«Kab dzieci nie vyhladali, jak maleńkija čynoŭniki». Dyzajnierka padkazvaje, jak vybrać školnuju formu z katałoha «Biellehprama»
Razam z dyzajnierkaj pašukali ŭ katałohu «Biellehprama» dobryja madeli školnaj formy. A taksama raźbiralisia, jak zrabić tak, kab dzieci nie vyhladali, jak maleńkija biełaruskija čynoŭniki.
![](http://nashaniva.com/img/w840d4webp1/photos/z_2024_08/-g27wd.jpg.webp)
Dyzajnierka raić dazvolić dzieciam zastavacca dziećmi, niahledziačy na sumnyja kolery formy.
— Pieršaje, na što treba źviarnuć uvahu, — heta kamfort. Ja časta čuju, jak baćki złujucca: «Nie krucisia! Stoj roŭna! Pastoj chacia b chvilinku spakojna!» Ale ž dzicia — heta nie viešałka dla adzieńnia. Lepš naadvarot paprasić prajavić maksimalnuju aktyŭnaść — pamachać rukami i nahami, prysieści, kali mahčyma — padskočyć i prabiehčy. Tolki tak vy zrazumiejecie, nakolki heta zručnaje adzieńnie.
Dyzajnierka raić darosłym zhadvać i pra svoj dośvied. Bo, kali maci nienavidzić spadnicy-ałoŭki, nasić jakija sapraŭdy składana, dziŭna čakać, što pieršakłaśnica budzie ŭ zachapleńni ad takoj.
![](http://nashaniva.com/img/w732d4webp1/photos/z_2024_08/-h5fql.jpg.webp)
— Ja b adrazu raiła paźbiahać madelej sarafanaŭ, dzie jość aluzija na školnyja fartuchi. Šlejki, jakija nidzie nie zafiksavanyja, buduć uvieś čas spadać ź plačej i pierakručvacca. Tamu atrymajecca, što vaša dziaŭčynka ci to budzie vyhladać nieachajna, ci to budzie vymušana pastajanna papraŭlać šlejki, a heta razdražniaje.
![](http://nashaniva.com/img/w732d4webp1/photos/z_2024_08/-cgo09.jpg.webp)
Nastupnaje, na što dyzajnierka raić źviarnuć uvahu, — taktylnyja adčuvańni ad tkaniny. Harniturnaja tkanina moža być vielmi roznaj — i davoli hrubaj, i pryjemnaj. Pasprabujcie ścisnuć tkaninu, pravieści joj pa svajoj skury. I, kaniešnie, spytajeciesia ŭ dziciaci, ci padabajecca jamu sama tkanina pa adčuvańniach.
— U ciopły čas dzicia budzie ŭ štanach ci spadnicy biez kałhotak. I voś ujavicie, što 4-5-6 urokaŭ treba siadzieć na tkaninie, jakaja dastaŭlaje dyskamfort. Hetyja niepryjemnyja adčuvańni buduć adciahvać ad vučoby. I budzie chłopčyk ci dziaŭčynka dumać nie pra matematyku, a pra toje, kab chutčej pryjści dadomu i źniać hety žach.
Važnaja ŭłaścivaść tkaniny — zdolnaść «dychać». Tamu lepš vybirać naturalnyja tkaniny ci sastavy pryrodnaha pachodžańnia.
— Nie treba bajacca sumiesievych sastavaŭ. Kašula, dzie 95% bavoŭny i 5% spandeksu, budzie nasicca lepš, čym prosta bavaŭnianaja — ełastan dadaść ełastyčnaść. Viskoza — heta štučnaje vałakno naturalnaha pachodžańnia. Svabodnaja spadnica ź viskozy moža być całkam sabie niadrennaja, a voś błuzku, jakaja bližej da cieła, lepš uziać z bavoŭny.
![](http://nashaniva.com/img/w732d4webp1/photos/z_2024_08/-9rndf.jpg.webp)
Dyzajnierka adznačaje: u biełaruskaj vytvorčaści zvyčajna vykarystoŭvajuć niebłahija tkaniny i jakaść pašyvu taksama raduje. I kali paraŭnoŭvać z masmarkietam uzroŭniu Zara ci H&M, to jakaść biełaruskaha adzieńnia čaściej za ŭsio vyjhraje.
Ekśpiertka nahadvaje: najlepšaje adzieńnie — heta toje, na jakoje ty nie źviartaješ uvahi i jakoje amal nie adčuvaješ na ciele. Mienavita tamu siarod darosłych ciapier tak papularna vopratka oviersajz.
— Kali my havorym pra spadnicy ci štany, ja raju brać maksimalna svabodnyja i pažadana nie z žorstka zafiksavanym pojasam, a z humkaj. Takija madeli praściej pasadzić na lubuju fihuru. Tym bolš, što dzieci pieryjadyčna rastuć i ŭ vyšyniu, i ŭ šyryniu. A sprahnazavać heta składana.
![](http://nashaniva.com/img/w732d4webp1/photos/z_2024_08/-efay3.jpg.webp)
Ad składanych upryhožańniaŭ na błuzkach dla dziaŭčynak dyzajnierka raić admovicca.
— Kali vam i vašamu dziciaci padabajecca, dyk kuplajcie. Ale pamiatajcie pra toje, što takija elemienty taksama mohuć pierakručvacca, zachrasać — i ŭsio heta budzie vyhladać nieachajna.
Siarod varyjantaŭ, jakija ekśpiertka raić dla dziaŭčynak, — pramyja sarafany, pad jakija možna kupić niekalki prostych błuzak ci holfaŭ.
![](http://nashaniva.com/img/w732d4webp1/photos/z_2024_08/-qbfhd.jpg.webp)
— Błuzki i kašuli ja taksama raju brać kłasičnyja i mienš prytalenyja, bieź niezrazumiełych finciflušak. Dla chłopcaŭ, kali škoła dazvalaje vybirać pamiž pinžakom i džempieram ci kardyhanam, ja raju ŭsio ž brać nie pinžak (tym bolš, kali jon prytaleny). Niešta trykatažnaje budzie bolš kamfortna dla dziciaci, čym pinžak, jaki skoŭvaje ruchi.
Dla dziaŭčynki sukienka z pramym siłuetam taksama niadrenny varyjant. I taki vybar palahčaje padbor adzieńnia z ranicy. Adnak spadnicy i sarafany dajuć bolš varyjantaŭ mianiać vobrazy.
![](http://nashaniva.com/img/w732d4webp1/photos/z_2024_08/-uvqti.jpg.webp)
Kali ŭ škole nie vielmi strohija patrabavańni da źniešniaha vyhladu, dyzajnierka raić dapoŭnić sinie-šera-čornuju formu aksiesuarami — prykłady dla natchnieńnia možna pahladzieć u katałohach zachodnich brendaŭ.
— Fieniečki, akcentnyja pajasy, jarkija banty mohuć zrabić vobraz bolš dziciačym. Taksama možna pasprabavać pierašyć huziki na niejkija bolš cikavyja. Abo, naprykład, zrabić aplikacyju na adzieńni.
![](http://nashaniva.com/img/w732d4webp1/photos/z_2024_08/-7kyrp.jpg.webp)
Sa spartyŭnaj formaj, jakuju prapanoŭvaje «Biellehpram», situacyja bolš pazityŭnaja.
— Ščyra kažučy, ja była b rada, kali b u jakaści školnaj formy vybrali b niejkija takija kaściumy. Ź minusaŭ, jakija ja baču siarod prapanavanaha spartyŭnaha adzieńnia, — madel sa 100% paliestru dla padletka. Nabyć takuju možna tolki ŭ tym vypadku, kali vy bijałahičnuju zbroju raspracoŭvajecie. Bo ŭ padletkaŭ i tak aktyŭnaje potavydzialeńnie, a jamu jašče prapanujuć sintetyčnyja šorty i majku dla zaniatkaŭ sportam.
Kamientary