Sachaščyk: Ja stvaryŭ padraździaleńnie, jakoje 15 miesiacaŭ vajavała biez ratacyi na pieradavoj. I nivodnaha zahinułaha
Były pradstaŭnik pa nacyjanalnaj abaronie ŭ kabiniecie Śviatłany Cichanoŭskaj Valer Sachaščyk u intervju «Lusterku», siarod inšaha, raskazaŭ pra vyniki svajoj pracy. Vysokuju pasadu jon zajmaŭ sa žniŭnia 2022 hoda.
U pryvatnaści, jon adkazaŭ na pytańnie, čamu nie ŭdałosia stvaryć nacyjanalnaje padraździaleńnie biełaruskich dobraachvotnikaŭ va Ukrainie.
— Davajcie pačniem z taho, što ŭkrainskaj dziaržavaj u asobie Hałoŭnaha ŭpraŭleńnia raźviedki byŭ stvorany połk Kalinoŭskaha (na sajcie pałka Kalinoŭskaha skazana, što 9 maja 2022 hoda «biełaruskija dobraachvotniki zajavili pra abjadnańnie ŭ bataljon imia Kastusia Kalinoŭskaha», na bazie jakoha 21 maja 2022 hoda byŭ stvorany adnajmienny połk). Heta čysta ŭkrainski dziaržaŭny prajekt. Kali chtości mnie zapiarečyć, chaj pryviadzie arhumienty, ale pakul ja ich nie baču.
Akramia hetaha, jość padraździaleńnie, jakoje stvaryŭ ja. Jano 15 miesiacaŭ vajavała biez ratacyi na pieradavoj. Chto jašče ź biełarusaŭ 15 miesiacaŭ biazvyłazna prabyŭ na pieradavoj? Ja dumaju, što viedaŭ by, kali b jašče niechta tak zrabiŭ. Dumaju, takich niama.
My ŭpeŭniena advajavali, vielmi dobra vykanali svaju zadaču. Toje, što ja abiacaŭ, ja zrabiŭ: uzbroiŭ rotu poŭnym kamplektam strałkovaj zbroi, najlepšaj u śviecie, srodkami indyvidualnaj abarony, suviazi, pryborami raźviedki i nazirańnia, prycełami. Usim, što nieabchodna, kab ludzi mahli paśpiachova vykonvać bajavuju zadaču. Ja padrychtavaŭ i navučyŭ ludziej, i liču, što toj fakt, što my za 15 miesiacaŭ na pieradavoj nie stracili nivodnaha čałavieka zabitym, kaža sam za siabie.
— Jakija jašče svaje pośpiechi i dasiahnieńni na pasadzie pradstaŭnika APK vy možacie nazvać?
— Ja šmat mahu raskazać, što my zrabili. Upeŭnieny, što budučaja armija Biełarusi budzie šmat hadoŭ karystacca vynikami našaj pracy. Była sabrana biblijateka analityčnaha materyjału z nahody bajavych dziejańniaŭ u sučasnaj vajnie. Takoha vopytu, takim čynam abahulnienaha, praanalizavanaha i adlustravanaha, ja dumaju, niama ni ŭ kaho. I miarkuju, što navat ukraincy heta nie viali. A my viali, i na padstavie hetaha ja ŭpeŭnieny, što buduć składacca paśla prahramy bajavoj padrychtoŭki dla budučaj biełaruskaj armii.
U nas jość vialikaja kolkaść vielmi dobrych kantaktaŭ z profilnymi strukturami jeŭrapiejskich krain. Ja dumaju, što budučaja biełaruskaja armija pavinna siabravać nie z Turkmienistanam i Paŭnočnaj Karejaj, a ź jeŭrapiejcami.
Mnie zusim nie soramna za pracu, jakuju ja rabiŭ uvieś hety čas.
«Nie spadabajecca — nazad pajedu»: palitźniavoleny pamočnik prakurora Babak z‘javiŭsia ŭ sacsietkach FOTA2
Kamientary