Chto tyja śpiecnazaŭcy, što žorstka i sa ździekami zatrymlivali muzykanta Viktara «Mao» Žarkieviča, jaki dniami pamior
Siarod ich raniej apaznali syna Dźmitryja Paŭličenki i jahonaha daŭniaha sasłužyŭca Kiryła Barysika.
Nieŭzabavie paśla aryštu lehiendy panku Viktara «Mao» Žarkieviča «Bajpoł» napisaŭ, što apaznaŭ śpiecnazaŭcaŭ, jakija jaho zatrymlivali. Heta Kirył Barysik i Arciemij Paŭličenka — adnahodki i pryjacieli. Im abodvum ciapier pa 28 hadoŭ.
Siabry Žarkieviča narakali, što nastupstvy hetaha aryštu — asabliva ŭmovy na Akreścina — mocna padarvali maralny stan muzykanta. Praz dva hady jon pamior — pierabivajučysia vypadkovymi zarobkami i skardziačysia na prablemy sa zdaroŭjem.
«Naša Niva» nahadvaje, što viadoma pra Barysika i Paŭličenku-małodšaha.
Kirył Barysik naradziŭsia ŭ Słonimie ŭ prostaj siamji. Baćka pracavaŭ na miasakambinacie, a maci — na abłasnoj stancyi pieralivańnia kryvi. Skončyŭ tam škołu №9 i Słonimski kadecki korpus na jaje bazie.
Zhodna ź infarmacyjaj ź jaho sacsietak, paśla vučelni jon skončyŭ Biełaruski dziaržaŭny ŭniviersitet fizkultury. I pajšoŭ pracavać u SACHR (Śpiecyjalny atrad chutkaha reahavańnia). Ciapier Barysik maje zvańnie staršaha lejtenanta i zajmaje pasadu namieśnika kamandzira roty.
Barysik udzielničaŭ u razhonie pratestaŭ u 2020 hodzie. 11 žniŭnia pahražaŭ pratestoŭcam zbrojaj u Minsku, na skryžavańni praśpiektaŭ Lubimava i Dziaržynskaha (pamiž stancyjami mietro «Piatroŭščyna» i «Malinaŭka»).
Prachodziŭ paciarpiełym pa troch palityčnych sudach. Ciapier udzielničaje ŭ zatrymańni biełarusaŭ razam z hubazikaŭcami.
Arciemij Paŭličenka — spadčynny milicyjant. Jahony baćka, Dźmitryj Paŭličenka, u 1990-ja kiravaŭ čaściu ŭnutranych vojskaŭ №3214. A maci pracavała fielčaram u lakarni hetaj vajskovaj čaści.
Dźmitryj Paŭličenka viadomy tym, što kiravaŭ eskadronami śmierci, jakija źniščyli šerah apanientaŭ Łukašenki i kryminalnych aŭtarytetaŭ. Paŭličenka byŭ aryštavany, ale vyzvaleny paśla tydniovaha aryštu pa asabistym rasparadžeńni Łukašenki. Paśla vyzvaleńnia jon adrazu zajaviŭ, što hatovy vykanać luby zahad Łukašenki.
Vykradańnie ludziej — sprava ruk SACHRu
Uvohule tahačasny SACHR byŭ zamiašany ŭ šmat jakich brudnych spravach, a mnohija bajcy paśla byli pakaranyja vielizarnymi terminami — naprykład, Valeryj Ihnatovič dy Dźmitryj Malik, jakim prysudzili pažyćciovaje źniavoleńnie. Abo sprava piaci sachraŭcaŭ, siarod jakich samy viadomy — major Karniuška, asudžany za sprobu zakaznoha zabojstva biznesoŭca. Ale Paŭličenka całkam paźbieh adkaznaści.
Baćka treniravaŭ Arciemija ź dziacinstva. Na fota z sacsietak vidać, što Dźmitryj vučyŭ jaho stralać, zajmaŭsia ź im adzinaborstvami i inšymi vidami sportu.
I, viadoma, braŭ z saboj na roznyja mierapryjemstvy.
Paśla škoły Arciemij skončyŭ fakultet unutranych vojskaŭ Vajskovaj akademii Biełarusi. I pajšoŭ słužyć u SACHR. Maje zvańnie staršaha lejtenanta, pasadu načalnika raźliku i krapavy bieret.
Pa źviestkach prajekta «Dzikaje palavańnie», udzielničaŭ u razhonach mirnych demanstracyj u 2020 hodzie. Taksama prymaŭ udzieł u zatrymańni biełarusaŭ pa palityčnych matyvach, siarod jakich byŭ i Viktar «Mao» Žarkievič.
Paśla vypadku z Žarkievičam Paŭličenku-małodšamu pazvaniŭ błohier Andrej Pavuk. Na pytańnie, ci nie fašyst toj, Paŭličenka pačaŭ pahražać błohieru. «Pačvara, jašče raz siudy pazvoniš — ja ciabie adšukaju, pavier ty mnie, žyviolina», — skazaŭ toj Pavuku.
Žanaty ź dziaŭčynaj, jakaja, miarkujučy pa sacsietkach, nie maje dačynieńnia da siłavych struktur. Jany ažanilisia šeść hadoŭ tamu.
«Naša Niva» — bastyjon biełaruščyny
PADTRYMAĆPamior lehienda biełaruskaha panka Viktar «Mao» Žarkievič. Hubazikaŭcy prymušali jaho nieści z saboj dźviery ad chaładzilnika
20-hadovaha chłopca sa zbornaj pa sudamadelnym sporcie asudzili za «zakliki da sankcyjaŭ». Pahražała da 12 hadoŭ
«U Biełarusi maju muzyku rekłamavała KDB, a ŭ Polščy — palicyja». Bancar prakamientavaŭ svajo zatrymańnie ŭ Varšavie
SK nazvaŭ imiony tych, chto skinuŭ vybuchoŭku na bazu AMAPa ŭ Minsku ŭ 2021 hodzie9
Kamientary