«Каб дзеці не выглядалі, як маленькія чыноўнікі». Дызайнерка падказвае, як выбраць школьную форму з каталога «Беллегпрама»
Разам з дызайнеркай пашукалі ў каталогу «Беллегпрама» добрыя мадэлі школьнай формы. А таксама разбіраліся, як зрабіць так, каб дзеці не выглядалі, як маленькія беларускія чыноўнікі.
![](http://nashaniva.com/img/w840d4webp1/photos/z_2024_08/-g27wd.jpg.webp)
Дызайнерка раіць дазволіць дзецям заставацца дзецьмі, нягледзячы на сумныя колеры формы.
— Першае, на што трэба звярнуць увагу, — гэта камфорт. Я часта чую, як бацькі злуюцца: «Не круціся! Стой роўна! Пастой хаця б хвілінку спакойна!» Але ж дзіця — гэта не вешалка для адзення. Лепш наадварот папрасіць праявіць максімальную актыўнасць — памахаць рукамі і нагамі, прысесці, калі магчыма — падскочыць і прабегчы. Толькі так вы зразумееце, наколькі гэта зручнае адзенне.
Дызайнерка раіць дарослым згадваць і пра свой досвед. Бо, калі маці ненавідзіць спадніцы-алоўкі, насіць якія сапраўды складана, дзіўна чакаць, што першакласніца будзе ў захапленні ад такой.
![](http://nashaniva.com/img/w732d4webp1/photos/z_2024_08/-h5fql.jpg.webp)
— Я б адразу раіла пазбягаць мадэлей сарафанаў, дзе ёсць алюзія на школьныя фартухі. Шлейкі, якія нідзе не зафіксаваныя, будуць увесь час спадаць з плячэй і перакручвацца. Таму атрымаецца, што ваша дзяўчынка ці то будзе выглядаць неахайна, ці то будзе вымушана пастаянна папраўляць шлейкі, а гэта раздражняе.
![](http://nashaniva.com/img/w732d4webp1/photos/z_2024_08/-cgo09.jpg.webp)
Наступнае, на што дызайнерка раіць звярнуць увагу, — тактыльныя адчуванні ад тканіны. Гарнітурная тканіна можа быць вельмі рознай — і даволі грубай, і прыемнай. Паспрабуйце сціснуць тканіну, правесці ёй па сваёй скуры. І, канешне, спытаецеся ў дзіцяці, ці падабаецца яму сама тканіна па адчуваннях.
— У цёплы час дзіця будзе ў штанах ці спадніцы без калготак. І вось уявіце, што 4-5-6 урокаў трэба сядзець на тканіне, якая дастаўляе дыскамфорт. Гэтыя непрыемныя адчуванні будуць адцягваць ад вучобы. І будзе хлопчык ці дзяўчынка думаць не пра матэматыку, а пра тое, каб хутчэй прыйсці дадому і зняць гэты жах.
Важная ўласцівасць тканіны — здольнасць «дыхаць». Таму лепш выбіраць натуральныя тканіны ці саставы прыроднага паходжання.
— Не трэба баяцца сумесевых саставаў. Кашуля, дзе 95% бавоўны і 5% спандэксу, будзе насіцца лепш, чым проста баваўняная — эластан дадасць эластычнасць. Віскоза — гэта штучнае валакно натуральнага паходжання. Свабодная спадніца з віскозы можа быць цалкам сабе нядрэнная, а вось блузку, якая бліжэй да цела, лепш узяць з бавоўны.
![](http://nashaniva.com/img/w732d4webp1/photos/z_2024_08/-9rndf.jpg.webp)
Дызайнерка адзначае: у беларускай вытворчасці звычайна выкарыстоўваюць неблагія тканіны і якасць пашыву таксама радуе. І калі параўноўваць з масмаркетам узроўню Zara ці H&M, то якасць беларускага адзення часцей за ўсё выйграе.
Экспертка нагадвае: найлепшае адзенне — гэта тое, на якое ты не звяртаеш увагі і якое амаль не адчуваеш на целе. Менавіта таму сярод дарослых цяпер так папулярна вопратка оверсайз.
— Калі мы гаворым пра спадніцы ці штаны, я раю браць максімальна свабодныя і пажадана не з жорстка зафіксаваным поясам, а з гумкай. Такія мадэлі прасцей пасадзіць на любую фігуру. Тым больш, што дзеці перыядычна растуць і ў вышыню, і ў шырыню. А спрагназаваць гэта складана.
![](http://nashaniva.com/img/w732d4webp1/photos/z_2024_08/-efay3.jpg.webp)
Ад складаных упрыгожанняў на блузках для дзяўчынак дызайнерка раіць адмовіцца.
— Калі вам і вашаму дзіцяці падабаецца, дык купляйце. Але памятайце пра тое, што такія элементы таксама могуць перакручвацца, захрасаць — і ўсё гэта будзе выглядаць неахайна.
Сярод варыянтаў, якія экспертка раіць для дзяўчынак, — прамыя сарафаны, пад якія можна купіць некалькі простых блузак ці гольфаў.
![](http://nashaniva.com/img/w732d4webp1/photos/z_2024_08/-qbfhd.jpg.webp)
— Блузкі і кашулі я таксама раю браць класічныя і менш прыталеныя, без незразумелых фінціфлюшак. Для хлопцаў, калі школа дазваляе выбіраць паміж пінжаком і джэмперам ці кардыганам, я раю ўсё ж браць не пінжак (тым больш, калі ён прыталены). Нешта трыкатажнае будзе больш камфортна для дзіцяці, чым пінжак, які скоўвае рухі.
Для дзяўчынкі сукенка з прамым сілуэтам таксама нядрэнны варыянт. І такі выбар палягчае падбор адзення з раніцы. Аднак спадніцы і сарафаны даюць больш варыянтаў мяняць вобразы.
![](http://nashaniva.com/img/w732d4webp1/photos/z_2024_08/-uvqti.jpg.webp)
Калі ў школе не вельмі строгія патрабаванні да знешняга выгляду, дызайнерка раіць дапоўніць сіне-шэра-чорную форму аксесуарамі — прыклады для натхнення можна паглядзець у каталогах заходніх брэндаў.
— Фенечкі, акцэнтныя паясы, яркія банты могуць зрабіць вобраз больш дзіцячым. Таксама можна паспрабаваць перашыць гузікі на нейкія больш цікавыя. Або, напрыклад, зрабіць аплікацыю на адзенні.
![](http://nashaniva.com/img/w732d4webp1/photos/z_2024_08/-7kyrp.jpg.webp)
Са спартыўнай формай, якую прапаноўвае «Беллегпрам», сітуацыя больш пазітыўная.
— Шчыра кажучы, я была б рада, калі б у якасці школьнай формы выбралі б нейкія такія касцюмы. З мінусаў, якія я бачу сярод прапанаванага спартыўнага адзення, — мадэль са 100% паліэстру для падлетка. Набыць такую можна толькі ў тым выпадку, калі вы біялагічную зброю распрацоўваеце. Бо ў падлеткаў і так актыўнае потавыдзяленне, а яму яшчэ прапануюць сінтэтычныя шорты і майку для заняткаў спортам.
Каментары