u 10 hadoŭ, nieabchodnych dla atrymańnia hramadzianstva pavodle naturalizacyi.

• Biaz prava na pracu

1. Treba paćvierdzić pastajanny pasiŭny dachod z-za miažy, naprykład ad zdačy ŭ arendu nieruchomaści. Abo možna pakazać aščadžeńni na rachunku ŭ pamiery 2400 eŭra na adnaho čałavieka ŭ miesiac, plus 600 eŭra na kožnaha nastupnaha člena siamji.

• Na padstavie investycyj

1. Investavać u ekanomiku Hišpanii tak:

• kupić žyłuju abo kamercyjnuju nieruchomaść u Hišpanii na 500 tysiač eŭra i bolš;
• ci kupić akcyi hišpanskich kampanij (ad 1 miljona eŭra);
• ukłaści ŭ investycyjnyja abo venčurnyja fondy ad 1 miljona eŭra;
• pakłaści na rachunak u hišpanskim banku ad 1 miljona eŭra;
• kupić dziaržaŭnyja ablihacyi na sumu ad 2 miljonaŭ eŭra;
• finansavać bujny biznes-prajekt, jaki zrobić značny ŭniosak u ekanomiku Hišpanii.

Pieršy dazvoł na žycharstva vydajuć na 3 hady, nastupny na 5 hadoŭ. Siamja investara lehalizujeccaa razam ź im.

Partuhalija

• 5 hadoŭ pražyvańnia

1. Zakonna pražyć u Partuhalii 5 hadoŭ.

2. Zdać onłajn-ekzamen z partuhalskaj movy ŭzroŭniu A2. Heta kaštuje kala 80 eŭra.

3. Nia być asudžanym u Partuhalii na termin u 3 hady i bolšy, nia być źviazanym z teraryzmam.

• Šlub abo partnerstva

1. Pražyć u šlubie abo pazašlubnym partnerstvie z hramadzianinam Partuhalii bolš za 3 hady.

2. Mohuć spatrebicca dakumenty, jakija paćvierdziać suviaź z partuhalskaj supolnaściu.

3. Nielha zajmać dziaržaŭnyja pasady ŭ inšaj krainie.

4. Nielha, kab čałaviek raniej adsłužyŭ na nieabaviazkovaj vajskovaj słužbie ŭ inšaj krainie.

5. Nia być asudžanym na termin 3 hady i bolšy ŭ Partuhalii. Nia być źviazanym z teraryzmam.

• Vučoba

1. Zdać ustupnyja ispyty i być zaličanym u partuhalskuju navučalnuju ustanovu. U zalik na hramadzianstva idzie tolki pałova terminu, jaki student pravioŭ u vučelni. Prykładam, z čatyroch hadoŭ studenctva zaličvajecca ŭ staž tolki dva hady.

• Siabra partuhalskaj supolnaści za miažoj

1. Być siabram supolnaści partuhalskaha pachodžańnia za miažoj. Treba dakazać što bolšaść udzielnikaŭ supolnaści majuć partuhalskaje pachodžańnie i pašyrajuć tradycyi partuhalskaj kultury. U hetych vypadkach rašeńnie ab nadańni hramadzianstva prymaje ministar justycyi.

• Investycyi

1. Investavać u ekanomiku Partuhalii 250—500 tysiač eŭra: kupić nieruchomaść, pakłaści na bankaŭski rachunak. Atrymać na hetaj padstavie dazvoł na žycharstva. Jaho treba padaŭžać kožnyja dva hady.

2. Pražyć 5 hadoŭ ŭ Partuhalii z dazvołam na žycharstva. Ciaham hetaha peryjadu možna znachodzicca ŭ Partuhalii nia ŭvieś čas, a sama mieniej 7 dzion štohod.

3. Zdać ekzamen z partuhalskaj movy na ŭzrovień A2.

4. Nia mieć sudzimaściaŭ.

Padača zajavy na partuhalskaje hramadzianstva kaštuje 250 eŭra.

Kipr

• Pražyvańnie ciaham 10 hadoŭ (naturalizacyja)

1. Pražyć 10 hadoŭ na Kipry, ź ich ciaham 8 hadoŭ treba mieć dazvoł na žycharstva. Apošni hod možna adsutničać u krainie nia bolš za 90 dzion. Spačatku čałaviek atrymlivaje časovy dazvoł na žycharstva na 5 hadoŭ, potym pastajanny dazvoł na žycharstva taksama na 5 hadoŭ.

Dziaržaŭnyja zbory za padaču zajaŭki na hramadzianstva — 500 eŭra. Pry stanoŭčym rašeńni — jašče 500 eŭra.

Raniej za investycyi ŭ ekanomiku Kipra termin čakańnia skaračaŭsia da 5 hadoŭ. Adnak ź listapada 2020 hodu investary iduć na ahulnych umovach.

Mužčyny, jakija atrymali hramadzianstva Kipra praz naturalizacyju, musiać ciaham dvuch hadoŭ paśla atrymańnia pašparta adsłužyć u kiprskim vojsku. Mužčyny, małodšyja za 26 hadoŭ, — 6 miesiacaŭ, starejšyja za 26 hadoŭ — try miesiacy.

• Šlub

1. Pražyć u šlubie z hramadzianinam Kipra nia mienš za 3 hady.

2. Pražyć na Kipry nia mienš za 2 hady.

Dziaržaŭny zbor u hetym vypadku składaje 300 eŭra.

• Vysokakvalifikavanyja rabotniki, IT-specyjalisty

Hety punkt u zakanadaŭstvie źjaviŭsia ŭ kancy 2023 hodu.

1. Treba paćvierdzić, što čałaviek vysokakvalifikavany rabotnik abo supracoŭnik IT-sfery. Pakazać dyplom ab adukacyi abo paćvierdzić dośvied pracy nia mienš za 2 hady na adpaviednaj pasadzie.

2. Pražyć na Kipry ciaham 4 hadoŭ pra ŭmovie, što čałaviek zdaść ekzamen z hreckaj movy ŭzroŭniu V1. Abo pražyć na Kipry 5 hadoŭ i zdać ekzamen z hreckaj movy ŭzroŭniu A2. Apošni hod možna adsutničać na Kipry nia bolš za 90 dzion.

3. Zdać ekzamen na viedańnie sacyjalna-palityčnaj sytuacyi Kipra.

4. Nia mieć prablem z zakonam.

Niamieččyna

• Pražyvańnie ŭ krainie ciaham 8 hadoŭ (naturalizacyja)

1. Pražyć u Niamieččynie 8 hadoŭ z dazvołam na žycharstva.

2. Mieć ułasnaje abo arandavanaje žytło.

3. Samastojna siabie ŭtrymlivać, nie karystacca dziaržaŭnaj dapamohaj.

4. Viedać niamieckuju movu na ŭzroŭni V1.

5. Viedać pravavy i sacyjalny ład Niamieččyny.

6. Padtrymlivać demakratyčnyja kaštoŭnaści Niamieččyny.

7. Być hatovym admovicca ad inšaha hramadzianstva.

8. Trymacca zakonaŭ Niamieččyny, naprykład nia być u šlubie adnačasova ź niekalkimi ludźmi.

Skaracić čas pražyvańnia ŭ Niamieččynie možna, kali čałaviek projdzie intehracyjny kurs i atrymaje sertyfikat Federalnaha viedamstva ŭ pytańniach mihracyi i ŭciekačoŭ. Kali čałaviek zasvoiŭ niamieckuju movu na ŭzroŭni, bolšym za V1, to termin rezydenctva skaračajecca da 6 hadoŭ.

Arhientyna

• Pražyvańnie ciaham dvuch hadoŭ (naturalizacyja)

1. Pražyć u Arhientynie ciaham dvuch hadoŭ z časovym dazvołam na žycharstva. Pastajanny dazvoł na žycharstva mieć nieabaviazkova. Heta adzin z samych karotkich terminaŭ, kab pretendavać na pašpart, u paraŭnańni ź inšymi krainami.

2. Mieć pracu abo inšuju zakonnuju krynicu dachodu.

3. Paćvierdzić hatoŭnaść stać hramadzianinam Arhientyny pierad federalnym sudździoj.

Admaŭlacca ad pieršaha pašparta pry atrymańni arhientynskaha nia treba.

• Šlub

1. Być u šlubie z hramadzianinam Arhientyny. Adrazu paśla ŭziaćcia šlubu možna padać zajavu na hramadzianstva. Nia treba žyć peŭny peryjad u šlubie i nia treba žyć peŭny peryjad na terytoryi Arhientyny.

• 7
• 1
• 3
• 0
• 1
• 2
• 0
• 0