Łukašenka zaćvierdziŭ damoŭlenaści ab novych umovach pastavak rasijskaj nafty

Alaksandr Łukašenka ŭkazam ad 12 lutaha zaćvierdziŭ Pratakoł ab uniasieńni źmianieńniaŭ u mižuradavaje biełaruska-rasijskaje Pahadnieńnie ab mierach pa ŭrehulavańni handlova-ekanamičnaha supracoŭnictva ŭ vobłaści ekspartu nafty i naftapraduktaŭ ad 12 studzienia 2007 hoda.

Jak paviedamlaje pres-słužba prezidenta, ukazam vykazana zhoda Respubliki Biełaruś na abaviazkovaść dla jaje nazvanaha pratakoła. «Takim čynam, Biełaruś, jak i Rasijskaja Fiederacyja, svoječasova vykanała ŭnutrydziaržaŭnyja pracedury, nieabchodnyja dla nabyćcia mocy hetaha dakumienta», — padkreślivajecca ŭ paviedamleńni.

Ukazam Savieta ministraŭ Biełarusi daručana pryniać miery, nieabchodnyja dla realizacyi pratakoła. Ukaz nabyvaje moc z dnia jaho padpisańnia.

Pres-słužba kiraŭnika dziaržavy nahadvaje, što nazvany pratakoł byŭ padpisany ŭ Maskvie 27 studzienia 2010 hoda. U adpaviednaści z hetym dakumientam vyvaznoj mytnaj pošlinaj nie abkładajecca nafta, jakaja transpartujecca z Rasii ŭ Biełaruś, zychodziačy z hadavoha abjomu ŭnutranaha spažyvańnia respublikaj rasijskaj nafty. Na 2010 hod hety abjom ustanoŭleny ŭ pamiery 6,3 młn. t. Pamier vyvaznoj mytnaj pošliny na naftu, jakaja vyvozicca z Rasii zvyš abjomu nafty, jaki pastaŭlajecca ŭ biaspošlinnym režymie, vyznačajecca zychodziačy sa stavak, ustanoŭlenych u adpaviednaści z rasijskim zakanadaŭstvam.

Raniej hazieta «Kommiersant'» adznačała, što Biełaruś moža ŭpuścić ilhotnuju naftu, kali svoječasova nie ratyfikuje padpisanyja ŭ Maskvie dakumienty. «Pahadnieńnie ab biaspošlinnych pastaŭkach nafty dla ŭłasnaha spažyvańnia Biełarusi ŭ abjomie 6,3 młn. ton, padpisanaje vice-premjerami Iharam Siečynym i Uładzimiram Siamaškam, moža nie nabyć moc, kali nie budzie ratyfikavana da 15 lutaha», — padkreślivała rasijskaje vydańnie.

12 lutaha Dziaržduma Rasii ratyfikavała pratakoł ab biaspošlinnaj pastaŭcy nafty ŭ Biełaruś. Jak paviedamiŭ namieśnik ministra enierhietyki RF Anatol Janoŭski, pavodle papiarednich raźlikaŭ, Rasija atrymaje ŭ 2010 hodzie ad pastavak nafty ŭ Biełaruś na 78 młrd. rubloŭ bolš, čym u 2009 hodzie.

Pavodle acenak ekśpiertaŭ Mižnarodnaha valutnaha fondu, straty Biełarusi ad novych umoŭ pastavak nafty składuć kala 2 młrd. dołaraŭ ZŠA. U MVF nie vyklučajuć nieabchodnaści pryciahnieńnia Biełaruśsiu dadatkovaha źniešniaha finansavańnia dla taho, kab spravicca z nastupstvami «naftavaha šoka».

Staršynia praŭleńnia Nacbanka Piotr Prakapovič u kancy studzienia zajaviŭ, što Biełaruś moža pajści na novyja źniešnija zapazyčańni ŭ suviazi sa źmienienymi ŭmovami pastavak rasijskaj nafty. Pavodle słoŭ kiraŭnika Nacbanka, novyja ŭmovy pastavak rasijskaj nafty «ŭskładniać našu pracu, heta nie prahnazavałasia».

• 0
• 0
• 0
• 0
• 0
• 0
• 0
• 0