Amierykanskija astranaŭty dumali źlotać u kosmas na vosiem dzion, a zaviśli, napeŭna, na vosiem miesiacaŭ
Pieršy palot «Starłajniera» akazaŭsia poŭnym niepryjemnaściaŭ.
Kali Suni Uiljams i Butč Uiłmar 5 červienia startavali na karabli «Starłajnier» kampanii Boeing na Mižnarodnuju kaśmičnuju stancyju, jany płanavali viarnucca na Ziamlu praz vosiem dzion. Ciapier vyśviatlajecca, što jany mohuć zatrymacca na cełych vosiem miesiacaŭ. Pieršy palot «Starłajniera» akazaŭsia poŭnym niepryjemnaściaŭ, piša Bi-bi-si.
Na pres-kanfierencyi 14 žniŭnia pradstaŭniki NASA čarhovy raz abviaścili, što viartańnie astranaŭtaŭ adkładajecca. Kali mienavita jano adbudziecca, NASA abiacaje vyrašyć da kanca žniŭnia.
Śpiecyjalisty amierykanskaha kaśmičnaha ahienctva patłumačyli, u pryvatnaści, što skafandry ekipaža «Starłajniera» nie całkam sumiaščalnyja ź inšym karablom, na jakim astranaŭty mahli b viarnucca z MKS.
Kali inžyniery paličać, što lacieć na karabli «Starłajnier» usio ž taki niebiaśpiečna, to, mahčyma, Uiljams i Uiłmar zmohuć viarnucca vosieńniu na karabli kankurenta Boeing u śfiery pryvatnaha asvajeńnia kosmasu, kampanii SpaceX.
Ale bolš vierahodna, što jany palaciać na karabli SpaceX tolki ŭ pačatku nastupnaha hoda. U hetym vypadku ekśpiedycyja, jakaja płanavałasia na vosiem dzion, zaciahniecca na vosiem miesiacaŭ.
Pradstaŭniki NASA zapeŭnili, što astranaŭty adčuvajuć siabie vydatna, i što jany pieršapačatkova razumieli, što ich ekśpiedycyja budzie źviazanaja z ryzykaj.
«Starłajnier» byŭ zapuščany 5 červienia, niahledziačy na tak i nie likvidavanuju da kanca nievialikuju ŭciečku hieliju. Hety haz vykarystoŭvajecca dla padačy paliva ŭ sistemu ruchavikoŭ, jakija vykarystoŭvajucca dla manieŭravańnia ŭ kosmasie i tarmažeńnia pry paŭtornym uvachodzie ŭ atmaśfieru Ziamli.
Uciečka była minimalnaj, inžyniery vyrašyli, što na ahulny chod misii jana nie paŭpłyvaje, i dazvolili zapusk.
Adnak za čas misii byli zafiksavanyja jašče čatyry takija ŭciečki, a pry padlocie da MKS admovili piać z 28 manieŭrovych ruchavikoŭ. Na ščaście, čatyry ź ich udałosia zapuścić.
Kampanija Boeing zapeŭnivaje, što, pavodle jaje acenki, astranaŭty mohuć całkam biaśpiečna viarnucca na jaje karabli. Pradstaŭniki NASA ŭ sieradu taksama skazali, što całkam upeŭnienyja ŭ nadziejnaści «Starłajniera», i ŭ krajnim vypadku Uiljams i Uiłmar zmohuć viarnucca i na im.
Adnak inžyniery pryvodziać, u pryvatnaści, toj dovad, što modul, dzie paŭstali niepaładki, płanava zharyć u atmaśfiery — i im nie ŭdasca jaho vyvučyć.
Na mahilnym pomniku Makieja vybili častku šyfru kalinoŭcaŭ FOTA19
Kamientary