Kamała Charys pryniała naminacyju i paabiacała być prezidentam dla ŭsich amierykancaŭ
U apošni dzień nacyjanalnaha źjezdu Demakratyčnaj partyi ZŠA ŭ Čykaha Kamała Charys aficyjna pryniała naminacyju ŭ jakaści kandydata na pasadu prezidenta i vystupiła z pramovaj — pakul što hałoŭnaj za ŭsiu jaje palityčnuju karjeru, piša Bi-bi-si.
Charys zaklikała amierykancaŭ vykarystoŭvać budučyja vybary jak «kaštoŭnuju mahčymaść pieraadoleć horyč i namiecić šlach napierad», niezaležna ad partyjnych pieravah.
«Ja viedaju, što siońnia ŭviečary nas hladziać ludzi z roznymi palityčnymi pohladami. I ja chaču, kab vy viedali: ja abiacaju być prezidentam dla ŭsich amierykancaŭ, — skazała jana. — Ja budu prezidentam, jaki abjadnaje nas vakoł našych samych vysokich pamknieńniaŭ. Prezidentam, jaki viadzie — i słuchaje», — skazała jana pad burnyja apładysmienty.
Charys taksama papiaredziła ab niebiaśpiečnych nastupstvach u vypadku viartańnia ŭ Bieły dom respublikanca Donalda Trampa.
«My viedajem, što budzie ŭjaŭlać saboj druhi prezidencki termin Trampa. Usio heta vykładziena ŭ dakumiencie «Prajekt 2025». U mnohich adnosinach Donald Tramp źjaŭlajecca niesurjoznym čałaviekam. Adnak nastupstvy jaho viartańnia ŭ Bieły dom nadzvyčaj surjoznyja», — skazała vice-prezident ZŠA.
Pavodle jaje słoŭ, Tramp imkniecca adkinuć krainu nazad. «Ale my nie vierniemsia ŭ minułaje», — paŭtaryła jana niekalki razoŭ.
«Ja lublu našu krainu ŭsim sercam. Kudy b ja ni pajšła i z kim by ni sustrełasia, ja baču nacyju, jakaja hatovaja ruchacca napierad, hatovaja da nastupnaha kroku i nievierahodnaha padarožža, jakoje i nazyvajecca Amieryka», — skazała jana.
Vystup Charys staŭ kulminacyjaj źjezdu, jaki prachodziŭ čatyry dni. Za hety čas na im vystupili ciapierašni prezident Džo Bajden, Bił i Chiłary Klintany, Barak i Mišel Abamy, były śpikier Pałaty pradstaŭnikoŭ Nensi Pełosi, a taksama naparnik Charys pa prezidenckaj honcy Cim Uołz.
Jak i na anałahičnym źjeździe respublikancaŭ u lipieni, zała była poŭnaja zornych haściej. Da televiadučaj Opry Uinfry i repiera Liŭ Džona dałučylisia muzyki Styvi Uander i Džon Ledžend. Chadzili čutki, što na źjeździe mohuć źjavicca Biejonse abo Tejłar Śvift.
Charys stała kandydatam ad Demakratyčnaj partyi paśla taho, jak prezident Džo Bajden miesiac tamu vyjšaŭ ź pieradvybarnaj honki paśla niekalkich tydniaŭ cisku z boku adnapartyjcaŭ.
Charys šmat kazała pra svaju asabistuju historyju i karjeru prakurora, a taksama koratka zakranuła mižnarodnyja temy, paabiacaŭšy, što ŭ vypadku abrańnia budzie praciahvać padtrymku Ukrainy.
«Ja budu ćviorda stajać na baku Ukrainy i našych sajuźnikaŭ u NATA», — skazała jana.
Pavodle jaje słoŭ, paśla pačatku poŭnamaštabnaha ŭvarvańnia Rasii jana dapamahała «mabilizavać hłabalny adkaz» dla taho, kab Ukraina zmahła abaranicca ad rasijskaj ahresii.
U svajoj pramovie Charys vyrazna padsumavała ŭsie klučavyja momanty, jakija jaje štab chacieŭ zakranuć — jaje asabistuju historyju, zakliki da adzinstva, mety ekanamičnaj i sacyjalnaj palityki, aryjentavanyja na siaredni kłas, i krytyku Donalda Trampa.
Adnak dla tych, chto sačyŭ za jaje kampanijaj na praciahu apošnich niekalkich tydniaŭ, u jaje pramovie było mała novaha. «Heta byŭ prosta novy sposab achapić samuju vialikuju amierykanskuju aŭdytoryju, pierad jakoj jana kali-niebudź vystupała», — piša karespandent Bi-bi-si.
Palityčnyja źjezdy dźviuch asnoŭnych partyj, jakija pravodziacca kožnyja čatyry hady pierad prezidenckimi vybarami, biaruć svoj pačatak u 1830-ch hadach, kali hrupa delehataŭ-demakrataŭ, jakija padtrymlivali prezidenta Endru Džeksana, sabrałasia, kab vyłučyć jaho na druhi termin.
Ahułam ciapierašniaje mierapryjemstva demakrataŭ u Čykaha naviedała kala 50 tysiač čałaviek.
Prezidenckija vybary ŭ ZŠA projduć 5 listapada.
Televizijščyki pakazali žachlivuju jaŭku na ŭčastku, dzie hałasavaŭ Łukašenka35
Kamientary