Biełarus, jakoha sudziać u Polščy za špijanaž, dobraachvotna pahadziŭsia na adbyćcio pakarańnia
U Polščy abvinavačany ŭ kryminalnym pracesie moža padać zajavu ab dobraachvotnym adbyćci pakarańnia.
Hramadzianin Biełarusi Uładzisłaŭ P., jakoha sudziać u Polščy za špijanaž na karyść Rasii, pahadziŭsia na dobraachvotnaje adbyćcio pakarańnia. Jon moža pravieści ŭ turmie 2 hady i 10 miesiacaŭ, piša Most sa spasyłkaj na Wirtualna Polska.
U Polščy abvinavačany ŭ kryminalnym pracesie moža padać zajavu ab dobraachvotnym adbyćci pakarańnia. Heta mahčyma ŭ vypadkach, kali vina i abstaviny ździajśnieńnia złačynstva nie vyklikajuć sumnieńniaŭ. Takaja zajava skaračaje sudovy praces i ŭ mnohich vypadkach pryvodzić da bolš miakkaha pakarańnia.
13 vieraśnia, na čarhovym pasiadžeńni akruhovaha suda ŭ Lublinie, Uładzisłaŭ P. paviedamiŭ, što zhodny pravieści ŭ turmie 2 hady i 10 miesiacaŭ, a taksama zapłacić 10 tysiač złotych štrafu, 5 tys. złotych u Fond dapamohi paciarpiełym i addać u dachod dziaržavy 8200 złotych, atrymanych ad rasijskaj raźviedki (ahułam — 6 tysiač dalaraŭ).
Prakuror i sud pahadzilisia na takoje pakarańnie, adnak kančatkovaje abviaščeńnie prysudu adkładzienaje. Uładzisłaŭ P. chadajničaŭ ab źmienie miery strymańnia, ale sud u hetym admoviŭ, bo mužčyna nie maje pastajannaha miesca žycharstva ŭ Polščy i moža pakinuć krainu.
U čym abvinavačvajuć Uładzisłava P.
Biełarus uvachodziŭ u hrupu, jakaja źbirała infarmacyju ab transpartnaj infrastruktury Polščy, u tym liku toj, praź jakuju ažyćciaŭlalisia pastaŭki vajennaj i humanitarnaj dapamohi Ukrainie.
U členaŭ hrupy byŭ kuratar, ź jakim jany źviazvalisia praz telehram, vyśvietlić jaho asobu śledstvu nie ŭdałosia. U miesiendžary jon nazvaŭsia Andryjem, Andžejem, a taksama Habryelem K., jakoha ličać aficeram rasijskich śpiecsłužbaŭ. Dziejańniami hrupy kiravali i inšyja ludzi, jakija vykarystoŭvajuć niki Barbados, Pink, Mara, Secret Chat.
Płan-maksimum zaklučaŭsia ŭ adpraŭcy pad adchon ciahnika z vajskovym transpartam dla Ukrainy. Za heta było prapanavana ŭznaharodžańnie ŭ pamiery 10 tys. dalaraŭ.
Ale naohuł zadańni, jakija členy hrupy atrymlivali ad kurataraŭ, byli roznymi. Pierš za ŭsio, heta nazirańnie za transpartnaj infrastrukturaj i vajennymi abjektami: marskimi partami, aeraportami, čyhunačnymi vakzałami i vajskovymi častkami Polščy. Pavodle źviestak polskaj prakuratury, čalcy hrupoŭki ŭstalavali na čyhunačnych šlachach nie mienš za šeść kamier videanazirańnia, a ŭ ciahnikach ustalavali GPS-pieradatčyki. Takim čynam adsočvalisia pastaŭki vajennaj i humanitarnaj dapamohi Ukrainie.
Za ŭstalavanuju kamieru vykanaŭcam płacili 300-400 dalaraŭ.
Taksama ŭdzielniki hrupy atrymlivali bolš drobnyja zadańni, źviazanyja z prapahandysckaj dziejnaściu: malavali hrafici, rasklejvali stykiery i ŭlotki z antynataŭskimi i antyŭkrainskimi łozunhami.
Za kožnuju ŭlotku vykanaŭca atrymlivaŭ piać dalaraŭ.
Taksama vykanaŭcam vydzielili hrošy na pražyvańnie ŭ haścinicach i na pajezdki pa krainie. Jak vyśvietliła prakuratura, apłata abvinavačanym rabiłasia ŭ kryptavalucie.
Jakija pakarańni atrymali inšyja ŭdzielniki hrupy
Inšyja členy hrupy, jakija pahadzilisia raniej na dobraachvotnaje adbyćcio pakarańnia, atrymali terminy ad 1 hoda i 1 miesiaca da 6 hadoŭ pazbaŭleńnia voli. Taksama sud pryznačyŭ im štrafy ŭ pamiery ad 1 tys. da 20 tys. złotych (260—5200 dalaraŭ) i pastanaviŭ kanfiskavać srodki, atrymanyja ŭ vyniku złačynnaj dziejnaści.
Razam z Uładzisłavam P.sudziać ukrainca Maksima Ł. Jon dobraachvotna pahadziŭsia na adbyćcio 6 hadoŭ źniavoleńnia. Jaho pakarańnie bolš surovaje, pakolki jon źjaŭlaŭsia adnym z kiraŭnikoŭ i byŭ pieršym kantaktam «Andreja».
Skončyła žyćcio samahubstvam Śviatłana Krucikava ź Pinska, jakuju nieadnarazova sudzili za «ekstremizm»1
Kamientary